09 CAJ YACHACUY

Diosta mañacushpanchimi payman guelicunchi

GALAYCACHINAPAJ

Diosta mañacushpayquega yanapäshunqui ali cawacunayquipaj, cawaypaj tapucuycunapa respuestancunata tarinayquipaj y laquesacunapa pasaycarpis valurcharcunayquipaj. Chaypäga, ¿imanotaj mañacunquiman? ¿Diosga lapan oraciuncunatachu wiyan? ¿Imanotaj cuentata gocunquiman mañacushgayquita Dios wiyashganta o mana? Cay lapanta yachacushun.

1. ¿Pitataj mañacushwan? ¿Imacunapitataj mañacunanchi?

Jesús yachachicurgan Taytalanchi Jehovalata mañacunapaj. Paypis chaytami rurargan, Jehovalatami mañacurgan. Juc cuticho nergan: “Gamcunaga Tayta Diosta cayno mañacärinqui: ‘Jana pachacho caycaj Papä’” (Mateo 6:9). Mañacuycarla caycarga Jehovapitaga manami imapis raquichimäshunchu.

Imaycacunapitami Diostaga mañacunanchi y wiyamänanchipäga pay munashgannomi mañacunanchi. Chaymi Bibliapis nin: “Tayta Dios munashganno cananpaj imatapis manacuptinchiga mayamashganchitami musyanchi” (1 Juan 5:14). Jesuspis wilacurgan imacunapita mañacunapaj (leiriy Mateo 6:9-13). Jina ama gongashunchu ima chasquishganchipitapis Diosta agradecicunapaj; waquin runacunapäpis mañacuyculäshun.

2. ¿Imanotaj mañacushwan?

Diospa Palabran nimanchi “lapan shongunchiwan” Jehovata mañacunapaj (Salmo 62:8). Aumi, shongunchitami mashtapashwan. Jamashgapis o ichishgapis mañacushwanmi; jina yarpayninchilachopis o vozninchita jogarcurpis Diosninchita parlapashwanmi. Maycho caycarpis y imay hora captinpis wiyamäshunmi.

3. ¿Imanotaj Jehová mañacuyninchita contestamun?

Diosga Bibliawanmi oraciunninchicunata contestamanchi. “TAYTA DIOSPA palabranga yäracuypaj carmi yachayta gomanchi” (Salmo 19:7; leiriy Santiago 1:5). Laquesacunapa pasaptinchipis Jehovaga calpanta goycalämanchi ali caycänapaj, y hermanunchicunawanpis yanapämanchimi.

SHUMAJ YACHACURCUNAPAJ

Yachacushun imanotaj shongupita Diosta mañacushwan y chayno mañacushganchi imanotaj yanapämanchi.

4. Dios wilamanchi payta imano mañacunapaj

¿Imatataj rurashwan lapan mañacushganchita Dios chasquinanpaj? VIDEUTA ricapäcuy.

VIDEO: ¿Lapan oraciuncunatachu Dios wiyan? (waquilanla) (2:42)

Jehová munan paylata mañacunanchipaj. Leipäcuy Salmo 65:2 y caycunapita parlapacäriy:

¿Diosga munanchuraj paylata mañacunayquita? ¿Imanirtaj chayta ninqui?

Dios munashganno cawacunapaj calpachacuptinchega, payga oraciunninchicunataga wiyamäshunmi. Leipäcuy Miqueas 3:4 y 1 Pedro 3:12 y caypita parlapacäriy:

¿Imanopataj musyashwan oraciunninchicunata Dios wiyamashganchita?

Guerraman aywajcunaga ichanga Diosta mañacärinman marcan ganananpaj, ¿chayno oraciuncunataga Dios wiyangachuraj?

5. Lapan shongunchiwan mañacushun

Waquincunaga umachicushganlapita yaparir yaparir Diosta mañacärin. ¿Diosga wiyanchuraj chayno mañacuptinchi? Leipäcuy Mateo 6:7 y caypita parlapacäriy:

¿Imatataj rurashwan ‘chay palabralawan yaparir yaparir’ Diosta mana mañacunapaj?

Cuentata gocuy waran waran Dios imano yanapäshushgayquita agradecicunayquipaj. Chayta ruraptiquega manami juc ishcay cutilacho Diostaga mañacunqui, sinoga imaycacunapitapis mañacunayquipäna yachacaycanqui.

Cuyacoj taytacunaga shuyaran wamrancuna lapanta wilapänanpaj. Chaynolami Jehová Diospis munan shongupita lapanta wilapänanchita.

6. Diosta mañacushpanchega yanapämanchimi

¿Imanopataj oraciunga calpata gomanchi y imaycatapis aguantanapaj yanapämanchi? VIDEUTA ricapäcuy.

VIDEO: Diosta mañacushpanchiga calpantami gomanchi (1:32)

Biblia nimanchi oraciunga yanapacun mana laquicuycarla caycänapaj. Leipäcuy Filipenses 4:6, 7 y caycunapita parlapacäriy:

Diosta mañacurga manami shuyashwanchu problemanchicuna ilacänanta, ¿chauraga imanotaj yanapacun?
¿Imacunapitataj Diosta mañacunquiman?

¿Mayashcanquichu?

Amén niptinchega, “chayno cachun” niycanchi. Unay Diospa sirvejnincunapis mañacärishganta usharir “amén” nipäcoj (1 Crónicas 16:36).

7. Tiempuyquita camacächiy mañacunayquipaj

Öraga nitipacash caycanchi achca ruraycunawan, ¿pero imanotaj Jesusga tiempunta camacächej mañacunanpaj? Leipäcuy Mateo 14:23 y Marcos 1:35 y caycunapita parlapacäriy: