Bu ciga ja di sinti kuma bu pirsisa di orientason na vida? Sera ki bu tene purguntas importanti ku bu misti sibi si resposta? Sera ki bu pirsisa di konsolu o nkoraẑamentu? Bu misti pertusi mas di Jeova? Orason pudi judau tene tudu es kusas. Ma kal ki minjor manera di ora? Sera ki Deus ta obi tudu orasons? Ke ku bu pudi fasi pa tene serteza di kuma i na obi bu orasons? No jubi resposta.

1. Kin ku no dibi di ora pa rel, i ke ku no pudi pidi na orason?

Jesus sina kuma no dibi di ora son pa no Pape ku sta na seu. Jesus propi ta oraba Jeova. I fala: “Bo dibi di ora asin: ‘No Pape ku sta na seu . . . ’” (Mateus 6:9) Ora ku no ora pa Jeova, no ta fortalisi no amizadi ku el.

No pudi pidi kualker kusa na orason. Ma pa Deus ruspundi no orason, i dibi di sta di akordu ku si vontadi. “Si no pidi un kusa na si vontadi [ku sedu di Deus], i na obinu.” (1 Jon 5:14) Jesus da izemplu di kusas ku no pudi ora pa rel. (Lei Mateus 6:9-13.) Alen di ora pa no preokupasons, no ka dibi di diskisi di gardisi Deus pa kusas ki fasi pa nos, i pidil pa i juda utrus.

2. Kuma ku no dibi di ora?

Biblia nkoraẑanu pa no ‘konta [Deus] tudu ku sta na no korson.’ (Salmu 62:8) No orason dibi di sedu sinseru i di korson. No pudi ora na vos altu, na sintidu o na kualker pusison di rispitu. No pudi ora kualker ora i na kualker kau.

3. Kuma ku Deus ta ruspundi no orasons?

I ta fasil di manga di manera. Jeova danu si Palabra, Biblia, nunde ku manga di bias no pudi oja respostas pa no purguntas. Lei Palabra di Deus pudi “da jiresa pa kilis ku ka ten.” (Salmu 19:7; Lei Tiagu 1:5.) Deus pudi judanu tene sintidu susegadu, ora ku no na pasa purblemas. I pudi fasi pa si servus judanu, na mumentus ku na bardadi no pirsisa.

 RUSUMU

Orason sinseru ta pertusinu di Deus, i ta pui pa no sintidu susega, i ta danu forsa ki pirsis pa kontenta Jeova.

Rekapitulason

• Pa kin ku no dibi di ora?

• Kuma ku no dibi di ora?

• Di kal maneras ku orason pudi judanu?