LEKCIJA 09
Ov popaše e Jehovaja preku i molitva
Dali nekogaš valjangja tuke vodstvo ko životo? Dali isi tut nesave važna pučiba kolenge so mangea te džane o odgovor? Dali valjani tuke uteha hem mir? Dali mangea te ove popaše e Jehovaja? Ko sa akala bukja šaj te pomožinel tuke i molitva. Ama, kova tano o ispravno način te molina amen? Dali o Devel šunela sa o molitve? Sar šaj te ove sigurno kaj ov šunela tle molitve? Te dikha.
1. Kaske valjani te molina amen, hem bašo so šaj te molina amen?
O Isus sikavgja kaj valjani te molina amen samo amare Dadeske ko nebo. O Isus da molingja pe samo e Jehovaske. Ov vakergja: „Molinen tumen agjaar: ’Amaro Dad so sian ko nebo... ‘“ (Matej 6:9). Keda molinaja amen e Jehovaske amaro amalipe lea ovela pozoralo.
Amen šaj te molina amen baši sekoja buti. Džangjola pe, o Devel ka šunel amare molitve samo ako tane sprema leskiri volja. I Biblija vakerela: „Bilo so te roda, ako tano sprema [e Devleskiri] volja, ov šunela amen“ (1. Jovanovo 5:14). O Isus vakergja bašo kola bukja šaj te molina amen. (Čitin Matej 6:9-13.) Osven so šaj te molina amen bašo lična bukja, na valjani te bistra te blagodarina e Devleske bašo bukja so kergja len amenge hem te molina le te pomožinel e javerenge.
2. Sar valjani te molina amen?
I Biblija pottikninela amen te phrava amaro vilo anglo Devel (Psalm 62:8). Adava značinela kaj amare molitve valjani te oven iskrena hem taro vilo. Amen šaj te molina amen ko glaso ili ki amende, ko sekova vreme hem ko sekova than. Dali valjani te ova ki nesavi posebno položba keda molinaja amen? O Jehova na rodela amendar te pera ko kočaka, te beša ili te tergjova keda molinaja amen. Najvažno tano te sikava poštovanje sprema leste.
3. Sar o Devel odgovorinela ko amare molitve?
Ov kerela adava ko različna načinija. O Jehova dengja amen plo Lafi, i Biblija, kote so but puti arakhaja o odgovorija ko amare pučiba. O čitibe e Devleskoro Lafi „kerela mudro okole so nane iskusno“. (Psalm 19:7; čitin Jakov 1:5.) Ov šaj te del amen andruno mir keda isi amen problemija. Isto agjaar, ov šaj te pottikninel ple slugen te pomožinen amenge keda čače valjani adava.
DOZNAJN POVIŠE
Dikh sar šaj te moline tut ko način sar so mangela o Devel hem sar i molitva šaj te pomožinel tuke.
4. Kola molitve prifatinela o Devel?
Soj tano važno ako mangaja o Devel te prifatinel amare molitve? Dikh o VIDEOKLIPI.
O Jehova mangela te molina amen leske. Čitin Psalm 65:2, a palo adava keren lafi bašo akava pučibe:
-
Adaleske so o Devel tano „adava so šunela o molitve“, so mislinea, dali ov mangela tu te moline tut leske?
Ako mangaja o Devel te šunel amare molitve, mora te trudina amen te živina sprema leskere merilija. Čitin Mihej 3:4 hem 1. Petrovo 3:12, a palo adava keren lafi bašo akava pučibe:
-
Sar šaj te ova sigurna kaj o Jehova ka šunel amare molitve?
Ki vojna solduj strane molinena pe te pobedinen. Dali tano logično te očekujna kaj o Devel ka šunel asavke molitve?
5. Amare molitve valjani te aven taro vilo
Nesave manuša sine sikavde te molinen pe agjaar so ka povtorinen sa o ista lafija ili te molinen pe ki čhib so na haljovena la. Ama, dali o Devel mangela te molina amen agjaar? Čitin Matej 6:7, a palo adava keren lafi bašo akava pučibe:
-
Sar šaj te izbegine te vakere sekogaš o ista bukja ko tle molitve?
Sekova dive šaj te razmisline baši jekh šukar buti so dobingjan la taro Jehova hem te blagodarine leske bašo adava. Ako kerea adava sekova dive ko kurko, tu ka moline tut bašo efta različna bukja.
Jekh šukar dad mangela leskoro čhavo te kerel lea lafi iskreno. Isto agjaar, o Jehova mangela te molina amen leske taro vilo
6. I molitva tani poklon taro Devel
Sar šaj i molitva te del amen sila, posebno keda amenge pharo ko životo? Dikh o VIDEOKLIPI.
I Biblija vakerela kaj i molitva šaj te del amen andruno mir. Čitin Filipjanite 4:6, 7, a palo adava keren lafi bašo akala pučiba:
-
Sar pomožinela amenge i molitva, iako na cidela sekogaš amare problemija?
-
Bašo kola bukja tu bi mangea te moline tut?
Dali džanljan?
O lafi „amin“ značinela „agjaar te ovel“ ili „agjaar tano“. Panda taro biblisko vreme, o lafi „amin“ vakerela pe ko krajo taro molitve (1. Letopisi 16:36).
7. Odvojn tuke vreme te moline tut
Ponekogaš siem doborom but zafatime so bistraja te molina amen. Kobor važno sine e Isuseske i molitva? Čitin Matej 14:23 hem Marko 1:35, a palo adava keren lafi bašo akala pučiba:
-
So kergja o Isus te šaj te ovel le vreme baši molitva?
-
Keda tu šaj te odvojne tuke vreme te moline tut?
NESAVE ŠAJ VAKERENA: „Nane važno kaske molinea tut hem sar, o Devel šunela sa o molitve“.
-
So ka vakere tu?
SO SIKLILEM
O molitve taro vilo kerena amen popaše e Devlea, dena amen andruno mir hem dena amen sila te ova poslušna e Jehovaske.
Sar ka odgovorine?
-
Kaske valjani te molina amen?
-
Sar valjani te molina amen?
-
Sar pomožinela amenge i molitva?
ISTRAŽIN
Doznajn o odgovorija bašo pučiba so često pučena pe o manuša baši molitva.
„Sedum važni raboti za molitvata“ (Stražarska kula taro 1 oktomvri 2010)
Sikljov soske valjani te moline tut hem sar šaj tle molitve te oven pošukar.
Dikh so sikavela i Biblija bašo adava kaske valjani te molina amen.
Ko akava muzičko spoti dikh dali tano važno kote ili keda molinaja amen.
Šaj isto ka interesinel tut
NAJČESTA PUČIBA
Sar izgledinela o biblisko kursi so nudinena e Jehovaskere svedokija?
Džikote ikerela pe o besplatno biblisko kursi, šaj te koristine bilo kova prevod tari Biblija. Ko kursi šaj te kanine nekas tari tli familija ili nesave amale.
