YE TI MANDA 09
Ga nduru na Nzapa na lege ti sambela
A si awe so mo bâ so mo bezoin ti tene a fa lege na mo? Eskê mo yeke na akota hunda so mo ye ti wara akiringo tënë na ni? Mo bezoin dengo bê? Mo ye ti ga nduru mingi na Jéhovah? Sambela alingbi ti mû maboko na mo na yâ ti aye so kue. Me nzoni lege ti sambela ayeke so wa? Nzapa ayeke mä asambela kue? Nyen la mo peut ti sara si mo hinga na bê ti mo kue so lo yeke mä asambela ti mo? Zia e bâ aye so mo peut ti sara.
1. E yeke sambela zo wa? Aye wa la e lingbi ti sambela ndali ni?
Jésus afa so a lingbi e sambela gï Babâ ti e so ayeke na yayu. Jésus nga kue asambela lani Jéhovah. Lo tene: “A lingbi ala sambela tongaso: ‘Babâ ti e so mo yeke na yayu . . .’” (Matthieu 6:9). Tongana e sambela Jéhovah, songo ti e na lo ayeke kpengba.
E lingbi ti sambela ndali ti aye kue. Me, ti tene Nzapa akiri tënë na asambela ti e, a lingbi a gue oko na ye so bê ti lo aye. “Atâa ye wa la e hunda, tongana a gue oko na ye so bê ti [Nzapa] aye, lo yeke mä e.” (1 Jean 5:14). Jésus afa ambeni mbilimbili ye so e lingbi ti sambela ndali ni. (Diko Matthieu 6:9-13.) Na ndö ti so e yeke sambela ndali ti aye so abâ e wani, a lingbi e girisa ape ti kiri singila na Nzapa ndali ti aye so lo sara na e nga ti hunda lo ti mû maboko na amba ti e.
2. A lingbi e sambela tongana nyen?
Bible awa e ti “zi bê ti [e] kue na [Nzapa].” (Psaume 62:8). Tongaso, a lingbi asambela ti e alondo na bê ti e. E lingbi ti sambela na kota go wala na yâ ti bê ti e, nga a lingbi fason so e duti wala e luti ti sambela afa so e ne Nzapa. E lingbi ti sambela na ngoi kue nga na ndo kue.
3. Nzapa ayeke kiri tënë na asambela ti e tongana nyen?
Jéhovah ayeke sara ni na alege nde nde. Lo mû na e Bible so na yâ ni fani mingi e yeke wara akiringo tënë na ahunda ti e. Dikongo Bible alingbi ti “sara si zo so ahinga ndo mingi pëpe aga zo ti ndara.” (Psaume 19:7; diko Jacques 1:5). Lo lingbi ti mû na e siriri ti bê na ngoi ti akpale. Lo lingbi nga ti pusu awakua ti lo ti mû maboko na e na ngoi so e yeke tâ na bezoin ni.
GI TI HINGA AYE MINGI
Bâ tongana nyen la mo lingbi ti tene asambela so alondo na bê ti mo so anzere na Nzapa, nga bâ tongana nyen la sambela alingbi ti ga na mo aye ti nzoni.
4. Nzapa ahunda na e ti sara ambeni ye si lo mä sambela ti e
Aye wa la ayeke sara si Nzapa amä sambela ti e wala pëpe? Zia VIDÉO ni.
Jéhovah aye si e sambela lo. Diko Psaume 65:2, na pekoni kiri tënë na ahunda so:
-
Eskê mo pensé so ‘Lo so lo yeke mä sambela’ aye si mo sambela lo? Mo tene tongaso ngbanga ti nyen?
Tongana e ye ti tene Nzapa amä asambela ti e, a lingbi e sara ye alingbi na aye so lo hunda. Diko Michée 3:4 nga na 1 Pierre 3:12, na pekoni kiri tënë na hunda so:
-
Tongana nyen la e lingbi ti sara kue ti tene Jéhovah amä asambela ti e?
Na ngoi ti bira, aturugu na ambage use kue ayeke sambela ti sö benda. Eskê a yeke na lege ni ti tene ala ku ti tene Nzapa akiri tënë na asambela ti ala kue?
5. A lingbi asambela ti e alondo na bê ti e
A fa na ambeni zo ti kiri na ndö ti a-oko tënë na ngoi so ala yeke sambela. Me eskê Nzapa aye si e sambela lo tongaso? Diko Matthieu 6:7, na pekoni kiri tënë na hunda so:
-
Nyen la mo lingbi ti sara ti “kiri gï na ndö ti tënë oko fani mingi” pëpe na yâ ti asambela ti mo?
Lâ oko oko, mo lingbi ti pensé na mbeni ye ti nzoni so mo wara na yâ ti gigi ti mo, na pekoni kiri singila na Jéhovah ndali ni. Tongana mo sara tongaso lâ oko oko, na yâ ti yenga oko, mo yeke sambela na ndö ti atënë mbasambala nde nde sân ti kiri na ndö ti oko tënë.
Mbeni nzoni babâ aye si molenge ti lo afa na lo tënë ti bê ti lo. Jéhovah nga kue aye si e fa na lo atënë ti bê ti e
6. Sambela ayeke mbeni cadeau so Nzapa amû na e
Tongana nyen la sambela alingbi ti kpengba e, na angoi so aye atambela nzoni nga na ngoi ti akpale? Zia VIDÉO ni.
Bible atene so sambela alingbi ti mû maboko na e ti duti na tâ siriri ti bê. Diko aPhilippien 4:6, 7, na pekoni kiri tënë na ahunda so:
-
Atâa so sambela ayeke zi akpale ti e lakue ape, tongana nyen la a yeke aidé e?
-
Ambeni ye wa la mo ye ti sambela ndali ni?
Mo hinga?
Tënë “amen” aye ti tene “zia a duti tongaso” wala “biani.” Ngbene ye na ngoi ti giriri, azo ayeke tene “amen” na hunzingo ti asambela.—1 Chronique 16:36.
7. Girisa ti sambela ape
Na ambeni ngoi, e lingbi ti duti na gbâ ti aye ti sarango ni na e girisa ti sambela. Tongana nyen la sambela ayeke lani kota ye na lê ti Jésus? Diko Matthieu 14:23 nga na Marc 1:35, na pekoni kiri tënë na ahunda so:
-
Nyen la Jésus asara ti wara ngoi ti sambela?
-
Na ngoi wa la mo lingbi ti wara ngoi ti sambela?
AMBENI ZO ATENE: “Sambela ayeke bubango ngoi ndali ti so zo ti mango ni ayeke dä ape.”
-
Mo yeke tene nyen na ala?
NA NDURU TËNË
Sambela so e tene na bê ti e kue asara si e ga nduru mingi na Nzapa, amû na e siriri ti bê nga amû na e ngangu so e bezoin ni ti sara aye so anzere na Jéhovah.
Dango bê
-
A lingbi e sambela zo wa?
-
A lingbi e sambela tongana nyen?
-
Ambeni nzoni ye wa la sambela ayeke ga na ni?
GI NDA TI YE
Wara akiringo tënë na ahunda so azo ayeke hunda ka ni na ndö ti sambela.
“Aye mbasambala so a lingbi mo hinga na ndo ti sambela” (Tour ti Ba Ndo ti lango 1 ti novembre 2010)
Gi ti hinga ndani so a lingbi mo sambela nga tongana nyen la mo lingbi ti sambela nzoni mingi ahon ti kozo.
“Ngbanga ti nyen la a lingbi mbi sambela?” (Article na ndö ti site)
Bâ tënë so Bible atene na ndö ti zo so a lingbi e sambela lo.
Na yâ ti vidéo ti bia so, bâ wala ndo so zo asambela dä wala ngoi so lo sambela ayeke kota ye.
Bâ nga
ATËNË SO AZO AYEKE HUNDA KA
A-Témoin ti Jéhovah ayeke manda Bible na azo tongana nyen?
Mo peut ti sara kua na traduction ti Bible so mo ye na temps so a-Témoin ti Jéhovah ayeke manda Bible na mo senge senge. Mo peut ti tisa afami ti mo kue wala ambeni kamarade ti mo.
