Diosta mañacuynïqui allictam yanapaśhunqui. Diosta mañacunquimanmi cawsaynïquićhu yanapaśhunayquipä, sasachacuynïqui captin, jucmanyaśha captiqui, ñatac Diosman masta aśhuycunayquipä. Pero, ¿imanuypam mañacunanchic? ¿Dios uyalinchućh llapa mañacuyninchicta? ¿Imanuypam yaćhanchic mañacuyninchicta Dios uyaliśhanta? Chaycunacta cayćhumi yaćhaśhun.

1. ¿Mayantam mañacunanchic? ¿Imacunapimi mañacuchwan?

Jesusmi yaćhachimalanchic Taytanchic Jehovallacta mañacunanchicpä. Quiquinpis Taytanta mañaculmi nila: “Cielućhu cä Taytanchic…” (Mateo 6:9, TNM). Jehovata mañacuptinchic payta mastam cuyanchic, paypis mastam cuyamäśhun.

Dioswan imacunactapis limachwanmi. Uyalimananchicta munal’a paypä munaśhantanümi mañacunanchic. Bibliaćhupis ninmi: “Payman chalapacul munaśhanmannuy mañacü aśhuycuptinchic uyaliycamänanchicta yaćhanchicmari” (1 Juan 5:14). Jesús yaćhachimalanchicmi imacunacta mañacunanchicpä (liguicuy Mateo 6:9-13). Diosta oracul manam munaśhallanchictachu mañacunanchic, agradecicuchwantacmi lluy ima umaśhanchiccunapi, nunamasinchicpäpis mañacunanchicmi.

2. ¿Imanuypam Jehovata mañacunanchic?

Bibliaćhu nimanchicmi Diosta mañacunqui: “Llapan śhun’unchicwanmi mañacunanchic” (Salmo 62:8, TNM). Jehová Diosta mañacuchwanmi śhun’ullanchicćhupis, limaywanpis, śhacuyalpis, täcuyalpis o un’ulacuyculpis pero respetuwanmi. Mañacuchwantacmi imay horapis ñatac mayćhu cayalpis.

3. ¿Imanuypam mañacuyninchicta Dios cutichimanchic?

Jehová Dios cutichimanchic Biblia nishanwanmi. Jehová willamanchictacmi Bibliawan imactapis yaćhayta munaśhanchicta. Bibliata liguil “yaćhayniyü cananchicpämi” yanapamanchic (Salmo 19:7, TNM; liguicuy Santiago 1:5). Sasachacuyćhu captinchic śhun’unchicta jawcayächimanchicmi. Jehová yanapamanchictacmi hermanunchiccunawan.

 IMACTAM YAĆHALUNCHIC

Diosta mañacunanchicmi lluy śhun’unchicwan, chaymi yanapamäśhun jawca cäcunanchicpä ñatac cawsacunanchicpä Diospa munaśhanmannü.

Yalpaśhun

• ¿Mayantam mañacunanchic?

• ¿Imanuypam mañacunanchic?

• Jehovata mañacuyca, ¿imanuypam yanapaśhunqui?