IREN MEHN KASUKUHL 09

Karanihala Koht Sang ni Kapakap

PLAY

Mie pak me ke medewe me ke anahne kaweid nan omw mour? Mie omw peidek kesempwal kan me ke men ese pasapengpe? Ke anahne mehkot me pahn kansenamwahwihiuk de kangoangeiuk? Ke men karanihala Siohwa? Kapakap kak sewesehkin uhk mepwukat koaros. Ahpw ia elen kapakap me pwung en? Koht kin ketin karonge kapakap koaros? Dahme ke kak wia pwehn uhdahn ketin karonge omw kapakap kan? Kitail pahn kilang.

1. Ihs me kitail anahne kapakapohng oh dahme kitail kak kapakapki?

Sises ketin padahngki me kitail anahne kapakapohngete Samatailo nanleng. Pein Sises kin ketin kapakapohng Siohwa. E mahsanih: “Iet duwen amwail pahn kin kapakap: ‘Samat me ketiket nanleng . . . ’” (Madiu 6:9) Ni atail kin kapakapohng Siohwa, kitail kin kakehlaka atail nanpwungmwahu reh.

Kitail kak kapakapki soahng koaros. Ahpw, pwe Koht en ketin karonge atail kapakap kan, atail kapakap anahne pahrekiong kupwure. “Sohte lipilipil dahme kitail kin peki nin duwen kupwure, e pahn ketin karonge kitail.” (1 Sohn 5:14) Sises ketin padahngki soahng kan me konehng kitail en kapakapki. (Wadek Madiu 6:9-13.) Patehngete atail kapakap kan me pid pein kitail, kitail dehr manokehla en kapingkalahngankihong Koht dahme e ketin wiahiong kitailehr oh peki en ketin sewese meteikan.

2. Ia mwomwen atail pahn kapakap?

Paipel kin kangoangehkin kitail en kapakapohng Koht “ni mohngiong mehlel.” (Ipru 10:22) Eri atail kapakap kan anahne en kin mehlel oh sang nan mohngiong. Kitail kak kapakap ni ngihl laud de tikitik oh sohte lipilipil mwomwen soandihn paliwar me kasalehda wahu ong Siohwa. Kitail kak kapakap ni ahnsou oh wasa sohte lipilipil.

3. Ia duwen Koht eh kin ketin sapeng atail kapakap kan?

E kin ketin wia met ni soangsoangen ahl akan. Siohwa ketikidahr sapwellime Mahsen, Paipel oh ih wasaht me kitail kin kalapw diar pasapengpen atail peidek kan. En wadek sapwellimen Koht mahsen kak “kaloalokongihala me soaloalokong kan.” (Melkahka 19:7; wadek Seims 1:5.) E kak ketin sewese kitail en ahneki meleilei ni atail kin lelohng kahpwal akan. E kak ketin kamwakid sapwellime tohnkaudok kan ren sewese kitail ni ahnsou me kitail uhdahn anahne.

KALAUDEHLA OMW ESE MET

Kilang ia duwen omw kak kapakap ni ahl me pahn kaperenda Koht oh ia kamwahupen kapakap.

4. Dahme Koht ketin kupwurki me pid kapakap

Soangen kapakap dah kan me Koht kin ketin karonge de sohte karonge? Kilang KISIN KASDO.

KISIN KASDO: Koht Kin Ketin Karonge Kapakap Koaros?—Excerpt (2:42)

Siohwa ketin kupwurki kitail en kapakapohng ih. Wadek Melkahka 65:2, oh koasoiapene peidek pwukat:

Koht kin ketin “sapeng pekipek kan.” Ke medewe Koht ketin kupwurki ken kapakapohng ih? Dahme kahrehda, de dahme sohki?

Ma kitail men Koht en ketin karonge atail kapakap kan, a kitail anahne mour pahrekiong sapwellime koasoandi kan. Wadek Maika 3:4 oh 1 Piter 3:12, oh mwuri koasoiapene peidek wet:

Dahme kitail kak wia pwe Siohwa en uhdahn ketin karonge atail kapakap kan?

Nan mahwen ehu, pali riau kapakapki ren kana. Koht pahn kak ketin karonge kapakap pwukat?

5. Atail kapakap anahne kohsang nan mohngiong

Ekei aramas kin sukuhlki en wadlikihla ehu kapakap oh kin pwurupwurehng nda. Ahpw ih met me Koht ketin kupwurki kitail en wia? Wadek Madiu 6:7, oh mwuri koasoiapene peidek wet:

Ia duwen omw kak dehr “pwurepwurehng ndinda soahng tehieu” nan omw kapakap kan?

Ehuehu rahn, mweinele ke kak medewe ehu kapai nan omw mour, kowe eri kalahngankihong Siohwa kapai wet. Wia met ehuehu rahn erein wihk ehu, oh ke pahn kapakapki soahng isuh ni omw sohte pahn pwurepwurehng ndinda soahng tehieu.

Pahpa mwahu men kin men nah serio en koasoiong ih sang nan mohngiong. Duwehte met, Siohwa ketin kupwurki kitail en kapakapohng ih sang nan mohngiong

6. Kapakap, kisakis ehu sang rehn Koht

Ia duwen kapakap eh kak kakehlakai kitail ni ahnsou mwahu oh ahnsou apwal? Kilang KISIN KASDO.

KISIN KASDO: Prayer Helps Us to Cope (1:32)

Paipel kin inoukihda me kapakap kak sewesei kitail en ahneki meleilei. Wadek Pilipai 4:6, 7, oh mwuri koasoiapene peidek pwukat:

Mendahki kapakap sohte kin kihsang atail kahpwal kan ahnsou koaros, ia duwen met eh kin sewese kitail?
Ia ekei soahng kan me ke men kapakapki?

Ke ese met?

Lepin lokaia “amen” kin wehwehki “en pweida” de “uhdahn.” Sangete ni mwehin Paipel, aramas kin kaimwisengkihla ar kapakap kan “amen.”—1 Kronikel 16:36.

7. Wiahda ahnsoun kapakap

Mweinele ekei pak kitail kin soupisekla oh manokehla kapakap. Ia uwen Sises eh kin ketin kesempwalki kapakap? Wadek Madiu 14:23 oh Mark 1:35, oh mwuri koasoiapene peidek pwukat: