XIDONDZRO 09

Tsrhindzrekela Ka Xikwembu Nkulukumba Hi Xikhongoto

PLAY

Xana u txhuka u djula ku pfuniwa a wuton’wini byaku? Xana u ni swivutiso swa lisima leswi u djulaka tinhlamulo ta swone? Xana wa swi djula ku txhaveleliwa kumbe ku tlemiwa mbilu? Xana wa swi navela ku titwa u li kusuhi na Yehovha? Xikhongoto xi nga ku pfuna ka timhaka leto hinkwatu. Kambe hi yini ndlela leyinene ya ku khongota? A nga va leswaku Xikwembu Nkulukumba a yingela swikhongoto hinkwaswu? U nga yentxa yini akuva u tiyiseka leswaku a ta swi yingela swikhongoto swaku? A hi voneni tinhlamulo ta kone.

1. Xana hi fanela ku khongota ka mani nakone hi fanela ku kombela yini?

Yesu a dondzrise leswaku hi fanela ku khongota ntsena ka Papayi wezru lwa nga matilweni. Nambi ko va Yesu, a a hamba a khongota ka Yehovha. A te: “Kambe, mi fanela ku khongota hi ndlela leyi: ‘Papayi wezru lweyi a nga matilweni . . . ’” (Matewu 6:9) Loko hi khongota ka Yehovha, hi tiyisa wunghanu byezru na yene.

Loko hi khongota, hi nga kombela mintxhumu hinkwayu leyi hi yi djulaka. Kambe akuva Xikwembu Nkulukumba a hlamula swikhongoto swezru, ku djuleka swi fambelana ni ku zrandzra kwake. ‘Loko hi kombela ntxhumu hi ku zrandzra kwakwe [awa] hi yingela.’ (1 Yohan 5:14) Yesu a nyikele swikombiso swa mintxhumu leyi swi nga swinene ku yi kombela. (Dondzra Matewu 6:9-13.) Handle ka ku tikombelela mintxhumu yezru, hi fanela ku khensa Xikwembu Nkulukumba hi leswi a hi yentxelaka swone ni ku kombela leswaku a pfuna van’wana.

2. Xana hi fanela ku khongota hi ndlela yini?

Bibele dzri hi kutxa ‘ku txhulula timbilu [tezru mahlweni] ka Xikwembu Nkulukumba’. (Amapsalma 62:8) Kutani ke, hi fanela ku khongota na swi sukela mbilwini. Hi nga khongota hi zritu dzra ku tlakuka kumbe hi le ndzreni ka mbilu na hi li ka xiyimu xin’wana ni xin’wana lexi kombisaka xitxhavu. Hi nga khongota nkama wini na wini ni mbangwini wini na wini.

3. Xikwembu Nkulukumba a hlamulisa kuyini swikhongoto swezru?

A swi hlamula hi tindlela ta ku siyanasiyana. Yehovha a hi nyike Zritu dzrake, ku nga Bibele, lani hi talisaka ku kuma tinhlamulo ta swivutiso swezru. Ku dondzra Zritu dzra Xikwembu Nkulukumba swi nga ‘tlhazrihisa lwe wa ku dzrivala’. (Amapsalma 19:7; dondzra Yakob 1:5.) Yehovha a nga hi zrulisa miyanakanyu loko hi tlhangana ni swikazratu. A nga yentxa leswaku vagandzreli vake va hi pfuna loko hi djula mpfunu.

KELISISA

Vona ndlela leyi ha yone u nga hambaka swikhongoto leswi sukelaka mbilwini, leswi nyonxisaka Xikwembu Nkulukumba. Tlhela u vona leswaku xikhongoto xi nga ku pfunisa kuyini.

4. Leswi djulekaka akuva Yehovha a hlamula swikhongoto

I yini lexi yentxaka leswaku swikhongoto swezru swi yamukeleka kumbe swi nga yamukeleki ka Xikwembu Nkulukumba? Vonani VHIDIYU.

VHIDIYU: Xana Xikwembu Nkulukumba A Yingiseta Swikhongoto Hinkwaswu?—Xitlephu (2:42)

Yehovha a djula leswaku hi khongota kwake. Dondzrani Amapsalma 65:2, mi gama mi bulisana hi swivutiso leswi landzrelaka:

Hi mavonela yaku, xana ‘muyingeli wa swikhongoto’ awa swi djula kuva wene u khongota ka yene? Ha yini u hlamulisa xileswo?

I swa lisima kuva hi tikazratela ku hanya hi milawu ya Xikwembu Nkulukumba akuva a ta yingela swikhongoto swezru. Dondzrani Mika 3:4 na 1 Petros 3:12, mi gama mi bulisana hi xivutiso lexi landzrelaka:

Hi nga yentxa yini akuva Yehovha a yingela swikhongoto swezru?

Hi nkama wa yimpi, matlhelo ha mabidzri ma khongota ma kombela ku hlula. Xana swa twisiseka ku yimela leswaku Xikwembu Nkulukumba a ta hlamula swikhongoto leswi?

5. Swikhongoto swezru swi fanela ku sukela mbilwini

Van’we va dondzrisiwe ku phindhetela mazritu ka swikhongoto swavu hi zritu ni zritu. Kambe xana Yehovha a djula hi yentxisa xiswoswo? Dondzrani Matewu 6:7, mi gama mi bulisana hi xivutiso lexi landzrelaka:

U nga yentxisa kuyini akuva u nga “phindheteli mazritu wolawa ya man’we” nkama ni nkama ka swikhongoto swaku?

Siku ni siku, u nga yanakanya hi ntxhumu wa ku kongoma lowu Yehovha a ku yentxeliki wone u va u mu khensa hi kola ka wone. Loko u yentxa leswi siku ni siku, hi vhiki u ta va u khongote hi 7 wa mintxhumu ya ku hambana na u nga zanga u phindhetela.

Papayi lwenene a djula leswaku n’wanake a vulavula na yene na swi sukela mbilwini. Yehovha a djula leswaku hi khongota kwake na swi sukela mbilwini

6. Xikhongoto i xihanano lexi pfaka ka Xikwembu Nkulukumba

Xikhongoto xi nga hi pfuna hi ndlela yini ngopfungopfu hi minkama ya swikazratu? Vonani VHIDIYU.

VHIDIYU: Xikhongoto Xi Hi Pfuna Ku Tiyisela (1:32)

Bibele dzri dumbisa leswaku xikhongoto xi nga hi nyika ku zrula ka miyanakanyu. Dondzrani Ba-le-Filipi 4: 6, 7, mi gama mi bulisana hi swivutiso leswi landzrelaka:

Nambileswi xikhongoto xi nga helisikiki swikazratu swezru minkama hinkwayu, ha yini xi pfuna?
Hi yini yin’we ya mintxhumu leyi u navelaka ku yi kombela?

A wu swi tiva?

Zritu ledzri liki “amen” dzri tlhamuxela leswaku “a swi yentxeke” kumbe “i ntiyiso”. Ku sukela a minkameni ya Bibele, leswaku “amen” swi hlayiwa loko xikhongoto xi hela.—1 Makronika 16:36.

7. Tinyike nkama wa ku khongota

Minkama yin’wana hi nga ha taleliwa hi swa ku swi tizra lakakuva hi dzrivala ku khongota. Xana xikhongoto a xi li xa lisima ku ya tlhasa kwini ka Yesu? Dondzrani Matewu 14:23 ni Marka 1:35, mi gama mi bulisana hi swivutiso leswi landzrelaka:

Xana Yesu a a yentxa yini akuva a tinyika nkama wa ku khongota?
Hi wini nkama lowu u vonaka leswaku wu nga va wunene akuva u khongota ha wone?

VAN’WE VA LI: “Xikhongoto xo tizrela ku tiphungalata.”

Wene a wu ta ku yini?

NKATSRAKANYU

Swikhongoto leswi sukelaka mbilwini, swi hi tsrhindzretela kusuhi na Xikwembu Nkulukumba, swi hi nyika ku zrula ka miyanakanyu swi tlhela swi hi nyika ntamu lowu hi wu vilelaka akuva hi nyonxisa Yehovha.

Mpfuxeto

Xana hi fanela ku khongota ka mani?
Xana hi fanela ku khongota hi ndlela yini?
Hi tini tin’we ta tindlela leti xikhongoto xi hi pfunaka ha tone?

Xidondzro lexi xi hele hi:

Lwela leswi

Hamba xikhongoto u hlaya ntxhumu lowu wu ku kazrataka, u hlaya ntxhumu wa kukazri lowu u khensaka Yehovha ha wone ni ntxhumu wa kukazri lowu u wu kombelelaka mun’wana.

Swin’wana:

Swin‘wana Leswi U Nga Swi Yentxaka