LÈS 09
Orashon Por Yuda Bo Hala Serka Dios
Bo a yega di sinti ku bo mester di guia den bo bida? Bo tin pregunta importante ku bo ke haña kontesta p’e? Bo mester di konsuelo òf animashon? Bo tin gana di tin un amistat mas será ku Yehova? Orashon por yuda bo ku tur e kosnan ei. Pero kon bo mester hasi orashon? Dios ta skucha tur orashon? Kon bo por hasi sigur ku Dios ta skucha bo orashonnan? Laga nos trata kontesta pa e preguntanan ei.
1. Na ken nos mester hasi orashon i tokante kiko nos por hasi orashon?
Hesus a siña nos pa hasi orashon solamente na nos Tata den shelu. Hesus mes a hasi orashon na Yehova. El a bisa: “Pues, boso mester hasi orashon asin’akí: ‘Nos Tata ku ta den shelu . . . ’” (Mateo 6:9) Ora nos ta hasi orashon na Yehova, nos ta hasi nos amistat kuné mas fuerte.
Nos por hasi orashon tokante kasi tur kos. Sinembargo, Dios ta kontestá solamente e orashonnan ku ta di akuerdo ku su boluntat. Beibel ta bisa: “Kiko ku nos [pidi Dios] ku ta di akuerdo ku su boluntat, e ta tende nos.” (1 Huan 5:14) Hesus a duna ehèmpel di algun kos ku nos por pidi den orashon. (Lesa Mateo 6:9-13.) Aparte di hasi orashon tokante nos preokupashonnan, nos mester kòrda yama Dios danki pa loke el a hasi pa nos. Ademas, nos mester pidié pa yuda otro hende.
2. Kon nos mester hasi orashon?
Beibel ta animá nos pa deshogá nos kurason na Dios. (Salmo 62:8) Pues, nos orashonnan mester ta sinsero i di kurason. Bo por hasi orashon na bos haltu òf den bo mes. Ademas, bo por hasi orashon den kualke posishon ku ta mustra rèspèt pa Yehova. Nos por hasi orashon na kualke momento i na kualke lugá.
3. Kon Dios ta kontestá nos orashonnan?
Dios ta kontestá nos orashonnan na diferente manera. Yehova a duna nos Beibel i mayoria di biaha nos ta haña kontesta pa nos preguntanan den Beibel. Ora nos ta lesa Dios su Palabra, esei por hasi nos sabí. (Salmo 19:7; lesa Santiago 1:5.) Un otro manera ku Yehova ta kontestá nos orashonnan ta di duna nos pas mental ora nos ta pasa den difikultat. Ademas, e por motivá su sirbidónan pa yuda nos ora nos tin mester di yudansa.
KIKO MAS NOS POR SIÑA?
Laga nos wak kon bo por hasi orashon ku ta agradá Dios i wak kon orashon por yuda bo den bo bida.
4. Kiko nos mester hasi pa Dios skucha nos orashonnan?
Kiko ta hasi nos orashonnan aseptabel pa Dios? Pasa e VIDIO.
Yehova ke pa nos hasi orashon na dje. Lesa Salmo 65:2. Despues, analisá e siguiente preguntanan:
-
Bo ta kere ku Dios, kende ta “skucha orashon,” ke pa abo resa na dje? Dikon bo ta pensa esei?
Pa Dios por skucha nos orashonnan, nos mester biba na un manera ku ta agrad’é. Lesa Mikéas 3:4 i 1 Pedro 3:12. Despues, analisá e siguiente pregunta:
-
Kiko nos mester hasi pa nos tin sigur ku Yehova ta skucha nos orashonnan?
Durante guera, sòldá di tur dos banda ta pidi Dios pa yuda nan kaba ku nan enemigunan. Ta lógiko pa spera ku Dios lo kontestá nan orashon?
5. Ora nos ta hasi orashon, nos mester bisa Yehova tur loke nos ta sinti
Algun hende a ser siñá pa ripití e mesun palabranan den nan orashonnan. Pero, ta asina Dios ke pa nos hasi orashon? Lesa Mateo 6:7. Despues, analisá e siguiente pregunta:
-
Kon bo por evitá di “ripití e mesun palabranan” ora di hasi orashon?
Tur dia, pensa riba algu spesífiko ku bo por gradisí Yehova p’e. Ora bo hasi esei tur dia pa un siman largu, despues di e siman ei, lo bo a hasi orashon tokante shete diferente tópiko sin ku bo a ripití e mesun palabranan.
Meskos ku un tata ke pa su yu bis’é tur loke e ta sinti, asina tambe Yehova ke pa nos ekspresá nos sintimentunan na dje den orashon
6. Orashon ta un regalo di Dios
Kon orashon por yuda nos, spesialmente ora nos ta pasando den tempu difísil? Pasa e VIDIO.
Beibel ta bisa ku orashon por yuda nos sinti nos trankil. Lesa Filipensenan 4:6, 7. Despues, analisá e siguiente preguntanan:
-
Aunke orashon no ta resolvé tur nos problemanan, kon orashon ta yuda nos?
-
Tokante kiko bo ke papia ku Yehova den orashon?
Bo tabata sa?
E palabra “amèn” ta nifiká “sea asina” òf “bèrdat.” For di den tempu bíbliko, hende tabata kaba nan orashonnan ku “amèn.”—1 Krónikanan 16:36.
7. Traha tempu pa bo hasi orashon
Tin biaha, nos ta asina okupá ku nos ta lubidá di hasi orashon. Kon importante orashon tabata pa Hesus? Lesa Mateo 14:23 i Marko 1:35. Despues, analisá e siguiente preguntanan:
-
Kon Hesus a traha tempu pa hasi orashon?
-
Ki ora bo por traha tempu pa bo hasi orashon?
LOKE HENDE SA BISA: “Orashon no ta yuda ku nada. Dios no ta kontestá mi orashonnan tòg.”
-
Kiko bo por bisa un hende ku bisa bo esei?
RESÚMEN
Ora nos ta hasi orashon di kurason, nos lo tin un amistat mas será ku Dios, nos lo tin pas mental i nos lo tin e forsa pa hasi loke ta agradá Yehova.
Repaso
-
Na ken nos mester hasi orashon?
-
Kon nos mester hasi orashon?
-
Kon orashon por yuda nos?
MAS INFORMASHON INTERESANTE
Wak kontesta pa pregunta ku hopi hende sa hasi tokante orashon.
“Shete Kos Ku Bo Mester Sa Tokante Orashon” (E Toren di Vigilansia di 1 di òktober 2010)
Wak dikon ta importante pa hasi orashon i kon bo por mehorá bo orashonnan.
Wak na ken Beibel ta bisa ku nos tin ku hasi orashon.
Wak e vidio musikal akí i tuma nota si nos mester hasi orashon na un lugá òf ora spesífiko.
Otro Artíkulo Interesante
PREGUNTA KU HOPI HENDE SA HASI
Kon un Kurso di Beibel Ku Testigunan di Yehova Ta Bai?
Pa sigui un kurso di Beibel interaktivo grátis ku Testigunan di Yehova, bo por usa kualke tradukshon di Beibel ku bo ta preferá. Sinti bo liber pa invitá henter bo famia òf kualke amigu pa sigui e kurso di Beibel huntu ku bo.
