BARUMSA 09
Kadhannaadhaan Waaqayyotti Dhihaadhu
Jireenya kee keessatti qajeelfamni akka si barbaachisu sitti dhagaʼamee beekaa? Gaaffiiwwan guguddaa deebii isaanii argachuu barbaaddu qabdaa? Jajjabinni si barbaachisaa? Caalaatti Yihowaatti dhihaachuu hoo ni barbaaddaa? Kadhannaan wantoota kana hundumaa irratti si gargaaruu dandaʼa. Garuu, karaa sirriin itti kadhachuu qabnu kami? Waaqayyo kadhannaa hundumaa ni dhagaʼaa? Inni kadhannaa kee akka dhagaʼu mirkanaaʼaa taʼuuf maal gochuu dandeessa? Mee waaʼee kanaa haa ilaallu.
1. Gara eenyuutti kadhannaa dhiheessuu qabna? Waaʼee maalii kadhachuu dandeenya?
Yesuus gara Abbaa keenya isa samii qofatti kadhannaa dhiheessuu akka qabnu barsiiseera. Innumti iyyuu gara Yihowaatti kadhannaa dhiheesseera. Akkana jedheera: “Egaa, isin akkana jedhaa kadhadhaa: ‘Yaa Abbaa keenya isa samii irra jiraattuu . . . ’” (Maatewos 6:9) Yommuu gara Yihowaatti kadhannaa dhiheessinu, michummaa isaa wajjin qabnu ni cimsanna.
Waaʼee wanta hundumaa jechuun ni dandaʼamaa, kadhachuu ni dandeenya. Waaqayyo kadhannaa keenyaaf deebii akka kennuuf garuu, fedhii isaa wajjin haala wal simuun kadhachuu qabna. “Wanti kadhannu maal iyyuu yoo taʼe, akka fedhii [Waaqayyootti] yoo kadhanne inni nu dhagaʼa.” (1 Yohaannis 5:14) Yesuus wantoota sirrii kadhachuu qabnu ilaalchisee fakkeenya kenneera. (Maatewos 6:9-13 dubbisi.) Waaʼee wantoota dhuunfaatti nu yaaddessanii kadhachuu malees, wanta Waaqayyo nuu godheef isa galateeffachuu fi warra kaan akka gargaaru isa kadhachuu keenya dagachuu hin qabnu.
2. Akkamitti kadhachuu qabna?
Kitaabni Qulqulluun, ‘garaa keenya Waaqayyoof akka bannu’ nu jajjabeessa. (Faarfannaa 62:8) Kanaafuu, kadhannaan keenya garaadhaa kan madde taʼuu qaba. Karaa Yihowaadhaaf ulfina fidu kamiin iyyuu, sagalee keenya ol kaasnee ykn sagalee keenya utuu hin dhageessisin kadhachuu dandeenya. Yeroo fi iddoo kamitti iyyuu kadhachuu dandeenya.
3. Waaqayyo kadhannaa keenyaaf deebii kan kennu akkamitti?
Karaa garaa garaatiin deebii nuu kenna. Yihowaan gaaffiiwwan keenya baayʼeedhaaf deebii kennuuf, Kitaaba Qulqulluu isa Dubbii isaa taʼe nuuf kenneera. Dubbii Waaqayyoo dubbisuun ‘isa muuxannoo hin qabne ogeessa gochuu’ dandaʼa. (Faarfannaa 19:7; Yaaqoob 1:5 dubbisi.) Yommuu rakkinni nu mudatutti, nagaa sammuu nuuf kenna. Kana malees, yommuu gargaarsi nu barbaachisutti, tajaajiltoonni isaa akka nu gargaaran isaan kakaasuu dandaʼa.
CAALAATTI BARADHU
Karaa Waaqayyoon gammachiisuun kadhannaa garaadhaa madde dhiheessuu kan dandeessu akkamitti akka taʼe qoradhu, akkasumas kadhannaan si fayyaduu kan dandaʼu akkamitti akka taʼe baradhu.
4. Waaqayyo ulaagaalee kadhannaadhaaf baase qaba
Kadhannaan keenya Waaqayyo duratti fudhatama akka qabaatu ykn fudhatama akka dhabu wantoonni taasisan maal faʼi? VIIDIYICHA taphachiisaa.
Yihowaan gara isaatti kadhannaa akka dhiheessinu barbaada. Faarfannaa 65:2 dubbisaa, achiis gaaffiiwwan kanneen irratti mariʼadhaa:
-
‘Inni kadhannaa namaa dhagaʼu,’ gara isaatti kadhannaa akka dhiheessitu kan barbaadu sitti fakkaataa? Maaliif?
Waaqayyo kadhannaa keenya akka dhagaʼu yoo barbaanne, ulaagaalee isaa wajjin wal simnee jiraachuuf carraaqqii gochuu qabna. Miikiyaas 3:4 fi 1 Pheexiros 3:12 dubbisaa, achiis gaaffii kana irratti mariʼadhaa:
-
Yihowaan kadhannaa keenya akka dhagaʼu akkamitti mirkanaaʼoo taʼuu dandeenya?
Yeroo waraanni geggeeffamutti, gareen lamaanuu injifannoo argachuuf ni kadhatu. Waaqayyo kadhannaawwan kanaaf deebii akka kennu eeguun sirrii dhaa?
5. Kadhannaan keenya garaadhaa kan madde taʼuu qaba
Namoonni tokko tokko kadhannaadhuma tokko jechaa jechatti irra deddeebiʼanii akka kadhatan ykn afaan hin hubanneen akka kadhatan barataniiru. Waaqayyo garuu haala kanaan gara isaatti kadhannaa akka dhiheessinu barbaadaa? Maatewos 6:7 dubbisaa, achiis gaaffii kana irratti mariʼadhaa:
-
Yommuu kadhannaa dhiheessitu, ‘waanuma wal fakkaatu irra deddeebitee’ dubbachuu irraa of qusachuu kan dandeessu akkamitti?
Guyyaa guyyaadhaan eebba jireenya kee keessatti argatte tokko irratti yaadi, achiis eebba sanaaf Yihowaa galateeffadhu. Guyyaa guyyaadhaan torban tokkoof akkas yoo goote, utuu irra hin deddeebiʼin waaʼee dhimmoota garaa garaa torba kadhachuu dandeessa jechuu dha.
Abbaa gaariin tokko ilmi isaa garaadhaa akka isatti dubbatu barbaada. Yihowaanis garaadhaa akka isa kadhannu barbaada
6. Kadhannaan kennaa Waaqayyo nuuf kenne dha
Kadhannaan yeroo gaariittis taʼe yeroo rakkinaatti nu jabeessuu kan dandaʼu akkamitti? VIIDIYICHA taphachiisaa.
Kitaabni Qulqulluun kadhannaan nagaa sammuu argachuuf akka nu gargaaru dubbata. Filiphisiyus 4:6, 7 dubbisaa, achiis gaaffiiwwan kanneen irratti mariʼadhaa:
-
Kadhannaan yeroo hunda rakkina keessaa nu baasuu baatu illee, nu gargaaruu kan dandaʼu akkamitti?
-
Wantoota kadhachuu barbaaddu keessaa tokko tokko maal faʼi?
Kana beektaa?
Jechi “ameen” jedhu “haa taʼu” ykn “dhugumaan” jechuu dha. Bara duriitii kaasee dhuma kadhannaa irratti “ameen” jedhama.—1 Seenaa Baraa 16:36.
7. Kadhannaadhaaf yeroo gaʼaa ramadi
Yeroo tokko tokko hojiin waan nutti baayʼatuuf, kadhachuu ni daganna taʼa. Yesuusiif kadhannaan hammam barbaachisaa ture? Maatewos 14:23 fi Maarqos 1:35 dubbisaa, achiis gaaffiiwwan kanneen irratti mariʼadhaa:
-
Yesuus kadhannaadhaaf yeroo gaʼaa ramaduuf maal godhee ture?
-
Siif hoo yeroon kadhachuuf mijataa taʼe yoomi?
NAMOONNI TOKKO TOKKO AKKANA JEDHU: “Kadhannaan faayidaa hin qabu; Waaqayyo matumaa kadhannaa koo hin dhagaʼu.”
-
Atoo maal jetta?
MAAL BARATTE?
Kadhannaan garaadhaa madde Waaqayyotti dhihaachuuf, nagaa sammuu argachuu fi jabina Yihowaa gammachiisuuf nu barbaachisu nuuf kenna.
Irra Deebii
-
Gara eenyuutti kadhannaa dhiheessuu qabna?
-
Kadhachuu kan qabnu akkamitti?
-
Faayidaawwan kadhannaa tokko tokko maal faʼi?
QORANNOO DABALATAA GODHI
Deebii gaaffiiwwan kadhannaa ilaalchisee yeroo baayʼee gaafatamaniif kenname ilaali.
Sababii barbaachisaa kadhachuu itti qabduu fi qabiyyee kadhannaa keetii fooyyessuu kan dandeessu akkamitti akka taʼe baradhu.
“Kadhannaan Faayidaa Qabaa?” (Mata duree jw.org irratti baʼe)
Eenyutti kadhannaa dhiheessuu akka qabnu ilaalchisee wanta Kitaabni Qulqulluun jedhu hubadhu.
“Gara Qulqullootaatti Kadhannaa Dhiheessuun Qabaa?” (Mata duree jw.org irratti baʼe)
Muuziqaa viidiyoodhaan dhihaate kana irraa, iddoon ykn yeroon itti kadhannu jijjiirama kan fidu taʼuu fi dhiisuu isaa hubadhu.
Kanneen Armaan Gadiis ni Jaallatta Taʼa
GAAFFIIWWAN YEROO BAAYʼEE GAAFATAMAN
Qoʼannaan Kitaaba Qulqulluu Dhugaa Baatonni Yihowaa Geggeessan Maali Dha?
Qoʼannaa tolaan Dhugaa Baatonni Yihowaa geggeessan irratti, hiikkaa Kitaaba Qulqulluu kam iyyuu fayyadamuu dandeessa. Maatii ykn michoota kee affeeruu dandeessa.
