ЛЕКЦИЈА 09
Ов попаше е Јеховаја преку и молитва
Дали некогаш ваљанѓа туке водство ко живото? Дали иси тут несаве важна пучиба коленге со мангеа те џане о одговор? Дали ваљани туке утеха хем мир? Дали мангеа те ове попаше е Јеховаја? Ко са акала буќа шај те поможинел туке и молитва. Ама, кова тано о исправно начин те молина амен? Дали о Девел шунела са о молитве? Сар шај те ове сигурно кај ов шунела тле молитве? Те дикха.
1. Каске ваљани те молина амен, хем башо со шај те молина амен?
О Исус сикавѓа кај ваљани те молина амен само амаре Дадеске ко небо. О Исус да молинѓа пе само е Јеховаске. Ов вакерѓа: „Молинен тумен аѓаар: ’Амаро Дад со сиан ко небо... ‘“ (Матеј 6:9). Кеда молинаја амен е Јеховаске амаро амалипе леа овела позорало.
Амен шај те молина амен баши секоја бути. Џанѓола пе, о Девел ка шунел амаре молитве само ако тане спрема лескири волја. И Библија вакерела: „Било со те рода, ако тано спрема [е Девлескири] волја, ов шунела амен“ (1. Јованово 5:14). О Исус вакерѓа башо кола буќа шај те молина амен. (Читин Матеј 6:9-13.) Освен со шај те молина амен башо лична буќа, на ваљани те бистра те благодарина е Девлеске башо буќа со керѓа лен аменге хем те молина ле те поможинел е јаверенге.
2. Сар ваљани те молина амен?
И Библија поттикнинела амен те пхрава амаро вило англо Девел (Псалм 62:8). Адава значинела кај амаре молитве ваљани те овен искрена хем таро вило. Амен шај те молина амен ко гласо или ки аменде, ко секова време хем ко секова тхан. Дали ваљани те ова ки несави посебно положба кеда молинаја амен? О Јехова на родела амендар те пера ко кочака, те беша или те терѓова кеда молинаја амен. Најважно тано те сикава поштовање спрема лесте.
3. Сар о Девел одговоринела ко амаре молитве?
Ов керела адава ко различна начинија. О Јехова денѓа амен пло Лафи, и Библија, коте со бут пути аракхаја о одговорија ко амаре пучиба. О читибе е Девлескоро Лафи „керела мудро околе со нане искусно“. (Псалм 19:7; читин Јаков 1:5.) Ов шај те дел амен андруно мир кеда иси амен проблемија. Исто аѓаар, ов шај те поттикнинел пле слуген те поможинен аменге кеда чаче ваљани адава.
ДОЗНАЈН ПОВИШЕ
Дикх сар шај те молине тут ко начин сар со мангела о Девел хем сар и молитва шај те поможинел туке.
4. Кола молитве прифатинела о Девел?
Сој тано важно ако мангаја о Девел те прифатинел амаре молитве? Дикх о ВИДЕОКЛИПИ.
О Јехова мангела те молина амен леске. Читин Псалм 65:2, а пало адава керен лафи башо акава пучибе:
-
Адалеске со о Девел тано „адава со шунела о молитве“, со мислинеа, дали ов мангела ту те молине тут леске?
Ако мангаја о Девел те шунел амаре молитве, мора те трудина амен те живина спрема лескере мерилија. Читин Михеј 3:4 хем 1. Петрово 3:12, а пало адава керен лафи башо акава пучибе:
-
Сар шај те ова сигурна кај о Јехова ка шунел амаре молитве?
Ки војна солдуј стране молинена пе те побединен. Дали тано логично те очекујна кај о Девел ка шунел асавке молитве?
5. Амаре молитве ваљани те авен таро вило
Несаве мануша сине сикавде те молинен пе аѓаар со ка повторинен са о иста лафија или те молинен пе ки чхиб со на хаљовена ла. Ама, дали о Девел мангела те молина амен аѓаар? Читин Матеј 6:7, а пало адава керен лафи башо акава пучибе:
-
Сар шај те избегине те вакере секогаш о иста буќа ко тле молитве?
Секова диве шај те размислине баши јекх шукар бути со добинѓан ла таро Јехова хем те благодарине леске башо адава. Ако кереа адава секова диве ко курко, ту ка молине тут башо ефта различна буќа.
Јекх шукар дад мангела лескоро чхаво те керел леа лафи искрено. Исто аѓаар, о Јехова мангела те молина амен леске таро вило
6. И молитва тани поклон таро Девел
Сар шај и молитва те дел амен сила, посебно кеда аменге пхаро ко живото? Дикх о ВИДЕОКЛИПИ.
И Библија вакерела кај и молитва шај те дел амен андруно мир. Читин Филипјаните 4:6, 7, а пало адава керен лафи башо акала пучиба:
-
Сар поможинела аменге и молитва, иако на цидела секогаш амаре проблемија?
-
Башо кола буќа ту би мангеа те молине тут?
Дали џанљан?
О лафи „амин“ значинела „аѓаар те овел“ или „аѓаар тано“. Панда таро библиско време, о лафи „амин“ вакерела пе ко крајо таро молитве (1. Летописи 16:36).
7. Одвојн туке време те молине тут
Понекогаш сием добором бут зафатиме со бистраја те молина амен. Кобор важно сине е Исусеске и молитва? Читин Матеј 14:23 хем Марко 1:35, а пало адава керен лафи башо акала пучиба:
-
Со керѓа о Исус те шај те овел ле време баши молитва?
-
Кеда ту шај те одвојне туке време те молине тут?
НЕСАВЕ ШАЈ ВАКЕРЕНА: „Нане важно каске молинеа тут хем сар, о Девел шунела са о молитве“.
-
Со ка вакере ту?
СО СИКЛИЛЕМ
О молитве таро вило керена амен попаше е Девлеа, дена амен андруно мир хем дена амен сила те ова послушна е Јеховаске.
Сар ка одговорине?
-
Каске ваљани те молина амен?
-
Сар ваљани те молина амен?
-
Сар поможинела аменге и молитва?
ИСТРАЖИН
Дознајн о одговорија башо пучиба со често пучена пе о мануша баши молитва.
„Седум важни работи за молитвата“ (Стражарска кула таро 1 октомври 2010)
Сикљов соске ваљани те молине тут хем сар шај тле молитве те овен пошукар.
Дикх со сикавела и Библија башо адава каске ваљани те молина амен.
Ко акава музичко споти дикх дали тано важно коте или кеда молинаја амен.
Шај исто ка интересинел тут
НАЈЧЕСТА ПУЧИБА
Сар изглединела о библиско курси со нудинена е Јеховаскере сведокија?
Џикоте икерела пе о бесплатно библиско курси, шај те користине било кова превод тари Библија. Ко курси шај те канине некас тари тли фамилија или несаве амале.
