9. KAPITEL
Derch daut Jebäd kaust du een jratra Frint woaren met Gott
Fält die daut mol aun Rot? Jeft daut wichtje Sachen, wua du mol wurscht jleichen, de Kloarheit äwa to haben? Fält die daut aun Troost ooda Moot? Wurscht du die Jehova jleichen, dolla no aun to feelen? Bäden kaun die bie aul soont halpen. Oba woo saul eena bäden? Horcht Gott no aule Jebäda? Ooda waut kaust du doonen, daut Gott no diene Jebäda horcht? Well wie mol seenen.
1. To wäm sell wie bäden un om waut kjenn wie bäden?
Jesus lieed, daut wie bloos sullen to onsen himlischen Voda bäden. Hee selfst bäd uk to Jehova. Hee säd: “Doawäajen sell jie soo bäden: Ons Voda em Himmel!” (Matäus 6:9). Wan wie bäden, dan woa wie jratre Frind met Jehova.
Wie kjennen Gott no irjentwaut froagen. Oba wan Gott onse Jebäda beauntwuaten saul, dan motten dee uk met sienen Wellen tooppaussen. Wiels de Schreft sajcht, daut Gott “ons hieren deit, wan wie am no waut froagen, daut no sienem Wellen es” (1. Johanes 5:14). Jesus wees, om waut eena wudd bäden kjennen (läs Matäus 6:9-13). Wie kjennen om daut bäden, waut ons oppem Hoaten licht. Oba wie sellen nich vejäten, Gott to danken fa aules, waut hee fa ons jedonen haft un dän froagen, uk aundre to halpen.
2. Woo sell wie to Gott bäden?
De Schreft sajcht: “Schett jun Hoat ver am ut” (Psalm 62:9). Onse Jebäda sellen aulsoo von Hoaten komen. Wie kjennen opp ludes bäden ooda uk opp stelles. Wie kjennen ons irjentwoo hanstalen, soo lang aus wie Gott Respakjt wiesen. Wie kjennen uk to irjenteene Tiet ooda irjentwua bäden.
3. Woo jeft Gott ons daut, om waut wie bäden?
Daut es veschieden. Jehova jeef ons de Schreft, un derch dee jeft hee ons Kloarheit äwa välet, waut wie weeten wellen. Gott sien Wuat läsen, “moakt dee weis, dee daut fält” (Psalm 19:8; läs Jakobus 1:5). Hee kaun ons en schwoare Tieden halpen, ruich to bliewen. Un hee kaun uk siene Deena bat doa brinjen, daut dee ons dan jroz halpen, wan ons daut needich fält.
DOLLA UNJASTONEN
See mol, woo du kaust von Hoaten bäden un soo, daut Gott daut jefelt. See uk, woo die daut halpen kaun, wan du bätst.
4. Fa Gott es daut wichtich, woo wie bäden
Woone Jebäda nemt Gott aun un woone nich? Kjikjt daut VIDEO.
Jehova well daut haben, daut wie sellen to am bäden. Läst Psalm 65:3 un dan got toop dise Froagen derch:
-
Wan Gott no “onse Jebäda” horcht, well hee dan uk haben, daut du to am bätst? Wuarom wurscht du daut sajen?
Wan wie wellen haben, daut Gott no onse Jebäda horchen saul, dan mott wie uk proowen, soo to läwen, aus hee daut fa rajcht talt. Läst Micha 3:4 un 1. Petrus 3:12 un dan got toop dise Froag derch:
-
Waut kjenn wie doonen, daut Jehova no onse Jebäda horcht?
Em Kjrich bäden de Jäajna von beid Sieden veleicht, daut see jewennen wellen. Wudd eena kjennen jleewen, daut Gott soone Jebäda aunnemt?
5. Onse Jebäda sellen von Hoaten sennen
Eenje Menschen sent jelieet, de Jebäda emma wada utwendich äwatosajen. Oba well Jehova, daut wie soo to am bäden sellen? Läst Matäus 6:7 un dan got toop dise Froag derch:
-
Woo kjenn wie daut väabieejen, ladje Wieed ooda emma wada dautselwje en onse Jebäda to sajen?
Denkj jieda Dach äwa eenatlei, woo Jehova die jesäajent haft un dank am doafäa. Doo daut mol fa eene Wäakj jieda Dach. Dan wurscht du aul om säwen veschiedne Sachen jebät haben, onen emma dautselwje to sajen.
Een feina Voda well, daut sien Kjint von Hoaten to am rät. Un krakjt soo well Jehova uk, daut wie von Hoaten to am bäden
6. Daut wie bäden kjennen, es een Jeschenkj von Gott
Woo kjennen de Jebäda ons en goode un uk en schlajchte Tieden Krauft jäwen? Kjikjt daut VIDEO.
De Schreft vesprakjt ons, daut bäden ons halpen woat, ennalich Fräd to haben. Läst Filippa 4:6-7 un dan got toop dise Froagen derch:
-
Wan onse Schwierichkjeiten derch bäden uk nich emma wajchgonen, woo halpt daut doawäajen?
-
Om waut wurscht du jleichen to bäden?
Hast du daut jewist?
Daut Wuat “Amen” meent “soo saul daut sennen” ooda “secha”. Von Bibeltieden aun haben se daut Wuat “Amen” aul emma opp Enj von de Jebäda jesajcht (1. Chronik 16:36).
7. Nemm die Tiet toom bäden
Eenjemol sent wie veleicht soo drock, daut wie vejäten to bäden. Woo wichtich wia daut fa Jesus to bäden? Läst Matäus 14:23 un Markus 1:35 un dan got toop dise Froagen derch:
-
Waut deed Jesus, om Tiet to haben toom bäden?
-
Wanea wurscht du die kjennen Tiet nämen toom bäden?
WAUT EENJE SAJEN: “Wan Gott no onse Jebäda horchen saul, dan mott wie opp eene jewesse Sproak bäden.”
-
Waut denkjst du doaräwa?
KAPITEL TOOPJEFOT
Wan wie von Hoaten bäden, dan kjenn wie bätre Frind woaren met Gott un daut jeft ons ennalich Fräd. Daut jeft ons uk de Krauft, daut wie daut doonen kjennen, waut Jehova jleicht.
Waut hast du jelieet?
-
To wäm sell wie bäden?
-
Woo sell wie bäden?
-
Waut haft daut fa goodet, wan wie bäden?
MEA NOSIEEKJEN
Väle haben Twiewel äwa daut Jebäd. See mol, woo daut doamet steit.
“Säwen Sachen, waut du wurscht sellen äwa daut Jebäd weeten” (De Woaktorm, 1. Oktooba 2010)
Lia, wuarom daut goot es to bäden un woo du diene Jebäda kaust vebätren.
Unjasto die daut, waut de Schreft sajcht, to wäm wie sellen bäden.
Kjikj en dit Musikj-Video mol, aus daut waut to sajen haft, wua ooda wanea eena bät.
Veleicht jleichst du uk dit
WAUT FOAKEN JEFROACHT WOAT
Woo es een Bibelstudium met Jehova siene Zeijen?
Wan Jehova siene Zeijen emsonst met die de Bibel studieren, dan kaust du soone Bibel brucken, aus du west. Doa kaun diene gaunze Famielje met bie sennen un uk Frind, wan du dee enloden west.
