09 YACHACHIKUY
Diosmanta tukuy sonqo mañakuy
¿Munawaqchu pipas vidaykipi yanaparinasuykita? ¿Munawaqchu ima tapukusqaykitapas yachayta? ¿Munawaqchu pipas kallpacharinasuykita? ¿Munawaqchu Jehová Diospa amigon kayta? Chaypaqqa Diosmantan mañakunayki. Ichaqa, ¿imaynatan Diosmanta mañakuna? ¿Llapa runakunaq mañakusqankutachu Dios uyarin? ¿Imaynatan yachawaq mañakusqaykita Dios uyarishanchus icha manachus chayta? Chaykunamanta yachasun.
1. ¿Pimantan mañakunanchis? ¿Imakunamantan mañakusunman?
Señor Jesuspa nisqan jina, janaq pachapi kaq Taytallanchismantan mañakunanchis. Paypas Jehová Diosllamantan mañakurqan. Chaymi nirqan: “Qankunaqa khaynatan mañakunkichis: Taytayku janaq pachapi kaq...”, nispa (Mateo 6:9). Jehová Diosmanta mañakuspaqa amigontinmi paywan kasunchis.
Diosmanta mañakushaspaqa imatapas willakusunmanmi. Ichaqa mañakusqanchista uyariwananchispaqqa paypa munayninman jinan mañakunanchis. Bibliapin nishan: “Imataña Diospa munayninman jina mañakusunchis chaypas, Diosqa uyariwasunmi”, nispa (1 Juan 5:14). Jesusqa qatikuqninkunatan yachachirqan imakunamantachus mañakunkuman chayta (leey Mateo 6:9-13). Diosmanta mañakushaspaqa manan qonqananchischu llapa ima qowasqanchismanta gracias niyta, chaymantapas mañakunanchismi juj runakunata yanapananpaqpas.
2. ¿Imaynatan mañakunanchis?
Bibliapin nishan: “Sonqoykichista [Diosman] kichariychis”, nispa (Salmos 62:8). Chhaynaqa tukuy sonqowanmi Diosmantaqa mañakunanchis. Mañakusunmanmi alto kunkawanpas sonqollanchispipas. Sayaspaña, tiyaspaña mañakuspapas respetowanpunin mañakunanchis. Chaymantapas imay ratupas, maypi kashaspapas mañakusunmanmi.
3. ¿Imaynatan Dios kutichimun mañakusqanchisman?
Imaymana formamantan kutichimun, astawanqa simin qelqa Bibliawanmi. Diospa palabranqa “mana yachayniyoqtan yachayniyoqman tukuchin” (Salmos 19:7; leey Santiago 1:5). Sasachakuykunapi tarikuqtinchispas Jehová Diosqa thaj kaytan qoykuwanchis. Chaymantapas serviqninkunawanmi yanapachiwanchis.
ASTAWAN YACHASUNCHIS
Kaypin yachasunchis imaynatas tukuy sonqowan mañakusunman chayta, imaynatas Diosmanta mañakuy yanapawanchis chaytapas.
4. Diospa munayninman jinan mañakunanchis
¿Imatan ruwananchis Dios mañakusqanchista chaskiwananchispaq? VIDEOTA qhawaychis.
Jehová Diosqa munan payllamanta mañakunanchistan. Leeychis Salmos 65:2 textota, jinaspa jamuq tapuymanta parlariychis:
-
¿“Mañakusqata uyariq” Dios munanmanchu paymanta mañakunaykita? ¿Imarayku chhaynata piensanki?
Mañakusqanchista Dios uyarinanpaqqa kallpachakunanchismi kamachikuyninkunaman jina kausananchispaq. Leeychis Miqueas 3:4; 1 Pedro 3:12 textokunata, jinaspa jamuq tapuymanta parlariychis:
-
¿Imayna runan kananchis mañakusqanchista Dios uyarinanpaq?
Iskay t’aqa soldadokuna Diosmanta mañakunkuman guerrapi maqanakuspa atipanankupaq chayri, ¿uyarinmanchu Dios chay mañakusqankuta?
5. Mañakusqanchisqa sonqonchismantan lloqsinan
Askha runakunan umankupi jap’isqanku rezokunawan yapa-yapamanta Diosmanta mañakunku. ¿Ichaqa Diosta kusichinmanchu chay jina mañakuykuna? Leeychis Mateo 6:7 textota, jinaspa jamuq tapuyman jina parlariychis:
-
¿Imatan ruwananchis Diosmanta mañakushaspa ama “kaq simikunallatachu yapa-yapamanta” rimananchispaq?
¿Imakuna ruwapusqasuykimantan Diosta gracias niwaq? Sapa p’unchay Diospa juj ruwasqanpi piensay jinaspa chaymanta gracias niy. Chayta ruwanki chayqa, semanapi qanchis ruwaykunamantan Diosta gracias ninki, chhaynapin manaña kaq simikunallatachu rimanki.
Juj munakuq taytaqa munan wawan ama llullakuspa sonqonmanta imatapas willanantan. Kaqllataqmi Jehová Diospas sonqonchismanta mañakunanchista munan.
6. Allinninchispaqpunin Diosmanta mañakuyqa
Sasachakuykunapi tarikuqtinchis, ¿yanapawasunmanchu Diosmanta mañakuy? VIDEOTA qhawaychis.
Diosqa Bibliapin prometewanchis paymanta mañakuqtinchis thaj kayta qowananchispaq. Leeychis Filipenses 4:6, 7 textota, jinaspa jamuq tapuykunamanta parlariychis:
-
Manaña sasachakuyninchiskuna allichakunmanchu chaypas, ¿imaynatan Diosmanta mañakuy yanapawasunman?
-
¿Imakunamantan mañakuyta munawaq?
¿Yacharqankichu?
Amén simiqa “chhayna kachun” otaq “chhaynapunin” ninantan nin. Ñaupa tiempopipas Diosta serviqkunaqa “amén” niqkun mañakuyta tukuspa (1 Crónicas 16:36).
7. Diosmanta mañakunaykipaq tiempota t’aqay
Mayninpiqa imaymana ruwananchis kaqtinmi qonqapusunman Diosmanta mañakuyta. ¿Imaynatan Jesús qhawarirqan Diosmanta mañakuyta? Leeychis Mateo 14:23; Marcos 1:35 textokunata, jinaspa jamuq tapuykunamanta parlariychis:
-
¿Ima ratukunapin Jesús Diosmanta mañakuq?
-
Qanri, ¿imaynatan tiempota t’aqawaq Diosmanta mañakunaykipaq?
WAKIN RUNAKUNAN NINKU: “Yanqan Diosmanta mañakuyqa, payqa manan uyariwasunmanchu”, nispa.
-
Qanri ¿imaniwaqtaq chaymanta?
IMATAN YACHAMURQANCHIS
Tukuy sonqonchiswan Diosmanta mañakusunchis chayqa, astawanmi Diosman asuykusunchis. Chaymantapas Jehová Diosqa thaj kayta, kallpata iman qowasunchis paypa munayninta ruwananchispaq.
Yuyarisun
-
¿Pillamantan mañakunanchis?
-
¿Imaynatan mañakunanchis?
-
¿Imaynatan Diosmanta mañakuy yanapawasunman?
ASTAWAN YACHANAYKIPAQ
Kay qelqapin imaymanata yachanki Diosman mañakuymanta.
“Diosman mañakuymanta qanchis tapuykuna” (Qhawaq, 2010 watapi 1 octubre)
Kaypin yachanki imaraykus allinpuni Diosmanta mañakuy chayta, imaynatas mañakunayki chaytawan.
“¿Imaraykun allinpuni Diosmanta mañakuy?” (jw.org paginapi leey)
Kaypin yachanki pimantas mañakunanchis chayta.
“¿Allinchu kanman santokunaman mañakuy?” (jw.org paginapi leey)
Maypiña kashaspapas imay ratupipas Diosmantaqa mañakullasunmanmi, chaymantan kay taki rimashan.
Astawan yachanaykipaq
SAPA KUTILLA TAPUKUSQANKU
¿Imaynatan Jehová Diospa testigonkuna Bibliamanta yachachinku?
Jehová Diospa testigonkunawan Bibliata estudiaspaqa, munasqayki Bibliawanmi estudiawaq. Chaymantapas llapa familiaykita amigoykikunata iman invitawaq. Chayqa manan qolqepaqchu.
