SIFUNDVO 09
Sondzela KuNkulunkulu Ngemthantazo
Wake weva yini ungatsi udzinga kucondziswa ekuphileni? Ikhona yini imibuto lonayo lodzinga timphendvulo tayo? Udzinga kudvudvutwa yini nome kucinisekiswa? Ungatsandza yini kusondzelana naJehova? Umthantazo ungakusita kuto tonkhe letintfo, kodvwa nguyiphi indlela lekahle yekuthantaza? Nkulunkulu uyilalela yonkhe yini imithantazo? Yini longayenta kuze uciniseke kutsi Nkulunkulu uyayiva imithantazo yakho? Ase sibone.
1. Ngubani lokufanele sithantaze kuye, futsi yini lokufanele siyithantazele?
Jesu wasifundzisa kutsi kufanele sithantaze kuphela kuBabe wetfu losezulwini. Naye lucobo lwakhe wathantaza kuJehova, watsi: “Ngako-ke kufanele nithantaze ngalendlela: ‘Babe wetfu losemazulwini . . .’” (Matewu 6:9) Nasithantaza kuJehova, buhlobo betfu naye buyacina.
Singathantazela nobe ngabe yini. Kodvwa kuze Nkulunkulu ayiphendvule imithantazo yetfu, kufanele ivumelane nentsandvo yakhe. “Nobe yini lesiyicelako kuNkulunkulu levumelana nentsandvo yakhe, yena uyasiva.” (1 Johane 5:14) Jesu wasinika sibonelo setintfo letikahle lokufanele sitithantazele. (Fundza Matewu 6:9-13.) Ngetulu kwekuthantazela tintfo letisikhatsatako, kufanele singakhohlwa kubonga Nkulunkulu ngato tonkhe tintfo lasentele tona, siphindze simcele asite nalabanye.
2. Kufanele sithantaze njani?
LiBhayibheli lisikhutsata kutsi ‘sitjele [Nkulunkulu] konkhe lokusetinhlitiyweni tetfu.’ (Tihlabelelo 62:8) Imithantazo yetfu kufanele isuke enhlitiyweni. Singathantaza siphumisele nobe sithantaze ngetinhlitiyo, futsi sikunobe ngusiphi simo semtimba lesikhombisa kutsi siyamhlonipha Jehova. Singathantaza nobe ngukuphi nanganobe ngusiphi sikhatsi.
3. Nkulunkulu uyiphendvula njani imithantazo yetfu?
Nkulunkulu uphendvula imithantazo ngetindlela letehlukahlukene. Usinikete liVi lakhe liBhayibheli, lapho sitfola khona timphendvulo temibuto lesinayo. Kufundza liVi laNkulunkulu “kuyabahlakaniphisa labete lwati.” (Tihlabelelo 19:7; fundza Jakobe 1:5.) Angasenta sibe nekuthula kwengcondvo nasinetinkinga, futsi angenta tikhonti takhe tisisite nasidzinga lusito.
CHUBEKA UFUNISISA
Hlola loko lokungakusita kuze uthantaze ngalokusuka enhlitiyweni futsi utfole indlela umthantazo longakusita ngayo.
4. Nkulunkulu ufuna sithantaze ngendlela layemukelako
Ngutiphi tintfo letenta imithantazo yetfu yemukeleke kuNkulunkulu nobe ingemukeleki? Dlala le-VIDEO.
Jehova ufuna sithantaze kuye. Fundza Tihlabelelo 65:2, bese nicoca ngalemibuto:
-
Ucabanga kutsi uMuvi wemithantazo uyafuna yini kutsi wena uthantaze kuye? Kungani utsi yebo nobe utsi cha?
Kufanele siphile ngendlela Nkulunkulu lafuna ngayo nasifuna kutsi ayilalele imithantazo yetfu. Fundza Mikha 3:4; na-1 Phetro 3:12, bese nicoca ngalombuto:
-
Yini lengasenta siciniseke kutsi Jehova utayilalela imithantazo yetfu?
Nakunemphi, emacembu lalwako angathantazela kuncoba. Kungaba nengcondvo yini kulindzela kutsi Nkulunkulu ayiphendvule lemithantazo?
5. Kufanele sitjele Jehova indlela lesitiva ngayo
Labanye bantfu bafundziswe kutsi kufanele baphindzaphindze umthantazo munye, kodvwa ngulena yini indlela Nkulunkulu lafuna sithantaze ngayo? Fundza Matewu 6:7, bese nicoca ngalombuto:
-
Yini longayenta kuze “ungaphindzaphindzi intfo yinye” emthantazweni wakho?
Lilanga ngalinye, cabanga ngentfo Jehova lakwentele yona bese uyathantaza uyambonga. Nawutawukwenta loku kuze kuphele liviki, utawube ubonge Jehova ngetintfo letisikhombisa letehlukahlukene ngaphandle kwekuphindzaphindza intfo yinye.
Babe lonelutsandvo ufuna kutsi umntfwana wakhe akhulume naye ngalokusuka enhlitiyweni. Ngendlela lefanako, Jehova ufuna sithantaze kuye ngalokusuka enhlitiyweni
6. Umthantazo usipho lesikhetsekile lesisiphiwe nguNkulunkulu
Umthantazo ungasisita njani etikhatsini letimnandzi naletimatima? Dlala le-VIDEO.
LiBhayibheli letsembisa kutsi umthantazo ungasisita sibe nekuthula kwengcondvo. Fundza KubaseFiliphi 4:6, 7, bese nicoca ngalemibuto:
-
Ngisho nobe umthantazo ungaticedzi tinkinga tetfu, kodvwa usisita njani?
-
Ngutiphi letinye tintfo longatsandza kuthantaza ngato?
Bewati yini?
Ligama lelitsi “amen” lisho kutsi “noma kanjani” nobe “akube njalo.” Kusukela ngetikhatsi tekubhalwa kweliBhayibheli bantfu bebatsi “amen” nabacedza kuthantaza.—1 Tikhronike 16:36.
7. Tinike sikhatsi sekuthantaza
Ngalesinye sikhatsi sibamatasatasa kakhulu size sikhohlwe nekuthantaza. Bewubaluleke kangakanani umthantazo kuJesu? Fundza Matewu 14:23 naMakho 1:35, bese nicoca ngalemibuto:
-
Yini Jesu layenta kuze abe nesikhatsi sekuthantaza?
-
Ungasitfola nini sikhatsi sekuthantaza?
LABANYE BANTFU BATSI: “Umthantazo awusiti ngalutfo, umane nje ukwente utive uncono.”
-
Wena utsini?
LOKO LESICOCE NGAKO
Imithantazo lesuka enhlitiyweni isisondzeta kuNkulunkulu, isinike kuthula kwengcondvo, iphindze isinikete emandla lesiwadzingako kuze sijabulise Jehova.
Yini Loyifundzile?
-
Ngubani lokufanele sithantaze kuye?
-
Kufanele sithantaze njani?
-
Kusisita ngani kuthantaza?
LOKUNYE LONGAKUHLOLA
Tfola timphendvulo temibuto bantfu labavamise kuyibuta ngemthantazo.
“Tintfo Letisikhombisa Lokufanele Utati Ngemthantazo” (Sicongosekulindza saNovember 1, 2010)
Fundza kutsi kubaluleke ngani kuthantaza kanye nendlela longayitfutfukisa ngayo imithantazo yakho.
Cabanga ngaloko liBhayibheli lelikufundzisako ngekutsi kufanele sithantaze kubani.
“Kufanele Yini Ngithantaze KuboSantha?” (Sihloko lesiku-internet)
Kule-video yemculo, naka kutsi kunendzaba yini kutsi uthantaza ukuphi nobe nini.
Lokunye Longatsandza Kukuhlola
IMIBUTO BANTFU LABAVAMISE KUYIBUTA
Siyini Sifundvo SeliBhayibheli Lesichutjwa BoFakazi BaJehova?
Ungasebentisa nobe ngabe nguliphi lihumusho leliBhayibheli nawutadisha naBoFakazi BaJehova. Ukhululekile kumema umndeni wakho wonkhe nobe bangani bakho kutsi babe khona nawufundza.
