NTʼUDI 09

Má gi kuati ko kʼa Tsi Mähkí Tá mu̱ gi nzofo

YʼO̱DE HA

¿Ko tso ra yä bes ge gi höní ʼna nföxte ha nu̱ ri nzahki? ¿Gi peʼtsi yä ntʼöni ge hiʼbe ko töti ku̱ yo thädí? ¿Gi höní tó da möxkí nihi tó da jóʼtiki? ¿Gi ne gi tso ge má gi kuati ko kʼa Jehová? Mu̱ gi nzoʼ kʼa Jehová da möxkí pa gi töti kʼa gi höní. Pe, ¿ankja da zo go nzohmu̱ kʼa Tsi Mähkí Tá? ¿I o̱de kʼa Tsi Mähkí Tá goʼtho ku̱ tó i nzofo? ¿Ankja da zo gi pädi ge kʼa Tsi Mähkí Tá i o̱de mu̱ gi nzohke? Ma núhu̱.

1. ¿Tó kʼa da zo go nzohmu̱? ¿Té da zo go xihmu̱ kʼa Tsi Mähkí Tá mu̱ di nzohmu̱?

Kʼa Hesu bi úhtite ge ho̱nse kʼa ma Táhu̱ i ʼbu̱i a jitsi da zo go nzohmu̱. Xo genkʼa mi kjá kʼa Hesu, gege mi nzoʼ kʼa Jehová. ʼNa mpa gege bi mä: “Nukehu̱ petsite gi ñähu̱ ko rä Tsi Mähkí Tá nkjaua: ʼma Táhe gi ʼbu̱i ha yu̱ jitsi...’” (Mateo 6:9). Mu̱ go nzohmu̱ kʼa Jehová, má go mpädihu̱ ko gege, nihi má da ze̱di nu ma íhkjihu̱.

Mu̱ go nzohmu̱ kʼa Tsi Mähkí Tá da zo go xihmu̱ goʼtho kʼa di tsohu̱. Pe, mu̱ di nehu̱ da dähtígihu̱, ra zo go o̱hpíhu̱ kʼa gege i nú ra zo. Nu̱ Biblia i mä ge “hä da o̱hkígihu̱ mu̱ go öhpíbihu̱ kʼa gege i nú ra zo” (1 Juan 5:14). Kʼa Hesu bi úhtite té ʼbenkʼa da zo go öhpíbihu̱ kʼa Tsi Mähkí Tá mu̱ di nzohmu̱ (xödí Mateo 6:9-13). Mahke di xihmu̱ goʼtho kʼa di tsohu̱, hin go däbenihu̱ go ʼunihu̱ kjamädí kʼa Tsi Mähkí Tá po goʼtho kʼa xi o̱te po nugohu̱ nihi go öhpíbihu̱ da mötsí maʼra yä kjäʼni.

2. ¿Ankja go nzöhmu̱ kʼa Tsi Mähkí Tá?

Nu̱ Biblia i xihkígihu̱ nuná: “Xohkibihu̱ ri koraso ante gege [kʼa Tsi Mähkí Tá]” (Salmo 62:8). Po gehna, mu̱ di nzohmu̱, ra zo go xihmu̱ goʼtho kʼa i ʼbu̱i ha nu ma korasohu̱. Da zo go nzohmu̱ mahke da tʼo̱de o tsi nkjante, mu̱ gi ʼboy o mu̱ gi mii, pe gi úhtite ge gi ndo̱ mädí kʼa Tsi Mähkí Tá. Nini da zo go nzohmu̱ kʼa ora go nehu̱ nihi ha kʼa luga gi ʼbu̱i.

3. ¿Ankja ga dädí kʼa Tsi Mähkí Tá mu̱ di nzohmu̱?

I kjá ko tengu yä mföxte. Po madé nu̱ ro hñä, nu̱ Biblia, i thähtígihu̱ yu̱ ntʼöni di peʼtsihu̱. Mu̱ tó da xödí kʼa ro hñä kʼa Tsi Mähkí Tá da kjá má da “bädi kʼa hiʼtsa i pädi” (Salmo 19:7; xödí Santiago 1:5). Nihi, mu̱ di thogihu̱ yu̱ ra nthí, kʼa Jehová da kjá hin go ndo̱ ʼñonfenihu̱. Nihi, i kjá ge ku̱ yo me̱fí da möxkígihu̱ mu̱ go höníhu̱.

MA PÄDIHU̱ MÁ RA NGU DE NU̱ TEMA

Ma núhu̱ ankja da zo go nzohmu̱ kʼa Tsi Mähkí Tá pa nkjanu̱ gege da ne da ʼyo̱hkígihu̱ hihi ankja da zo da möxkígihu̱ mu̱ go nzohmu̱.

4. ʼBu̱i kʼa té xi nthutsí pa da zo go nzohmu̱ kʼa Tsi Mähkí Tá

¿Té ʼbenkʼa ra zo go pe̱hmu̱ pa ge kʼa Tsi Mähkí Tá da o̱de mu̱ di nzohmu̱? Núhu̱ nu̱ VIDEO.

VIDEO: ¿I o̱de kʼa Tsi Mähkí Tá goʼtho ku̱ tó i nzofo? (nu̱ hiʼtsa i dé) (2:42)

Kʼa Jehová i ne ge ho̱nse gege go nzohmu̱. Xödíhu̱ Salmo 65:2 nihi ñähu̱ de gehna:

¿Gi beni ge kʼa Tsi Mähkí Tá, kʼa “i o̱de mu̱ i tʼsofo” nihi i ne ge nuke gi nzofo? ¿Ó gi beni nkjanu̱?

Mu̱ di nehu̱ ge kʼa Tsi Mähkí Tá da o̱de mu̱ di nzohmu̱, ra zo go mpexkehu̱ pa go ʼmu̱fu̱ ngu i ne gege. Xödíhu̱ Miqueas 3:4 ko kʼa 1 Pedro 3:12, nihi ñähu̱ de gehna:

¿Ankja da zo go pädihu̱ ge kʼa Tsi Mähkí Tá hä da o̱de mu̱ di nzohmu̱?

Mu̱ yoho yä hnini i öhpíbihu̱ kʼa Tsi Mähkí Tá da mötsí pa da ma ntúhu̱. ¿Da zo go benihu̱ ge kʼa Tsi Mähkí Tá da dädí pa da dähmu̱?

5. Mu̱ go nzohmu̱ kʼa Tsi Mähkí Tá go xihmu̱ kʼa i tso nu ma korasohu̱

Ndunthi yä kjäʼni xi tʼúhtibi kʼa da mähmu̱ mu̱ i xöhpíbihu̱ ku̱ yo kjähu̱. ¿Pe nkjanu̱ i ne kʼa Tsi Mähkí Tá go nzohmu̱? Xödíhu̱ Mateo 6:7 nihi ñähu̱ de gehna:

¿Té da zo go pe̱hmu̱ pa hi ndee “go yohpí go mähmu̱” kʼa di xihmu̱ kʼa Tsi Mähkí Tá?

¿Xiʼmu̱ gi ʼuni kjamädí kʼa Jehová po goʼtho kʼa ra nchala gi thogi mpa ko mpa? Mu̱ gi kjá nuná po ʼna ngo, mu̱ da thege kui no̱ni yohto yä hñä hin di ngentho ko ku̱ piʼra ko ʼyödi.

ʼNa chala tá i ne ge kʼa ro bähtsí da xifí goʼtho kʼa i tso kʼa ro koraso. Kʼa Jehová nihi i ne ge kʼa té go xihmu̱ da bo̱ni de nu ma korasohu̱.heart

6. Kʼa má ra ndo̱ zo xi nahkígihu̱ kʼa Tsi Mähkí Tá i nkja mu̱ di ñähu̱ ko gege

¿Ankja da zo da kjá go ze̱dihu̱ mu̱ di ñähu̱ ko kʼa Tsi Mähkí Tá, mu̱ di thogihu̱ yu̱ ra nthí ha nu ma nzahkihu̱? Núhu̱ nu̱ VIDEO.

VIDEO: Mu̱ di nzohmu̱ kʼa Jehová i föxkígihu̱ go tse̱htíhu̱ (1:32)

Nu̱ Biblia i mä ge mu̱ go nzohmu̱ kʼa Tsi Mähkí Tá da möxkígihu̱ pa hin go ʼñonfenihu̱. Xödíhu̱ Filipenses 4:6, 7 nihi ñähu̱ de gehna:

Mahke hin da ʼueni goʼtho yu̱ dumu̱i di peʼtsihu̱ mu̱ di ñähu̱ ko kʼa Tsi Mähkí Tá, ¿ankja ga möxkígihu̱?
¿Té ʼbenkʼa da zo gi xiʼ kʼa Tsi Mähkí Tá mu̱ gi nzofo?

¿Ngi pädi?

Kʼa hñä amén i ne da mä “da nkjapu̱”. Ta mu̱ nga nthutsí nu̱ Biblia mi mähmu̱ “da nkjapu̱” mu̱ mi guadi mi nzohmu̱ kʼa Tsi Mähkí Tá (1 Crónicas 16:36).

7. Hin gi däbeni gi ñäui kʼa Tsi Mähkí Tá

ʼRa yä bes di peʼtsihu̱ ndunthi yä ʼbe̱fí ge ta di däbenihu̱ go nzohmu̱ kʼa Tsi Mähkí Tá. ¿Ankja mi nú kʼa Hesu mu̱ mi ñäui kʼa Tsi Mähkí Tá? Xödíhu̱ Mateo 14:23 ko kʼa Marcos 1:35, nihi ñähu̱ de gehna:

¿Ankja mi kjáhpi kʼa Hesu pa hin di däbeni di ñäui ko kʼa Tsi Mähkí Tá?
Xi nuke, ¿té da zo gi pe̱fí pa hin gi däbeni gi nzoʼ kʼa Tsi Mähkí Tá?

KʼA I MÄHMU̱ PIʼRA YÄ KJÄʼNI: “Mahke gi nzoʼ kʼa Tsi Mähkí Tá hin gi o̱ʼki”.

¿Té gi mänge?

KʼA KO PÄDI

Mu̱ di nzohmu̱ kʼa Tsi Mähkí Tá ko goʼtho ma korasohu̱ má i kjá go kuatihu̱ ko gege. Nihi i kjá hin go ʼñonfenihu̱, nihi i nahkígihu̱ kʼa tse̱dí di höníhu̱ pa go kjáhu̱ kʼa i to̱ʼmi gege.