ඔයාගේ ජීවිතේට හරි මඟ පෙන්වීම් ඕනෙ කියලා ඔයාට හිතෙනවාද? හිතට වධ දෙන ප්‍රශ්නවලට ඔයා උත්තර හොයනවාද? ඔයාට සහනයක් ඕනෙ කියලා දැනිලා තියෙනවාද? යෙහෝවා දෙවියන්ට තව ළං වුණොත් හොඳයි කියලා ඔයාට හිතෙනවාද? යාච්ඤාව ඒ හැම දේටම උදව් වෙනවා. ඒත් යාච්ඤා කරන්න ඕනෙ කොහොමද? දෙවියන් හැම යාච්ඤාවක්ම අහනවාද? දෙවියන් ඔයාගේ යාච්ඤා අහන්න නම් ඔයා මොනවාද කරන්න ඕනේ?

1. අපි යාච්ඤා කරන්න ඕනෙ කාටද? මොනවා ගැනද?

යේසුස් කිව්වා අපි යාච්ඤා කරන්න ඕනෙ ‘ස්වර්ගයේ ඉන්න අපේ පියාණන්’ වන යෙහෝවා දෙවියන්ට විතරයි කියලා. (මතෙව් 6:9) යේසුස් යාච්ඤා කළෙත් යෙහෝවා දෙවියන්ට. අපි යාච්ඤාවෙන් යෙහෝවා දෙවියන් එක්ක කතා කරද්දී ඔහු එක්ක අපිට තියෙන යාළුකම තව වැඩි වෙනවා.

බයිබලේ කියනවා ‘දෙවිගේ කැමැත්තට එකඟව අපි යමක් ඉල්ලලා යාච්ඤා කරද්දී දෙවි ඒ හැම දේකටම සවන් දෙනවා’ කියලා. (1 යොහන් 5:14) ඒ කියන්නේ අපිට ඕනෙම දෙයක් ගැන යාච්ඤා කරන්න පුළුවන්. හැබැයි යාච්ඤා කරද්දී අපි කියන දේවල් දෙවියන් කැමති දේවලට එකඟ වෙන්න ඕනේ. එතකොට තමයි ඔහු අපේ යාච්ඤා අහලා ඒවාට උත්තර දෙන්නේ. අපිට යාච්ඤා කරන්න පුළුවන් මොනවා ගැනද කියලා යේසුස් කියලා දුන්නා. (මතෙව් 6:9-13 කියවන්න.) අපේ ප්‍රශ්න ගැන යාච්ඤා කරන්න අපිට පුළුවන්. ඒත් අනිත් අයට උදව් කරන්න කියලා යාච්ඤා කරන්නත් අපි වෙනුවෙන් කරලා තියෙන දේවලට දෙවියන්ට ස්තුති කරන්නත් අපි අමතක කරන්න හොඳ නැහැ.

2. අපි යාච්ඤා කරන්න ඕනෙ කොහොමද?

“ඔබේ හදවතේ ඇති සියල්ල දෙවිට පවසන්න.” (ගීතාවලිය 62:8) ඒ කියන්නේ අපේ හිතේ තියෙන හැම දෙයක්ම අපි දෙවියන්ට අවංකවම කියන්න ඕනේ. ලොකු ගෞරවයක් ඇතුව ඕනෙම ඉරියව්වකින් අපිට යාච්ඤා කරන්න පුළුවන්. ඕනෙම තැනක, ඕනෙම වෙලාවක නිහඬව හරි ශබ්ද නඟලා හරි අපිට යාච්ඤා කරන්න පුළුවන්.

3. දෙවියන් අපේ යාච්ඤාවලට උත්තර දෙන්නේ කොහොමද?

එක විදිහක් තමයි බයිබලය. බයිබලෙන් අපේ ප්‍රශ්නවලට උත්තර හොයාගන්න පුළුවන්. ඒක කියවද්දී “අද්දැකීම් අඩු තැනැත්තාට ප්‍රඥාව ලැබෙනවා.” (ගීතාවලිය 19:7; යාකොබ් 1:5 කියවන්න.) තව විදිහක් තමයි අපි ප්‍රශ්න ගැටලුවලට මුහුණ දෙද්දී කලබල වෙන්නේ නැතුව සන්සුන්ව වැඩ කරන්න උදව් කරන එක. ඒ වගේම උදව් ඕනෙම කරන වෙලාවලදී අපිට උදව් කරන්න දෙවියන් ඔහුට නමස්කාර කරන අයගේ හිත් පොලඹවනවා. ඒකත් ඔහු අපිට උත්තර දෙන විදිහක්.

 ඉගෙනගත්ත දේ

අපි මුළු හිතින්ම දෙවියන්ට යාච්ඤා කරද්දී අපි ඔහුට ළං වෙනවා. අපේ හිත සන්සුන් වෙනවා. ඒ වගේම යෙහෝවා දෙවියන් කැමති දේ කරන්න අපිට ලොකු ශක්තියක් ලැබෙනවා.

ඔයා හිතන්නේ මොකක්ද?

• අපි යාච්ඤා කරන්න ඕනෙ කාටද?

• අපි යාච්ඤා කරන්න ඕනෙ කොහොමද?

• යාච්ඤා කරද්දී ඒක අපිට උදව් වෙන්නේ මොන විදිවලින්ද?