DILONGIESHA 09

Efubuile pepi n’Efile Mukulu mu luteko

TEEMESHA MU

We na lukalo lua nkunyingisha sunga nkukankamika su? Okumiina namu kuipusha pepi na Yehowa su? Luteko ndulombene nkukuasha mu mianda yoso. Biabia mushindo kinyi wibuwa odi mulombene kuteka? Efile Mukulu ateemeshaa nteko yoso? We kushinkamisha naminyi’shi Efile Mukulu ateemesha nteko yobe? Nyi biatukiebe kumona mu dino dilongiesha.

1. Nnanyi atudi balombene kuteka, na mbitu kinyi biatudi balombene kumuteka?

Yesu balongieshe’shi, abitungu tutekie nka Nshetu e miiyilu. Yesu nabene badi atekie Yehowa. Bambile’shi: “Bino nyi byanudia kwikala anutekye: ‘Nshetu e mwiyilu . . .’” (Mateo 6:9, EEM) Nsaa yatutekie Yehowa, atunyingisha kipuano kietu naye. Tui balombene kuteka Yehowa kintu kioso kiatudi nakio lukalo.

Biabia, bua’shi Efile Mukulu alule ku nteko yetu, abitungu tutekie bipushene na kikiebe ki’eshimba diaye. Bible akula’shi: “Su atutekye kintu kampanda, muyile kikyebe kye’shimba diaye, [Efile Mukulu] etupushiisha.” (1 Yowano 5:14, Kilombeno kipya 2014) Yesu batushishe bileshesho bia bintu batudi balombene kuteka. (Badika Mateo 6:9-13.) Kukatusha kuteka’nka pabitale nkalo yetu, tatulubanga kutumbula Efile Mukulu bua bioso biakuete kuitukitshina na kumuteka bua kukuasha bangi.

2. Tui kuteka mushindo kinyi?

Bible etunyingisha buatudia ‘kufungwila Efile Mukulu mashimba etu.’ (Misambo 62:8) Biabia, abitungu nteko yetu ikale ya binyibinyi na aitukila mu mashimba. Tui balombene kuteka n’eyi dikata sunga mundamunda, bakuname, bemane, bashale sunga mu ungi mushindo aulesha’shi atumunemeka. Tui balombene kumuteka nsaa yoso na mbalo yoso.

3. Efile Mukulu alulaa ku nteko yetu naminyi?

Etualulaa mu mishindo ilekenelekene. Yehowa muitupe Eyi diaye Bible, muamua ngi muatupetaa ngalulo ku nkonko yetu. Kubadika Eyi di’Efile Mukulu nkulombene “kupa bashii na lushingulwilo binangu.” (Misambo 19:7; badika Shake 1:5.) Mulombene kuitupa butaale bua mu binangu nsaa yatudi mu nkalakashi. Dingi mulombene kuitukuasha kukidila kui bakuetu bena Kidishitu buabadia kuitukuasha patudi mu lukalo.

TUKIMBUULE BOSO

Tutale biodia kuela nteko aitukila muishimba na aisankisha Efile Mukulu na mushindo waidi ilombene nkukuasha.

4. Kui mianda aitungu kulombasha bua’shi Efile Mukulu apushe nteko yetu

Mianda kinyi ilombene kukutshishua Efile Mukulu kupusha nteko yetu sunga kuiyitemesha. Tala VIDEO.

VIDEO: Efile Mukulu apushaa nteko yoso su?—Kapindi (2:42)

Yehowa akumina’shi tumutekie. Badika Misambo 65:2, akupu nuisambile ino nkonko ailondo:

Omono’shi uno “apusha nteko” akumina bodia kumuteka? Buakinyi wamba biabia?

Abitungu tuikitshishe bua kuikala na nshalelo muipushena na mayi a kulonda a Efile Mukulu bua’shi apushe nteko yetu. Badika Mika 3:4 na 1 Mpyeele 3:12, akupu nuisambile luno lukonko alulondo:

Tui kushinkamisha naminyi’shi Yehowa atemesha nteko yetu?

Mu ngoshi, basalai ba mpese yoso ibidi, abatekaa bua kutshimuna ngoshi. Efile Mukulu namu, e kualula ino nteko i bino?

5. Abitungu nteko yetu ikatukile kuishimba

Bangi bantu mbebalongieshe buabadia kuambuula nka bishima bimune mu nteko yabo. Biabia, bino nyi abikumina Efile Mukulu’shi tumutekie su? Badika Mateo 6:7, akupu nuisambile luno lukonko alulondo:

We kuleka “kwalushenanga myaku imune” mu nteko yobe naminyi?

Efuku dioso, we mulombene kunangushena ku muabi kampanda wabadi bakuelele kui Yehowa na kumutumbula bua uno muanda. Su tuakita bino efuku dioso, munda mua lubingo atuikala na mianda musambobidi ilekene yatumutumbula pamutue pa kuambuula bishima.

Nshe bana e buwa akuminaa’shi bana baye bamulungule mianda aikatukila mu mashimba aabo. Mu mushindo umune Yehowa akumina’shi tumutekie mianda aikatukila mu mashimba eetu

6. Luteko nyi kiabuntu akifiki kui Efile Mukulu

Luteko lui kuitunyingisha naminyi biatuikala mu nsaa ibuwa sunga mu nsaa ya nkalakashi? Tala VIDEO.

VIDEO: Luteko aluitukuasha bua kunyingila (1:32)

Bible etulaa’shi luteko ndulombene kuitukuasha bua kupeta butaale bua binyibinyi mu binangu. Badika Beena-Fidipe 4:6, 7, akupu nuisambile ino nkonko ailondo:

Sunga biekala’shi luteko talupuiyaa mianda yoso yatudi nayo, ndulombene kuitukuasha naminyi?
Okumina kuteka pabitale kinyi?

Oukanga su?

Kishima “amene” akilesha’shi “bya binyibinyi” sunga’shi “bikale’nka byabya.” Kubanga kala, kishima “amene” abadi abekiele ku nfudilo kua luteko.—1 Myanda 16:36.

7. Tuula luteko pa mbalo ya kumpala

Ingi nsaa tui kuikala na bibungi bia kukita, tualuba mpa na kukita luteko. Luteko lubadi na muulo kinyi mu nshalelo a Yesu? Badika Mateo 14:23 na Maako 1:35, akupu nuisambile ino nkonko ailondo:

Yesu badi akitshi kinyi buadia kupeta nsaa ya kuteka?
Nsaa kinyi yodi mulombene kumona bia kuteka?

BANGI ABAMBA’SHI: “Luteko lui nka bu kukisha kua nsaa muanda takui muntu akuteemesha.”

Obe namu wamba naminyi?

MU KIKOSO

Luteko alukatukila kuishimba aluituikasha pepi n’Efile Mukulu, aluitupa butaale bua mu binangu, aluitupa bukome buatudi nabo lukalo bua kusankisha Yehowa.