LECȚIA 09
O manglimos ajutil-tu te pașios le Devlestar
Simțosardean vroiechdata că si tut nevoia varecastar cai te sicavel tuche savo si o lașio drom andi viața? Si tut bare pușimata savende rodes o răspunso? Cameias ca varecon te avel pașa chio duchado ilo hai te zuriarel-tu? Cames te pașios vi mai but le Iehovastar? O manglimos daștil te ajutil-tu ande sea cadal buchia. Tha sar trebulas te mangas-ame le Devlesche? Așunel o Del sea-l manglimata? So trebul te cheres ca o Del te așunel che manglimata? Te dichas.
1. Casche trebul te mangas-ame hai so daisaras te phenas lesche?
O Isus sicadea-ame că trebul te mangas-ame numai amare Dadesche andal ceruri. Vi o Isus manglea-pe le Iehovasche. Vo phendea: „Tume cadea te manghen-tume: «Amaro Dad cai san ande-l ceruri . . .»”. (Matei 6:9) Cana mangas-ame le Iehovasche, amaro amalimos leia cărdiol vi mai zuralo.
Daisaras te mangas-ame anda oriso. Tha ciaces, o Del, del amenghe o răspunso numai cana mangas-ame pala leschi voința. „Oriso mangas lestar pala leschi voința [le Devleschi], Vo așunel-ame.” (1 Ioan 5:14) O Isus phendea amenghe so daisaras te mangas le Devlestar. (Citisaren Matei 6:9-13.) Te na mangas-ame numai anda so duchal-ame, tha si șucar te na bâstras vi te mulțumisaras le Devlesche anda so cărdea anda amende hai te mangas-les te ajutil vi averen.
2. Sar trebul te mangas-ame le Devlesche?
I Biblia phenel amenghe: „Șioren tumaro ilo angla [o Del].” (Psalmo 62:8) Cadea că, trebul te mangas-ame le Devlesche anda sea o ilo. Daisaras te mangas-ame voceaia zurali sau ando gândo, oricana hai oricai, chiar cana sam andel cianga, ande pânrănde sau beșas tele. Importanto si te sicavas respecto caring o Iehova.
3. Sar del-ame o Del răspunso cana mangas-ame lesche?
Vo cherel cadai buchi ande mai but feluri. Sar exemplo, o Iehova dea-ame lesco Cuvânto, i Biblia, cai arachas răspunsuri amare pușimatande. Le sfaturi anda o Cuvânto le Devlesco ‘daștin te cheren goghiaver codoles cai nai-les experiența’. (Psalmo 19:7; citisaren Iacov 1:5) Cana nachas prin pharimata, o Del daștil te del-ame pacea andi goghi. Hai vo daștil vi te cherel pesche slujitoren te ajutin-ame cana jial amenghe nasul.
HACHIAR MAI MIȘTO
Va avela te diches sar daștis te manghes-tu le Devlesche anda ilo, cai les te placial-les, hai va avela te hachiares ce miștimata anel tuche cadai buchi.
4. Sar camel o Del te mangas-ame lesche?
Sar trebul te aven amare manglimata ca o Del te primil-le? Dichen o MATERIALO VIDEO.
O Iehova camel te mangas-ame lesche. Citisaren Psalmo 65:2 hai pala codoia den duma:
-
Tu pachias că Codo cai așunel amare manglimata camel ca vi tu te manghes-tu lesche? Sostar?
Dacă camas ca o Del te așunel-ame cana mangas-ame lesche, trebul te traisaras cadea sar phenel amenghe vo. Citisaren Mica 3:4 hai 1 Petru 3:12 hai pala codoia den duma:
-
So trebul te cheres ca o Iehova te așunel che manglimata?
Cana si iech războio le dui părți daștin te manghen le Devlestar te câștighin. Daisaras te pachias că o Del va dela lenghe so von manghen?
5. Amare manglimata trebun te aven anda ilo
Unii manușa sas sicade te phenen pale hai pale, de fiesavi data, sa codol manglimata. Tha cadea camel o Del te mangas-ame lesche? Citisaren Matei 6:7 hai pala codoia den duma:
-
Sar daștis ‘te na phenes sa codol buchia de fiesavi data’ cana manghes-tu?
Ande fiesavo ghies, gândisar-tu ca vareso șucar anda so te mulțumis le Iehovasche. Dacă cheres cadea, co sfârșito le curchesco va aracheia efta buchia anda save mulțumisardean le Iehovasche, bi te phenes sa codol buchia.
Iech lașio dad camel ca lesco șiavo te del duma leia anda ilo. Sa cadea, o Iehova camel te mangas-ame lesche anda sea amaro ilo
6. O manglimos si iech daro le Devlestar
Sar daștil o manglimos te del-ame zuralimos, vi mai but cana nachas prin pharimata? Dichen o MATERIALO VIDEO.
I Biblia promitil amenghe că, prin o manglimos, va avela-ame pacea ando ilo. Citisaren Filipeni 4:6, 7 hai pala codoia den duma:
-
Chiar cana o manglimos ci duriarel amendar le pharimata, sar daștil te ajutil-ame?
-
Anda soste cameias te manghes-tu?
Jianglean că?
O cuvânto „amin” însemnol „cadea te avel” sau „ciaces”. De cana sas scriime i Biblia, le manușa phenen „amin” co sfârșito, cana manghen-pe le Devlesche. (1 Cronici 16:36)
7. Cher tuche timpo caște manghes-tu le Devlesche
Poiechdata si amen cadea de but buchia te cheras, că bâstras te mangas-ame le Devlesche. Chichi de importanto sas anda o Isus te manghel-pe le Devlesche? Citisaren Matei 14:23 hai Marcu 1:35 hai pala codoia den duma:
-
Cana cărdea pesche timpo o Isus caște manghel-pe le Devlesche?
-
Tu cana daștis te cheres tuche timpo caște manghes-tu?
UNII MANUȘA PHENEN: „Si de ivea te manghes-tu le Devlesche. Chonic ci așunel-tu”.
-
Tu so pachias?
SO SICHILEAM
Le manglimata phende anda ilo, anen amen mai pașă le Devlestar, den-ame pacea andi goghi hai den-ame o zuralimos te cheras so si plăcuto le Iehovasche.
So dichleam
-
Casche trebul te mangas-ame?
-
Sar trebul te mangas-ame?
-
Ce miștimata si amen cana mangas-ame le Devlesche?
RODE MAI BUT
Va avela te araches răspunsuri ca mai but pușimata anda o manglimos, cai vi tu hai vi aver manușa șion-le penghe.
„So trebul te jianes anda sar te manghes-tu le Devlesche” (O Turno de veghe, 1 octombria 2010)
Va avela te sichios sostar trebul te manghes-tu le Devlesche hai sar daștis te cheres cadaia vi mai mișto.
„Sostar te mangav-ma le Devlesche?” (Articolo pa amaro site-o)
Va avela te diches casche phenel i Biblia că trebul te mangas-ame.
„Trebul te mangav-ma ca le sfinți?” (Articolo pa amaro site-o)
O videoclipo anda cadai ghili va sicavela tuche dacă si importanto cana hai cai te manghes-tu le Devlesche.
Poate că fal-tu
PUȘIMATA ȘIUTINE BUTIVAR
So si o studio biblico le Martorența le Iehovasche?
Ande cado studio biblico gratuime le Martorența le Iehovasche, daștis te folosis orisavi Biblia cames. Daștis te achares ca o studio sea chi familia sau oricas cames.
