ROSO 09
Huuccattotenni Maganunniwa Shiqi
Mitto coye assattora kaˈeenna biddishshu hasiise egenninohe? Dawaro afiˈra hasiˈrattoti huluullitannohe xaˈmuwa no? Shesho woy jawaante hasiissinohe? Albinni roore Yihowawa shiqa hasiˈratto? Huuccatto tenne baalantera kaaˈlitannohe. Ikkina huuccatto assiˈra hasiissannonketi gara ikkitino doogo hiitteeti? Maganu baalanta huuccatto macciishshanno? Maganu huuccattokki macciishshanno gede maa assa dandaatto? Hanni laˈno.
1. Huucciˈra hasiissannonkehu ayeti? Mayi daafira huucciˈra dandiineemmo?
Yesuusi iimi Annanke calla huucciˈra hasiissannonketa rosiisino. Yesuusi umisi Yihowa huucciˈrino. Isi togo yiino: “Kunnira kiˈne, ‘Annanke Gordoho heeˈrattohu . . . ’ yitine huuccidhe.” (Maatewoosi 6:9) Yihowa huucciˈneemmo woyite, isi ledo noonke jaaloomi lexxanno.
Huucciˈneemmo coyi Maganu fajjo ledo sumuu yaannoha ikki geeshsha, aye coyeno huucciˈra dandiineemmo. Qullaawu Maxaafi, “[Maganu] isi hedino garinni huucciˈneemmore baala macciishshannonke” yaanno. (1 Yohaannisi 5:14) Yesuusi huucciˈra hasiissannonkeha mito coye rosiisino. (Maatewoosi 6:9-13 nabbawi.) Uminke hajo daafira huucciˈneemmotano agurranna, assinonkerira Magano galatanna wolu manni daafirano huucca hasiissannonke.
2. Huucciˈra hasiissannonkehu ma garinniiti?
Qullaawu Maxaafi ‘wodaninkera noore coˈo assine Maganoho kuˈlineemmo’ gede amaalannonke. (Ermiyaasi Qurto 2:19) Konni daafira huucciˈneemmo woyite, giddonketa fushshine hasaapha hasiissannonke. Qoonqonke macciishshantanno gede assine, woy coyiˈnummokkinni wodaninkenni calla huucciˈra dandiineemmo. Guluphine, uurrine woy ofolline huucciˈra dandiineemmo; qaru coyi Yihowa ayirrinseemmota leellishanno garinni huucciˈrate. Aye yannarano hattono aye bayichono heeˈne huucciˈra dandiineemmo.
3. Maganu huuccattonkera dawaro qolannohu hiittoonniiti?
Huuccattonkera dawaro babbaxxitino doogganni qolanno. Yihowa Qaalesi Qullaawa Maxaafa uyinonke; duucha woyite xaˈmuwankera Qullaawu Maxaafi giddonni dawaro afiˈneemmo. Faarso 19:7 kultannonte gede, Maganu Qaale nabbawa “hawanya mancho egennaamo assitanno.” (Yaiqoobi 1:5 nabbawi.) Qarru amadannonke woyite Yihowa giddiidi keere aannonke. Qoleno kaaˈlo hasiissannonke woyite soqqamaasinesi kaaˈlitannonke gede assara dandaanno.
LEDDE XIINXALLI
Magano hagiirsiissanno huuccatto assiˈra dandaatto garanna huuccatto kaaˈlitannohe gara rosi.
4. Maganu huuccattonke macciishshanno gede, assa hasiissannonkeri no
Maganu huuccattonke macciishshanno gede woy macciishshannokki gede assara dandaannori maati? VIIDIYO laˈe.
Yihowa iso huucciˈnammora hasiˈranno. Faarso 65:2 nabbabbe; hakkiinni aante noo xaˈmuwa hasaabbe:
-
‘Huuccatto macciishshanno’ Magani ati huuccatto assiˈrattora hasiˈrannoha dilawannohe? Mayira?
Maganu huuccattonke macciishshanno gede seerisi garinni heeˈrate sharrama hasiissannonke. Mikiyaasi 3:4 nna 1 Pheexiroosi 3:12 nabbabbe; hakkiinni aante noo xaˈmo hasaabbe:
-
Yihowa huuccattonke macciishshanno gede maa assa hasiissannonke?
Olu yannara, lamenti garo tiˈi teˈee qeelate huuccatto assidhanno. Maganu tenne huuccattora dawaro qolannoha lawannohe?
5. Huucciˈneemmo woyite Yihowara giddonketa hasaapha hasiissannonke
Mitu manni yiinota yaanni huucciˈranno gede rosiinsoonninsa. Ikkina Maganu hakko garinni huucciˈnammora hasiˈranno? Maatewoosi 6:7 nabbabbe; hakkiinni aante noo xaˈmo hasaabbe:
-
Huuccatto assiˈratto woyite ‘yoottota calla yaattokki gede’ maa assa dandaatto?
Barru barrunku Yihowa galaxxatto gede assannoheha mitto baxxino coye hedi. Mitte lamala geeshsha barru baala hatto assittoro, yoottota calla yiittokkinni lamalu babbaxxino coyi daafira huucciˈritto yaate.
Danchu anni qaaqqisi giddosita kuˈlasira hasiˈranno. Hatteente gede, Yihowano giddonketa hasaaphinammosira hasiˈranno
6. Huuccatto Maganu eltooti
Huuccatto qarru yannarano ikko faffote yannara jawaante uyitannonkehu hiittoonniiti? VIIDIYO laˈe.
Qullaawu Maxaafi huuccatto wodanaaˈmineemmo gede kaaˈlitannonketa kulanno. Filiphisiyusi Sokka 4:6, 7 nabbabbe; hakkiinni aante noo xaˈmuwa hasaabbe:
-
Huuccatto qarranke baala hooltanno yaa ikka hoogirono, kaaˈlitannonkehu hiittoonniiti?
-
Yihowa mayi mayi daafira huucciˈra hasiˈratto?
Ati tenne afootto?
“Hamiiˈni” yaa “ikkona” woy “eewanni” yaate. Hundi warinni kayise, mannu huuccatto assiˈre kaˈˈanno woyite “hamiiˈni” yaanno.—1 Duduwo 16:36.
7. Huuccatto assiˈratto yanna heedhohe
Mito woyite loosu batiˈrannonke daafira huuccatto assiˈra hambammora dandiineemmo. Yesuusi huuccatto assiˈrate mageeshshi geeshsha diinaggaawino? Maatewoosi 14:23 nna Maarqoosi 1:35 nabbabbe; hakkiinni aante noo xaˈmuwa hasaabbe:
-
Yesuusi huuccattote yanna afiˈrate maa assino?
-
Ati hiittee hiittee saatera huucciˈra dandaatto?
MITU MANNI TOGO YAANNO: “Huuccatto assiˈnannihu mulla beedho afiˈrateetilla ikkiina macciishshannohu heeˈreenna diˈˈikkino.”
-
Tennera ati mayite qolatto?
XAPHISHSHA
Woˈma giddonni assiˈneemmo huuccatto Maganunniwa shinqeemmo gede, giddiidi keere afiˈneemmo gedenna Yihowa hagiirsiisate jawaante afiˈneemmo gede kaaˈlitannonke.
Kageeshsha Rosoottore
-
Huucciˈra hasiissannonkehu ayeti?
-
Huucciˈra hasiissannonkehu ma garinniiti?
-
Huuccatto maa maaho kaaˈlitannonke?
EGENNO LEXXI
Huuccattote daafira duuchu manni xaˈmanno xaˈmuwara qolloonni dawaro nabbawi.
“Huuccattote Daafira Afa Hasiissannoheha Lamala Coye” (Agarooshshu Shae, Birra 1, 2010)
Huuccatto assiˈra hasiissannohehu mayiraatironna huuccattokki woyyeessiˈra dandaatto gara rosi.
“Huuccatto Assiˈra Hasiissannoehu Mayiraati?” (Webisayitenkera fultino borro)
Qullaawu Maxaafi aye huucciˈra hasiissannonketa kulannoro wodanchi.
“Qullaawoota Huucciˈra Hasiissannoe?” (Webisayitenkera fultino borro)
Tenne muuziiqu viidiyo giddo, huucciˈneemmo bayichinna yanna daafira qarrama hasiissannonkeronna teˈee wodanchi.
Kurino Lai
DUUCHU MANNI XAˈMANNO XAˈMO
Yihowa Farciˈraasine Qullaawa Maxaafa Xiinxallissannohu Hiittoonniiti?
Yihowa Farciˈraasine ledo Qullaawa Maxaafa woxe baaxxittokkinni xiinxallatto woyite, baxoottota Qullaawu Maxaafi tiro horoonsiˈra dandaatto. Xiinxallokkira maatekki gudisse woy jaallakki koyisa dandaatto.
