LEKCIJA 9
Te vakereha le Devleha, mek buter les kameha
Sas tuke varekana phares a rodehas, ko tut podhazdela? Ačhiľa pes tuke, hoj na džanehas, so te kerel dureder? Phučľal varekana: „Soske pes oda ačhiľa“? Kamľalas mek buter rado te dikhel le Jehovas? Pre ada savoro, pomožinela, te vakereha le Jehovaha. Aľe sar leha kampel te vakerel? Šunel o Del avri sakones, ko leha vakerel? Sar tuke šaj aves isto, hoj o Del šunel avri the tut? Akana dikhaha.
1) Ke kaste džan amare modľitbi? Pal soste leha vakeras?
O Ježiš sikhľarelas, hoj pes modľinas ča ke amaro ňebesko Dad. The o Ježiš pes modľinelas ko Jehovas. Ov phenďa: „Modľinen tumen avka: ‚Dado amaro, so sal andro ňebos ...‘“ (Matúš 6:9) Te vakeras le Jehovaha, mek buter les kamas.
Šaj leha vakeras pal savoreste. Aľe, kaj amen o Jehovas te šunel avri, kampel te džanel, sar ov dikhel pre oda, pal soste les mangas. „O Del amen šunel, te les mangas pal oda, so hin leskeri voľa.“ (1. Jána 5:14) O Ježiš amenge sikaďa, pal soste pes šaj modľinas. (Pregen Matúš 6:9–13) Šaj leske phenas, so predživas. Aľe na bisteras leske te paľikerel vaš sa, so predal amende kerel. A tiš mangas vaš aver džene, mi lenge pomožinel.
2) Sar leha kampel te vakerel?
E Biblija phenel „čhoren avri angle leste [anglo Del] oda, so tumen hin andro jilo.“ (Žalm 62:8) Vaker leha jilestar. Šaj oda keres ča andre peste, abo kaj tut te šunďol. Hin jekh či terďos, abo bešes, aľe ker oda la paťivaha. Šaj leha vakeres kana kames a kaj kames.
3) Sar o Del sikavel, hoj amen šunel avri?
Kerel oda prekal e Biblija. Odoj šaj arakhas leskere goďaver lava, save amenge kampel. Te genel le Devleskero lav šaj „[kerel] manušendar, so but na džanen, goďaver.“ (Žalm 19:7; pregen Jakub 1:5) Tiš amen šunel avri avka, hoj amen del smirom pro jilo, te sam andro pharipena. A tiš bičhavel peskere služobňiken, kaj prekal lende varekaske te pomožinel.
DODŽAN TUT BUTER
Kana tire modľitbi kerena le Devleske radišagos? So lačho tuke anela oda, te vakereha le Devleha?
4) Kana le Devleske kerena amare modľitbi radišagos?
Kana amen o Del šunela avri? Mukh o VIDEJO.
O Jehovas kamel, kaj leha te vakeras. Pregen Žalm 65:2 a vakeren jekhetane:
-
So phenes, kamel o Del, kaj the tu leha te vakeres? Soske?
Te amen dživas avka sar kamel o Jehovas, sam peske ista, hoj šunela amare modľitbi. Pregen Micheáš 3:4 the 1. Petra 3:12 a vakeren jekhetane:
-
Soske šaj paťas, hoj o Del šunel avri amare modľitbi?
Sar hin o mariben, soduj seri pes modľinen, kaj te vihrajinen. Šaj užaren, hoj len o Del šunela avri?
5) Vaker le Jehovaha jilestar
Vareko sikhľiľa ča modľitbi, save džanen lav lavestar. Aľe kamel o Del, kaj pes avka te modľinas? Pregen Matúš 6:7 a vakeren jekhetane:
-
So šaj keres, kaj andre modľitba „te na vakeres furt a furt oda isto“?
Sako ďives dikh pre oda, so lačho tuke o Del diňa a paľis leske vaš ada paľiker. Te kada kereha calo kurko, paľikereha leske vaš 7 lačhipena. Tire modľitbi ena šukar a na vakereha furt oda isto.
Lačho dad kamel, kaj leske o čhavoro te phenel, so les hin pro jilo. The o Jehovas kamel, kaj leske andre modľitba te phenas sa, so amen hin pro jilo
6) Modľitba – baro daros le Devlestar
Sar amenge e modľitba del zor akor, kana aven o pharipena? Mukh o VIDEJO.
La Biblijatar džanas, hoj prekal e modľitba chudaha smirom pro jilo. Pregen Filipanom 4:6, 7 a vakeren jekhetane:
-
Sar amenge e modľitba pomožinel, choč amare pharipena na musaj takoj (minďar) te preačhel?
-
So kames tu te phenel le Jehovaske andre modľitba?
Džanehas?
Andre modľitba phenas pro agor o lav „amen“. Oda hin: „Mi ačhel pes“, abo tiš „avka hin.“ Andre čirlatuňi doba le Devleskere služobňika tiš pro agor la modľitbake phenenas „amen“. (1. Kroník 16:36)
7) Ma bister te vakerel le Jehovaha
Varekana hin pre amende ajci but, hoj bisteras te vakerel le Jehovaha. Sar o Ježiš dikhelas pre modľitba? Pregen Matúš 14:23 the Marek 1:35 a vakeren jekhetane:
-
So kerelas o Ježiš, kaj peske te arakhel o časos pre modľitba?
-
Tuke hin kana nekfeder časos te vakerel le Jehovaha?
VAREKO ŠAJ PHENEL: „Mangav le Devles ča akor, sar mange phares.“
-
So phenďalas varekaske pre ada?
SO SIKHĽIĽAM
Kana vakeras le Jehovaha, mek buter les kamas. Hin amen smirom pro jilo a chudas zor te kerel leske radišagos.
So bi phenehas
-
Ča ke kaste pes modľinas?
-
Sar kamas te vakerel le Jehovaha?
-
So lačho tuke oda anela, te vakereha le Jehovaha?
DIKH TUKE BUTER
Pregen tuke, so vareko phučel pal e modľitba.
„Sedem vecí, ktoré by ste mali vedieť o modlitbe“ (Strážna veža z 1. októbra 2010)
Pregen tuke, soske kampel te vakerel le Devleha a sar ada šaj keras mek feder.
Pregen tuke, so phenel e Biblija či pes šaj modľinas ko sochi.
Šun andre giľi, kana a kaj pes šaj modľinas.
Dikh the pre ada
SO O MANUŠA KAMEN TE DŽANEL
So oda hin te sikhľol la Biblijatar?
Te kavka sikhľona la Biblijatar le Jehovaskere svedkenca, šaj genen andal e Biblija, savi tumen kamen. Šaj vičinen la fajta, le kamaraten abo kas kamen.
