LEKTIONA 09

Te mangeh, well tiro malepen o Debleha sorleder

PLAY

Das pash tute i tsiro, kai kamal, te wals jek ap tiri rig, te nai less lestar i latcho lab? Hi tut bare putchepena, ap hoi tu kamals o tchatchepen te djinell? Kamals tu, te wess i feteder maal o Deblestar? Pash kowa halauter hi tuke o mangepen mishto. Un har mangas? Shunell o Dewel ap hakeneskro mangepen? Hoi hunte kress tu, te nai shunell lo tiro mangepen? Dikas.

1. Kones mangas an, un pal hoi nai mangah?

O Jesus mangas peskro dades an, kai an o bolepen hi. Un ap peskre malende penas job, te mangenn le kokres ap i Jehoweste. Job penas: “Tumer te rakrenn o Debleha, penenn: Maro dad an o bolepen …” (Mateo 6:9). Mer te rakrah an o mangepen i Jehoweha, well maro malepen leha sorleder.

Nai mangah mer pal halauter? Te hi kowa an i Debleskre jaka mishto, palle nai mangah pal kowa. “Te mangah o Deblestar tchomone, jaake har job kowa kamella, jaake shunell lo men” (1. Johanni 5:14). O Jesus penas menge, pal hoi nai mangah (Dik pal an Mateo 6:9-13). Mer nai penah leske kowa, hoi men ap o dji hi. Hoi te bistras gar? Te parkras men ninna pash o Debleste un te mangas les, te hi lo wawarenge koi.

2. Har mangas?

I bibla penell menge: “Tchorenn tumare djia win glan leste” (Gilja 62:8, 9). Jaake haiwah, te rakrah i Debleha an o mangepen, hunte well kowa dran maro dji. I mangepen nai penah mer maro mujeha oder tchorchanes an o dji. An haki positiona, hoi respekt glan i Jehoweste sikrella, nai mangah. Hi jek, kai ham, mer nai mangah an hako tsiro.

3. Har sikrell o Dewel, kai shunas lo maro mangepen?

Denn budeder droma, har job kowa krella. O Jehowah das menge peskro lab, i bibla, kai nai hatsah kowa, hoi mer men putchah. Te drawerah an o Debleskro lab, wah mer gosewo, ninna te djinah tchomone gar (Gilja 19:7, 8; dik pal an Jakobo 1:5). Job nai krell maro dji pokones, te hi pharo koowa ap mende. Job nai bitchrell menge ninna wawaren, te wenn le menge koi.

RODAS DUREDER

Kanna dikeh, hoi o Dewel kamella, har te mangas un hoi o mangepen tuha nai krella.

4. Kaana hi i mangepen an i Debleskre jaka mishto?

Hoi krella, kai hi i mangepen an i Debleskre jaka mishto oder gar? Dikenn o VIDEO.

VIDEO: Shunell o Dewel ap hako mangepen? — Tikni versiona (2:42)

O Jehowah kamell, te mangah les an. Dikenn pal an Gilja 65:2, 3 un rakrenn khetne pral:

Hoi penals tu: Kamell o Jehowah, te rakress tu leha an o mangepen? Hoske peneh tu kowa jaake?

Mer te kamah, te shunell o Dewel maro mangepen, hunte djiwas mer pal leskre standards. Dikenn pal an Micha 3:4 un 1. Petro 3:12, un rakrenn khetne pral:

Hoi hunte well kerdo, te shunell o Jehowah maro mangepen?

An i kurepen mangenn hake dui rigja, te dell o Dewel len koi soor, te marenn le kola wawaren. Nai shunell o Dewel ap sawo mangepen?

5. O mangepen hunte well dran maro dji

Bud menshenge was penlo, jon hunte penenn pale un pale o emligo mangepen. Kamell o Dewel kowa jaake? Dikenn pal an Mateo 6:7, un rakrenn khetne pral:

Hoi nai kreh tu, te peness an o mangepen gar pale un pale i emlige laba?

Mer lah jaake bud latcho koowa o Deblestar. Te hi tut hako diwes i wawar themra an o mangepen, pral hoi tu parkedo hal, palle hi tut efta themre an jek kurko. Jaake peneh tu gar pale un pale i emlige laba.

I latcho dad kamell, te penell i ternepen, hoi ap leskro dji hi. Jaake hi kowa ninna pash i Jehoweste. Te rakrah leha, hunte well kowa dran maro dji

6. O mangepen hi i moldo latchepen o Deblestar

Har nai dell men o mangepen soor, te hi men i pharo tsiro ap mende? Dikenn o VIDEO.

VIDEO: O mangepen hi menge mishto, te nashras gar mari soor (1:32)

I bibla penell menge, kai krell o mangepen an mende kowa, te was bachteles an maro dji. Dikenn pal an Filiparja 4:6, 7, un rakrenn khetne pral:

Hoi krell o mangepen, ninna te atchell tchomone jaake, har kowa hi?
Hoi kamals tu an o mangepen ap i Jehoweste te penell?

Djinal tu kowa?

Ko lab “Amen” kharell ap romnes “Jaake te well kowa” oder “tchatchepah.” Ninna an o biblakro tsiro was pal o mangepen “Amen” penlo (1. Familjakro Liil 16:36).

7. Ma biste o mangepen

Denna tsire, kote hi jaake bud ap mende, kai bistrah, te rakras i Jehoweha an o mangepen. Har dikas o Jesus ap o rakepen i Debleha? Dikenn pal an Mateo 14:23 un Marko 1:35, un rakrenn khetne pral:

Hoi kras o Jesus, te well leske doha tsiro, te nai rakrell lo peskro dadeha an o mangepen?
Kaana wals tuke doha tsiro, te rakress i Jehoweha an o mangepen?

BUD PENENNA: “Hi jek ap koneste mer mangah. O Dewel shunell hako mangepen.”

Hoi penals tu ap kowa?

HOI KATE PENLO WAS

O rakepen i Jehoweha krella, te well maro malepen leha sorleder, te well maro dji pokones un te hi men koi soor, te kras kowa, hoi an i Debleskre jaka mishto hi.