LES 09

Begi o yepi yu fu tron wan mati fu Gado

PREI

Yu abi rai fanowdu son leisi? Yu e suku piki tapu den prenspari aksi fu a libi? Yu abi trowstu fanowdu? Yu wani tron wan mati fu Yehovah? Begi kan yepi yu nanga ala den sani disi. Ma fa yu musu begi? Gado e arki ala begi? San yu musu du efu yu wani taki Gado arki den begi fu yu? Meki wi go luku san na a piki fu den aksi disi.

1. Suma wi musu begi èn fu sortu sani wi kan begi?

Yesus ben leri wi taki wi musu begi soso Yehovah, wi Papa na hemel. Yesus srefi ben begi Yehovah. A taki: „Un musu begi so: ’Wi Tata na hemel . . . ’” (Mateyus 6:9). Te wi e begi Yehovah, wi e tron moro bun mati fu en.

Wi kan taki nanga Gado fu iniwan sani. Ma efu wi wani taki Gado arki den begi fu wi, dan wi musu aksi en sani di a feni bun. Bijbel e taki: „Wi sabi taki awansi san wi e aksi [Gado], a e yere wi, solanga a e kruderi nanga a wani fu en” (1 Yohanes 5:14). Yesus ben sori wi fu sortu sani wi kan begi. (Leisi Mateyus 6:9-13.) Wi kan begi fu den sani di wi abi fanowdu. Ma wi no musu frigiti fu gi Gado tangi fu den sani di a du gi wi èn fu aksi en fu yepi trawan.

2. Fa wi musu begi?

Bijbel e taki dati wi kan ’fruteri Gado ala san de na tapu wi ati’ (Psalm 62:8). Disi e sori taki wi kan taigi Gado fa wi e firi èn fa wi e denki. Te wi e begi wi kan taki nanga wan tranga sten noso wi kan taki ini wisrefi. Yehovah no taki dati wi musu sidon, kindi noso tanapu te wi e begi. San prenspari na taki wi e sori lespeki gi en. Wi kan begi na iniwan ten èn awinsi pe wi de.

3. Fa Gado e piki den begi fu wi?

A e du dati na difrenti fasi. Yehovah gi wi en Wortu, Bijbel, pe wi kan feni piki tapu furu fu den aksi fu wi. Bijbel e meki a sma di no abi „ondrofeni kisi koni” (Psalm 19:7; leisi Yakobus 1:5). Yehovah kan yepi wi fu no bruya te wi abi problema. Èn a kan meki den anbegiman fu en yepi wi te wi de na nowtu.

SORTU TRA SANI YU KAN LERI?

Wi o si fa yu musu begi efu yu wani taki Gado arki yu. Wi o si tu fa begi kan yepi yu.

4. Gado e arki ala begi?

Fa wi musu libi efu wi wani taki Gado arki den begi fu wi? Prei a FELEM.

FELEM: Gado e arki ala begi?—Wan syatu pisi (2:42)

Yehovah wani taki wi taki nanga en. Leisi Psalm 65:2 èn taki fu den aksi disi:

Yu denki taki „a sma di e arki begi” wani taki yu taki nanga en? Fu san ede yu piki so?

Wi musu gi yesi na den wet fu Gado efu wi wani taki a arki den begi fu wi. Leisi Mika 3:4 nanga 1 Petrus 3:12 èn taki fu na aksi disi:

San wi musu du efu wi wani taki Yehovah arki den begi fu wi?

Te feti de, dan ala tu legre e begi Gado fu yepi den fu wini a feti. Yu denki taki Gado e arki den begi disi?

5. Wi musu fruteri Yehovah san de na tapu wi ati

Son sma leri taki te den e begi, den musu taki den srefi sani ibri tron baka. Ma na so Gado wani taki wi musu begi? Leisi Mateyus 6:7 èn taki fu na aksi disi:

San o yepi yu fu no taki „den srefi sani ibri leisi baka” te yu e begi?

Ibri dei yu kan prakseri wan moi sani di Yehovah du gi yu, dan yu kan taki en tangi fu dati. Efu yu du disi ala dei, wan heri wiki langa, dan na a kaba fu a wiki yu begi fu seibi difrenti sani.

Wan bun papa wani taki en pikin e taigi en fa a e firi. Yehovah wani tu taki wi fruteri en san de na tapu wi ati

6. Begi na wan kado fu Gado

Fa begi kan yepi wi na ini bun ten èn na ini muilek ten? Prei a FELEM.

FELEM: Begi e yepi wi na ini muilek ten (1:32)

Bijbel e sori wi taki begi kan yepi wi fu no bruya. Leisi Filipisma 4:6, 7 èn taki fu den aksi disi:

Begi no e puru ala den problema fu wi, ma fa a e yepi wi?
Fu sortu sani yu ben o wani begi?

Yu ben sabi a sani disi?

A wortu „amen” wani taki „na so a de” noso „fu tru”. Sensi Bijbel ten sma e taki „amen” te den kaba begi.—1 Kroniki 16:36.

7. Meki ten fu begi

Son leisi wi abi so furu fu du taki wi e frigiti fu begi. O prenspari begi ben de gi Yesus? Leisi Mateyus 14:23 nanga Markus 1:35 èn taki fu den aksi disi:

Fa Yesus ben meki ten fu begi?
O ten yu kan begi?

SON SMA E TAKI: „Begi na lasi ten. Nowan sma no e arki.”

San yu ben o piki den?

SAN YU LERI?

Te wi e begi wi musu taigi Gado san de na tapu wi ati. Te wi e begi so, dan wi o tron mati fu Gado. A o yepi wi fu no bruya èn a o gi wi a krakti fu du san a feni bun.