9 ӶЛАВА

Через и молитва авэла лащи дружба лэ Иеговаса

ВОСПРОИЗВЕСТИ

Кала о мануш мангэлпэ, тоди о Дэл андэ бут со поможыя лэсти. О мануш уӷанэна, сар фэдэр тэ терэл андэ пэсти жызня, сар май драго тэ полэл и тэ ладий лэ Иеговаса. Во виарақэла атветоря пэ пэстирэ вопросоря. Манушэсти авэла май драго по ди и лэстэ авэла, ко лэс тэ подритярэл. Но сар тэ мангэлпэ? Ашунэл о Дэл всаворэ молитвы? Сар ту трэбуй тэ мангэспэ, кай о Дэл тэ ашунэл тирэ молитвы? Адиносар пала када май англэ.

1. Касти трэбуй тэ мангэспэ и пала со?

О Иисусо мангэласпэ лэ Иеговасти. Во сытярэлас аврэн, кай вонэ кадяжэ тэ мангэнпэ кати лэ небеснонэ Дэвлэсти лэ Иеговасти. Во ԥэндя: «Важ када мангэнпэ кадя: „Амаро Дад по нэбо...“» (Матфея 6:9). Кала амэ дас дума лэ Иеговаса, амари дружба лэса ашэл май лащи.

Ту можэш тэ мангэспэ пала вся, но кай о Дэл тэ ашунэл тирэ молитвы, трэбуй тэ сэрэс пала кода, со запистромэ андэ 1 Иоанна 5:14: «Со бы амэ тэ на мангас лэ Дэвлэстар, во ашунэл амэн, если мангас кода, со сжалпэ лэстиря времяса». О Иисусо ԥэндя дэсо анда кода, пала со амэ можэм тэ мангаспэ. (Адиносар Матфея 6:9—13.) Амэ можэм тэ мангаспэ пала со пэрэжываем, тэ мангаспэ пала авэр мануша. Ай кадяжэ трэбуй тэ на бистрас тэ ԥэнас лэсти наис важ вся, со во важ амэндэ стердя.

2. Сар трэбуй тэ мангэспэ?

Андэ Библия пистромэ: «Росԥэнэн вся [лэ Дэвлэсти], со тумэндэ по ди» (Псалом 62:8). Анда када дицол, кай ту трэбуй тэ мангэспэ анда вся оди. Ту можэш тэ мангэспэ, кай тут тэ ашундёл или андо гиндо. Андэ Библия най пистромэ, кай трэбуй тэ мангэспэ пэ чангэндэ, тэ бэшэс чи тэ тердёс. Само ӷлавно, кай тэ мангэспэ трэбуй пативалэс. И кай бы ту тэ на авэс, во ашунэла.

3. Сар о Дэл дэл атвето пэ молитвы?

О Иегова можэт тэ дэл по ди спокойство, и можэт тэ стерэл кадя, кай лэско народо тэ подритярэл тут. И инке во можэт тэ дэл атвето пэ молитвы через и Библия. Андэ Псалом 19:7 пистромэ, кай о Дэл «дэл кодэлэсти, ко нисо на ӷанэнас, тэ ашэл мудро». (Адиносар Иакова 1:5.)

УӶАНАМ МАЙ БУТ

Анда кадэя ӷлава амэ уӷанаса, сар тэ мангаспэ лэ Дэвлэсти, кай во тэ ашунэл амэн. Кадяжэ диқаса, саво лашимос авэла кодэлэстар, сар амэ мангаспэ.

4. Со тэ терас, кай о Дэл тэ ашунэл амарэ молитвы?

Сар тэ полас, кай лэ Дэвлэсти чалёл, кала амэ мангаспэ? Диқам о ВИДЕО.

ВИДЕО: «Ашунэл ли о Дэл всаворэ молитвы?» Набут анда видео (2:42)

О Иегова камэл, кай амэ тэ мангаспэ лэсти. Адиносарам Псалом 65:2 и подам дума пала вопросоря, савэ май тэлэ.

Сар ту гиндос, камэл «Кодэва, ко ашунэл и молитвы», кай ту тэ мангэспэ лэсти? Васо ту кадя гиндос?

Кай о Дэл тэ ашунэл тирэ молитвы, трэбуй тэ жувэс па лэстирэ законоря. Адиносарам Михей 3:4 и 1 Петра 3:12 и подам дума пала вопросо, саво май тэлэ.

Сар трэбуй тэ жувэс, кай о Иегова тэ ашунэл тут?

Кала жал война и халавдэ мангэнпэ. Годявэрнэс када чи най тэ аштярэн, касти о Дэл поможыя тэ вицэлэн и война?

5. Амэ трэбуй тэ мангаспэ анда вся оди

Дэсавэ висытелэ и молитвы и проԥэнэн алав андэ алавэстэ. Чалён кацавэ молитвы лэ Дэвлэсти? Адиносарам Матфея 6:7 и подам дума пала вопросо, саво май тэлэ.

Со поможыя тути андэ молитва тэ на ԥэнэс алав андэ алавэстэ?

Старысав кажно дес тэ диқэс андэ пэстири жызня, сар о Иегова блаӷословий тут, и ԥэн лэ Иеговасти наис важ кадэва лашимос. Тер када кажно дес и важ о курко диқэса, кай ту мангэспэ най пала ек и ек.

Лашо дад камэл, кай лэстирэ бэяцэ тэ росԥэнэн лэсти вся, со лэндэ по ди. О Иегова кадяжэ камэл, кай и амэ тэ росԥэнас, со амэндэ по ди

6. Молитва, када подарко лэ Дэвлэстар

Сар и молитва можэт тэ подритярэл, кала тути ԥарэс? Диқам о ВИДЕО.

ВИДЕО: «И молитва поможый вся тэ виритярас» (1:32)

Андэ Библия пистромэ, кай кала о мануш мангэлпэ, лэстэ авэла спокойство по ди. Адиносарам Филиппийцам 4:6, 7 и подам дума пала вопросоря, савэ май тэлэ.

Молитва на улэл вся о ԥаримос, тоди сар вой поможый?
Пала со ту камлоп тэ мангэспэ?

Ту ӷанглян?

О алав «аминь» сыкавэл «чаче» чи «мэк авэл кадя». Анда дэлмутни время, кала домангэнаспэ ԥэнэнас «аминь» (1 Летопись 16:36).

7. Витидэ время, кай тэ мангэспэ

Дэкала амэндэ кадя бут дила, кай бистрас тэ мангаспэ. Пэ скати дэ куч важ о Иисусо сас и молитва? Адиносарам Матфея 14:23 и Марка 1:35 и подам дума пала вопросоря, савэ май тэлэ.

Сар о Иисусо виарақэлас время, кай тэ мангэлпэ?
Кала ту виарақэс время тэ мангэспэ?

ТУТИ ВАРИКО МОЖЭТ ТЭ ԤЭНЭН: «И молитва нисо на дэл».

Со ту ԥэндоп пэ кацавэ алава?

ПАЛА СО АМЭ ДЯМ ДУМА?

Анда кадэя ӷлава амэ уӷанглям, кай кала о мануш мангэлпэ анда оди, када дэл лэсти зор тэ терэл кода, со чалёл лэ Иеговасти, дэл тэ авэл спокойство по ди, и важ када лэстэ авэла лащи дружба лэ Дэвлэса.