ΜΑΘΗΜΑΣ 09
Η Προσευχή Ανέλα-τουτ Πασέ κο Ντεβέλ
Μανγκλάν καέκ φαρ τι σικαβέλ τούκε κάποιος σο τι κερές; Τθερέσα σημαντικά ερωτήματα σο μανγκέσα τι λες απαντήσεις; Μήπως μανγκλάν κάποιος τι λοκχιαρέλ το γκι; Μανγκέσα τι αβές πο πασέ κο Ιεχωβά; Η προσευχή κα βοηθίνελ-τουτ σαρέ ανταλέντε. Αλλά σαρ πρέπει τι προσευχίντιβες; Ασουνέλα ο Ντεβέλ σαρέ ο προσευχές; Σο μπορίνεσα τι κερές για τι αβές σίγουρος ότι ασουνέλα τιρέ προσευχές; Για τι ντικχάς.
1. Κάστε πρέπει τι προσευχίντιβας ντα καλέ πραγματένγκε μπορίνασα τι προσευχίντιβας;
Ο Ιησούς σικλιαρντάς-αμέν ότι πρέπει τι προσευχίντιβας σάντε αμαρέ Νταντέστε σο ισί κο ουρανός. Ο Ιησούς-ντα προσευχίντιβελας κο Ιεχωβά. Βακερντάς: «Αντικάς πρέπει τι προσευχίντιβεν: “Ντάντε σο ισινάν κο ουρανός . . . ”» (Ματθαίος 6:9) Κάνα προσευχίντιβασα κο Ιεχωβά αβάσα πο λατσσέ αμαλά λέσαρ.
Μπορίνασα τι προσευχίντιβας σαρέ ι πραγματένγκε. Όμως, για τι απαντίνελ ο Ντεβέλ αμαρέ προσευχιέντε, πρέπει τι συμφωνίνεν οντουλέσαρ σο μανγκέλα βοβ. «Σο-ντα τι μανγκάς λέσταρ ντα συμφωνίνελα οντουλέσαρ σο μανγκέλα [ο Ντεβέλ], βοβ ασουνέλα-αμέν». (1 Ιωάννη 5:14) Ο Ιησούς βακερντάς καλέ πραγματένγκε μπορίνασα τι προσευχίντιβας. (Διαβάνεν Ματθαίος 6:9-13) Αμαρέ προσευχιέντε βακεράσα σο απασχολίνελα-αμέν, αλλά δεν πρέπει τι μπιστράς-ντα τι βακεράς ευχαριστώ ι Ντεβλέσκε οντουλένγκε σο κερντάς αμένγκε ντα τι μανγκάς λέσταρ τι βοηθίνελ ι γιαβερέν.
2. Σαρ πρέπει τι προσευχίντιβας;
Η Γραφή βακερέλα αμένγκε “τι πουτράς αμαρό γκι [κο Ντεβέλ]”. (Ψαλμός 62:8) Άρα, αμαρέ προσευχές πρέπει τι νικιόν αντράλ αμαρέ γκίσταρ. Μπορίνασα τι προσευχίντιβας αβριάλ ή αντρ’ αμένταρ ντα να τθερέλα σημασία σαρ μπεσάσα, ο σημαντικός ισί τι σικαβάς σεβασμός. Μπορίνασα τι προσευχίντιβας κάνα μανγκάσα ντα κάι-ντα τι αβάς.
3. Σαρ απαντίνελα ο Ντεβέλ αμαρέ προσευχιέντε;
Απαντίνελα μπουτέ τροπόντζαρ. Ο Ιεχωβά ντινάς-αμέν πο Λάφι, ι Αγία Γραφή, ντα οτθέ αρακχάσα απαντήσεις αμαρέ ερωτησιέντε. Ο διάβασμας κατά Λάφι ι Ντεβλέσκο, μπορίνελα τι κερέλ «οντουλέν σο να τζανένα μπουτ πράγματα τι αβέν γκοντιαβέρ». (Ψαλμός 19:7· διαβάνεν Ιακώβου 1:5) Ο Ιεχωβά μπορίνελα τι ντελ-αμέν ειρήνη αμαρέ γκοντιάτε κάνα νακχάσα προβλήματα. Ντα μπορίνελα τι κερέλ πι υπηρετόν τι βοηθίνεν-αμέν αζομάν σο τθεράσα-λες μπαγιά ανάγκη.
ΧΑΝΤΖΟΥΒ ΠΟ ΑΧΟΡΤ
Ντικχ σαρ μπορίνενα το προσευχές τι κερέν ο γκι ι Ντεβλέσκο ντα σίκλιουβ σαρ μπορίνελα τι βοηθίνελ-τουτ η προσευχή.
4. Ο Ντεβέλ μανγκέλα αμένταρ κάποια πράγματα για τι ασούντιβεν αμαρέ προσευχές
Καλά προσευχές ασουνέλα ο Ντεβέλ ντα καλά να ασουνέλα; Ντικχέν ο ΒΙΝΤΕΟΣ.
Ο Ιεχωβά μανγκέλα τι προσευχίντιβας λέστε. Διαβάνεν Ψαλμός 65:2 ντα σοράν συζητίνεν ο ερωτήσεις:
-
Πακιάσα ότι “Οντουβά σο ασουνέλα προσευχή” μανγκέλα τι προσευχίντιβες τούι-ντα λέστε; Σόσκε βακερέσα-λες ανταβά;
Πρέπει τι κεράς ο πο λατσσό για τι τζουβντιάς σαρ βακερένα ο κανόνες ι Ντεβλέσκε άμα μανγκάσα τι ασουνέλ ο Ντεβέλ αμαρέ προσευχές. Διαβάνεν Μιχαίας 3:4 ντα 1 Πέτρου 3:12 ντα σοράν συζητίνεν ι ερώτηση:
-
Σαρ μπορίνασα τι αβάς σίγουροι ότι ο Ιεχωβά ασουνέλα αμαρέ προσευχές;
Εκχέ τζενγκίστε, ο ντούι-ντα μπάντες μπορεί τι προσευχίντιβεν για τι νικίνεν. Σαρ αβέλα-πες ο Ντεβέλ τι ασουνέλ ασακέ προσευχές;
5. Αμαρέ προσευχές πρέπει τι νικιόν αντράλ αμαρέ γκίσταρ
Ισί τζενέ σο σικλιλέ τι κερέν προσευχές ντα τι «βακερέν ο ίδια ντα ο ίδια λάφια». Αλλά αντικάς μανγκέλα ο Ντεβέλ τι προσευχίντιβας; Διαβάνεν Ματθαίος 6:7 ντα σοράν συζητίνεν ι ερώτηση:
-
Σαρ μπορίνεσα τι προσευχιέντε μα τι “βακερές ο ίδια ντα ο ίδια λάφια”;
Κάθε ντιβές, μπορίνεσα τι σκεφτίνες κάτι λατσσό σο τθερέσα τι ζωγιάτε ντα σοράν τι ευχαριστίνες ι Ιεχωβάς ανταλέσκε. Άμα κα σκεφτίνες κάθε ντιβές κάτι γιαβέρ για τι ευχαριστίνες ι Ιεχωβάς, αντρέ εκχέ εβδομαδάτε κα προσευχίντιβες εφτά διαφορετικέ πραγματένγκε χωρίς τι βακερές ο ίδια ντα ο ίδια λάφια.
Εκ λατσσό ντατ μανγκέλα πι τσσαβέσταρ τι πουτρέλ πο γκι λέστε. Αντικάς ο Ιεχωβά-ντα μανγκέλα κάνα προσευχίντιβασα τι πουτράς αμαρό γκι λέστε
6. Η προσευχή ισί δώρος κατά Ντεβέλ
Σαρ μπορίνελα η προσευχή τι ντελ-αμέν ζορ εμ κάνα τζάνα λατσσές ο πράγματα εμ κάνα να τζάνα λατσσές; Ντικχέν ο ΒΙΝΤΕΟΣ.
Η Γραφή βακερέλα ότι η προσευχή μπορίνελα τι βοηθίνελ-αμέν τι αρακχάς μπαγιά ειρήνη αμαρέ γκοντιάτε. Διαβάνεν Φιλιππησίους 4:6, 7 ντα σοράν συζητίνεν ο ερωτήσεις:
-
Σαρ βοηθίνελα-αμέν η προσευχή παρόλο σο να νασκιαρέλα πάντα αμαρέ προβλήματα;
-
Τούι, καλέ πραγματένγκε μανγκέσα τι προσευχίντιβες;
Τζανέας-λες;
Η λέξη «αμήν» μανγκέλα τι βακερέλ «αντικάς τι αβέλ-πες» ή «σίγουρα». Κατά πουρανέ μπρεσά ο «αμήν» βακέρντιβελας κο τέλος κι προσευχιάκο.—1 Χρονικών 16:36.
7. Τι αρακχές σαάτι για τι προσευχίντιβες
Μπάζιμα, μπορεί τι κεράς αζόμ μπουτ πράγματα σο μπιστράσα τι προσευχίντιβας. Καζόμ σημαντική ισινέ η προσευχή ι Ιησούσκε; Διαβάνεν Ματθαίος 14:23 ντα Μάρκος 1:35 ντα σοράν συζητίνεν ο ερωτήσεις:
-
Σο κερντάς ο Ιησούς για τι αρακχέλ σαάτι τι προσευχίντιβελ;
-
Τούι, κάνα κα μπορίνεας τι αρακχές σαάτι για τι προσευχίντιβες;
ΜΕΡΙΚΑ ΤΖΕΝΕ ΒΑΚΕΡΕΝΑ: «Η προσευχή βοηθίνελα-αμέν σάντε τι νιωθίνας σουκάρ αντρ’ αμένταρ».
-
Σο κα βακερέας ανταλέσκε;
ΧΑΝΙΚ ΛΑΦΙΝΤΖΑΡ
Ο προσευχές σο κεράσα αντράλ αμαρέ γκίσταρ ανένα-αμέν πο πασέ κο Ντεβέλ, πφερένα ειρήνη αμαρί γκοντί ντα ντένα-αμέν ζορ για τι κεράς ο γκι ι Ιεχωβάσκο.
Σο Σικλιλάν;
-
Κάστε πρέπει τι προσευχίντιβας;
-
Σαρ πρέπει τι προσευχίντιβας;
-
Καλά ισί μερικά λατσσίματα σο ανέλα αμένγκε η προσευχή;
ΡΟΝΤΕ
Αράκχ απαντήσεις κο ερωτήσεις σο κερένα μπουτ τζενέ ι προσευχιάκε.
«Εφτά Πράγματα σο Πρέπει τι Τζανέν ι Προσευχιάκε» (Η Σκοπιά 1 Οκτωβρίου 2010)
Σίκλιουβ σόσκε πρέπει τι προσευχίντιβες ντα σαρ μπορίνεσα τι κερές πο λατσσέ το προσευχές.
«Σόσκε Πρέπει τι Προσευχίντιβαβ;» (Θέμας κο ιστότοπος)
Ντικχ κάστε βακερέλα η Γραφή ότι πρέπει τι προσευχίντιβας.
«Μπορίνασα τι Προσευχίντιβας κο Άγιοι;» (Θέμας κο ιστότοπος)
Ανταλέ μουσικέ βιντεόστε, ντικχ άμα τθερέλα σημασία κατέ ή κάνα προσευχίντιβασα.
