Wana khala nu funu ya utuameji mu monyo waye ba? Wana kamba guheta mvutu gu mihu ya ndando wana gudihula ba? Wana khala nu funu ya ukuateshi ba? Wana tshigina gukuata ufuta nu Yehowa ba? Gisambu giajiya gugukuatesa mu ndaga eji jiagasue. Na itshi wajiya gutshita ha gukombelela mu luholo luabonga? Nzambi wana tegelela isambu ya muthu wagasue ba? Itshi udi naye gukalagala hagula Nzambi ategelele isambu yaye? Tuzuelelenu ndaga yene.

1. Nanyi tudi naye gukombelela? Ndaga jitshi tudi naye gumutoga mu gisambu?

Yesu walongesele egi tudi naye gukombelela phamba Sh’etu wa mu dilu. Yesu hakhenji wakhalele mukombelela Yehowa. Wazuelele egi: “Mudi naye gukombelela luholo elu: ‘Tata wetu udi mu dilu . . .’” (Matayo 6:9) Gutshita gisambu guana gutukuatesa ha gukolesa ufuta wetu nu Yehowa.

Tuajiya gukombelela mukunda nu mulonga wagasue tudi nawo. Hagula Nzambi ahane mvutu gu isambu yetu, isambu yene idi naye gudivua nu gutshigina guenji. “Ndaga yagasue tuana gumulomba idi gudivua nu gutshigina guenji, wana gututegelela.” (1 Yone 5:14) Yesu wahanele ifezegeselo ya ima tudi naye gutoga mu gisambu. (Tanga Matayo 6:9-13.) Tudi naye gukalagala gisambu ha gutoga Nzambi ima tudi nayo funu. Tudi naye nji gumuhana mersi mukunda nu ndaga jiana gutukalegela muene, nu gumutoga ha gukuatesa athu ako.

2. Luholo lutshi tudi naye gukalagala gisambu?

Biblia idi gututoga ha ‘guwambela Nzambi ndaga jiagasue jidi mu mitshima yetu.’ (Ngimbo 62:8) Gishina giene tudi naye gukalagala isambu ya giamatshidia idi mukatuga mu mitshima yetu. Tuajiya gutshita gisambu mukatshi dia kano nga mu mutshima. Yehowa ganago gututoga egi tangua tudi gumukombelela tukhale ya gumagana nga ya gubanda nga ya gufugama, uvi tudi naye gukhala mu luholo ludi gumunemesa. Tuajiya gukalagala gisambu tangua diagasue nga ha fundo diagasue tudi.

3. Luholo lutshi Nzambi wana hana mvutu gu isambu yetu?

Nzambi wana hana mvutu gu isambu yetu mu maluholo avula. Yehowa watuhanele Mbimbi yenji Biblia, yene yana gutukuatesa ha guheta mvutu gu mihu yetu. Gutanga Mbimbi ya Nzambi guajiya ‘guhana ndunge gudi muthu waheya.’ (Ngimbo 19:7; Tanga Yakoba 1:5.) Yehowa udi nu ngolo jia gutukuatesa ha gukhala mu guhuima gula tuatagana nu malamba. Wajiya nji gutukuatesa mu njila ya akombeledi enji.

 NDAGA WALONGUGA

Isambu yana katuga mu mutshima yana gutukuatesa ha gusuena hehi nu Nzambi, yana gutuhana guhuima, yana gutuhana nji ngolo jia gukalagala ndaga jiana suanguluisa Yehowa.

Mihu ya Guvutugila

• Nanyi tudi naye gukombelela?

• Luholo lutshi tudi naye gukalagala gisambu?

• Gubonga gutshi tuana heta tangua tuana kalagala gisambu?