LESONA 09
Faalatalata i le Atua e Ala i le Tatalo
E iai ni taimi o lou olaga e te manaʻomia ai se taʻitaʻiga? Po o iai ni au fesili tāua e te fia iloa ni tali? Pe e te manaʻomia ni faalaeiauga po o ni faamāfanafanaga? Pe e te fia faalatalata iā Ieova? O le a fesoasoani le tatalo i na vala uma. Ae o le ā le auala saʻo e tatalo ai? Pe faafofoga le Atua i tatalo uma? O le ā e tatau ona e faia ina ia faamautinoa ai, o le a faafofogaina e le Atua au tatalo? Seʻi tatou iloilo.
1. O ai e tatau ona tatou tatalo i ai, ma o ā mea e tatau ona tatalo ai?
Na aʻoaʻo mai e Iesu e tatau ona tatou tatalo atu tau lava o lo tatou Tamā i le lagi. Na tatalo atu foʻi Iesu iā Ieova. Na ia faapea mai: “Ia faapea ona outou tatalo: ʻLo matou Tamā e o i le lagi . . . ’” (Mataio 6:9) Pe a tatou tatalo atu iā Ieova, o le a mafai ona faamalosia ai la tatou faauōga ma ia.
E mafai ona tatou tatalo atu i so o se mataupu. Ae ina ia talia e le Atua a tatou tatalo, e manaʻomia ona ōgatusa ma lona finagalo. ʻPo o ā lava mea e tatou te talosaga atu ai e tusa ma le finagalo o le Atua, e faafofoga mai lava o ia iā i tatou.’ (1 Ioane 5:14) Na faailoa mai e Iesu nisi o mea tāua e manaʻomia ona faaaofia i a tatou tatalo. (Faitau le Mataio 6:9-13.) E lē gata tatou te tatalo atu mo mea tatou te popole ai, ae aua neʻi galo ona faafetai atu i le Atua mo mea ua ia faia mo i tatou, ma talosaga atu mo lana fesoasoani i isi.
2. E faapefea ona tatou tatalo?
Ua faalaeiauina i tatou e le Tusi Paia ina ia ‘sasaa atu i le Atua o tatou loto.’ (Salamo 62:8) O lona uiga e tatau ona tatou tatalo mai le loto. E mafai ona tatou tatalo leotetele pe tatalo lē leoa, i soo se taimi ma i soo se nofoaga. E lē afāina pe tootuli, saofaʻi, pe tulaʻi, ae o le mea e sili ona tāua, o le faaalia o le faaaloalo pe a tatalo atu iā te ia.
3. E faapefea ona tali mai le Atua i a tatou tatalo?
E tali mai o ia i le tele o auala. Ua saunia mai e Ieova lana Afioga le Tusi Paia, lea e masani ona maua ai tali o a tatou fesili. O le faitauina o le Afioga a le Atua, “e atamai ai le tagata e leai se poto masani.” (Salamo 19:7; faitau le Iakopo 1:5.) E na te foaʻi mai le filemu o le mafaufau pe a tatou fesagaʻia luʻi, ma uunaʻia ana auauna e fesoasoani mai iā i tatou pe a manaʻomia.
SAʻILIʻILI ATILI
Iloilo pe faapefea ona e tatalo atu i se auala e faafiafiaina ai le Atua, ma vaai pe faapefea ona e maua aogā mai le tatalo.
4. E iai faatulagaga a le Atua mo tatalo
E faapefea ona iloa e talia e le Atua a tatou tatalo? Faaali le VITIŌ.
E finagalo Ieova ia tatou tatalo atu iā te ia. Faitau le Salamo 65:2, ona talanoa lea i fesili nei:
-
Pe e te manatu e finagalo le “Faafofoga tatalo” e te tatalo atu iā te ia? Aiseā?
E tatau ona tatou ola e tusa ma tapulaa a le Atua, pe afai tatou te mananaʻo e faafofogaina a tatou tatalo. Faitau le Mika 3:4 ma le 1 Peteru 3:12, ona talanoa lea i le fesili lenei:
-
E faapefea ona tatou mautinoa o le a faafofoga le Atua i a tatou tatalo?
I taimi o taua, e ono tatalo uma vaegaʻau e lua mo le manumalo. Pe e faatalitalia o le a talia e le Atua a latou tatalo?
5. E tatau ona tatou tatalo mai le loto
Ua aʻoaʻoina nisi tagata ina ia aʻo faatauloto a latou tatalo. Ae po o le auala lenā e finagalo le Atua e tatou te tatalo atu ai iā te ia? Faitau le Mataio 6:7, ona talanoa lea i le fesili lenei:
-
E faapefea ona e ʻalofia le “tautū i upu masani” pe a e tatalo?
I aso taʻitasi, mafaufau i se faamanuiaga patino i lou olaga, ona e faafetai lea iā Ieova mo lenā faamanuiaga. Pe a e faia faapea i aso taʻitasi o le vaiaso, o le a e tatalo atu ai iā Ieova i ni mataupu eseese se fitu, nai lo le toe taʻua o le mataupu lava e tasi.
E manaʻo se tamā lelei ina ia talanoa atu lana fanau iā te ia mai i o latou loto. I se tulaga talitutusa, e finagalo foʻi Ieova ia tatou tatalo atu iā te ia, mai o tatou loto
6. O le tatalo o se meaalofa mai le Atua
E faapefea ona fesoasoani le tatalo iā i tatou, aemaise lava i taimi faigatā o tatou olaga? Faaali le VITIŌ.
Ua folafola mai i le Tusi Paia, e mafai ona fesoasoani le tatalo iā i tatou i le mauaina o le filemu o le mafaufau. Faitau le Filipi 4:6, 7, ona talanoa lea i fesili nei:
-
E ui e lē o taimi uma e mafai ai e le tatalo ona aveesea o tatou faafitauli, ae faapefea ona fesoasoani iā i tatou?
-
O ā nisi o mea e te manaʻo e tatalo atu ai?
E te silafia?
O le upu “amene” e uiga atu i le “o lea lava,” po o le “e mautinoa.” Talu mai taimi o le Tusi Paia, o le upu “amene” e taʻu i le taimi e faaiʻu ai tatalo.—1 Nofoaiga a Tupu 16:36.
7. Faaavanoa se taimi e tatalo ai
O nisi taimi o mea e tatou te pisi ai, e galo ai ona tatou tatalo. O le ā le tāua iā Iesu o le tatalo? Faitau le Mataio 14:23 ma le Mareko 1:35, ona talanoa lea i fesili nei:
-
O le ā sa faia e Iesu ina ia maua ai le avanoa e tatalo ai?
-
O ā taimi e te tatalo ai?
UA FAAPEA MAI NISI: “E maʻimau le taimi e tatalo ai e lē o faafofoga mai se isi.”
-
O le ā sou manatu?
AOTELEGA
O le tatalo mai le loto, e mafai ai ona tatou vavalalata atu i le Atua, maua ai le filemu o le mafaufau, ma maua ai le malosi manaʻomia e faafiafia ai Ieova.
Fesili Autalu
-
O ai e tatau ona tatou tatalo atu i ai?
-
E faapefea ona tatou tatalo?
-
O ā nisi o aogā o le tatalo?
MANATU FAAOPOOPO
Iloilo tali o fesili e masani ona tuufesili ai tagata e faatatau i le tatalo.
“Mea e Fitu e Tatau Ona E Iloa e Uiga i le Tatalo” (Le Olomatamata, Oketopa 1, 2010)
Iloilo māfuaaga tāua e tatau ai ona e tatalo, ma le auala e faaleleia ai au tatalo.
Iloilo po o ai o loo aʻoaʻo mai e le Tusi Paia e tatau ona tatou tatalo atu i ai.
I le vitiō musika lenei, mātau pe e tāua le nofoaga ma le taimi e tatou te tatalo ai.
E te Ono Fiafia Foʻi
FESILI E MASANI ONA LĀGĀ
O le ā le Talanoaga Faale-Tusi Paia o Loo Ofoina e Molimau a Ieova?
Ua ofo atu e Molimau a Ieova se suʻesuʻega faale-Tusi Paia e lē totogia, e mafai ona e faaaogāina ai so o se faaliliuga o le Tusi Paia. E mafai foʻi ona valaaulia lou aiga atoa po o au uō e auai ai.
