PĚNGANGĚNDUNGANG 09

Pẹ̌těngkaranịe su Mawu bọu Daroa

MAINKAN

Apa i kau bọu nẹ̌pěndang i kau membutuhkan laahạ su pěbawiahẹ̌? Apa piạ kakiwal᷊o penting kụ sasimbahe mapulu kasingkatengu? Apa i kau membutuhkan sěmangatẹ̌ dingangu pělahiborẹ̌? Apa i kau mapulu makapěndang limembong marani dingangi Yehuwa? Daroa makatul᷊ung si kau makaěbạ kěbị ene. Katewe, kerea cara nihino gunang mẹ̌doa? Apa Mawu dụdaringihẹ̌ kěbị daroa? Apa wotonge koatengu gunang makasingkạ i Sie sarung sumimbahẹ̌ daroanu? Mahi měmanda sasimbahe.

1. Si sai i kitẹ harusẹ̌ mẹ̌doa, kụ manga hal᷊ẹ̌ apa harusẹ̌ doang i kitẹ?

Yesus něněntiro i kitẹ harusẹ̌ mẹ̌doa kětạeng si Amang su sorga. Yesus lai nẹ̌doa si Yehuwa. I sie nẹ̌bera, ”Hakị u ene pẹ̌doạe kere ini: ’I Amang i kami su sorga . . . ’” (Matius 6:9) Su tempong mẹ̌doa si Yehuwa, pẹ̌dal᷊ahapị i kitẹ dingang’E sarung makoạ limembong matoghasẹ̌.

I kitẹ botonge mẹ̌doa soal u haghing hal᷊ẹ̌. Katewe, tadeạu Mawu sumimbahẹ̌ daroang i kitẹ, ene harusẹ̌ mẹ̌tatahino dingangu kapulu-Ne. ’Mạeng i kitẹ mẹ̌dorong haghing hal᷊ẹ̌ kụ nẹ̌tatahino dingangu kapulung Mawu, i Sie dumaringihẹ̌ si kitẹ.’ (1 Yohanes 5:14) Yesus něgělị contoh soal u manga hal᷊ẹ̌ nẹ̌tatahino gunang doang i kitẹ. (Basa Matius 6:9-13.) Su tempong mẹ̌doa, abe kětạeng makitul᷊ung gunang tumatěngo masalah. I kitẹ lai harusẹ̌ makitarimakasẹ su Mawu ual᷊ingu apa seng nikoạ’E gunang i kitẹ. Bọu ene lai, i kitẹ harusẹ̌ mẹ̌doa gunang taumata wal᷊inẹ.

2. Kerea i kitẹ harusẹ̌ mẹ̌doa?

Alkitapẹ̌ němahangsang si kitẹ gunang ’mẹ̌běke lohongu naung i kitẹ su Mawu.’ (Mazmur 62:8) Hakị u ene, daroang i kitẹ harusẹ̌ kahěngang-hěngang bọu naung. I kitẹ botonge mẹ̌doa piạ tingihe arau su ral᷊ungu naung, kụ posising i kitẹ harusẹ̌ měnodẹ i kitẹ měngẹ̌ngadatẹ̌ Mawu. I kitẹ botonge mẹ̌doa su haghing tempo dingangu haghing tampạ.

3. Kerea Mawu sumimbahẹ̌ daroang i kitẹ?

I Sie měpẹ̌pakẹ haghing cara. Yehuwa seng něnadia Hangetang’E, Alkitapẹ̌, kụ sene i kitẹ botonge makaěbạ sasimbahu manga kakiwal᷊ong i kitẹ. Mẹ̌basa Hengetangu Mawu botonge ”makakoạ taumata apang tawẹ apa pengalaman makoạ matahuěna”. (Mazmur 19:7; basa Yakobus 1:5.) Yehuwa botonge měgělị dame su naung su tempong i kitẹ tumatěngo haghing masalah. Kụ i Sie lai botonge měpakẹ manga ělang’E gunang mẹ̌tul᷊ung si kitẹ su tempong i kitẹ membutuhkan tul᷊umang.

BANGKA PAKARAL᷊UNG

Mahịe měmanda daroa kerea makal᷊uasẹ̌ naungu Mawu dingangu apa gunane si kau mạeng i kau mẹ̌doa.

4. Mawu mapulu dumaringihẹ̌ daroa kerea?

Apa makakoạ daroang i kitẹ tarimakengu Mawu arau tawe tarimakeng’E? Pẹ̌biala VIDEONE.

VIDEO: Apa Mawu Dụdaringihẹ̌ Kěbị Daroa?—Cuplikan (2:42)

Yehuwa mapulu i kitẹ mẹ̌doa si Sie. Basa Mazmur 65:2, bọu ene bisarai kakiwal᷊o ini:

Tumuhụ si kau, apa ”Dumararingihẹ̌ daroa” mapulu i kau mẹ̌doa si Sie? Kawe nụe i kau simimbahẹ̌ kerene?

I kitẹ harusẹ̌ měbiahẹ̌ tuhụ atorangu Mawu mạeng i kitẹ mapulu daroang i kitẹ daringihang’E. Basa Mikha 3:4 dingangu 1 Petrus 3:12, bọu ene bisarai kakiwal᷊o ini:

Apa harusẹ̌ koateng i kitẹ tadeạu Yehuwa dumaringihẹ̌ daroang i kitẹ?

Su tempong perang, darua pasukan tentara kěbị nẹ̌doa tadeạu makauntung. Apa Mawu sarung dumaringihẹ̌ daroang i sire?

5. Daroang i kitẹ harusẹ̌ kahěngang-hěngang bọu naung

Lawọ taumata seng nitěntiro gunang mẹ̌sěbạ bawera mẹ̌sul᷊ung su tempong mẹ̌doa. Katewe, apa Mawu mapulu i kitẹ mẹ̌doa kerene? Basa Matius 6:7, bọu ene bisarai kakiwal᷊o ini:

Kerea tadeạu i kau tawe ”měngkate maul᷊ị bawera mẹ̌sul᷊ung” su daroanu?

Sabang ěllo, kěnang pẹ̌tiněna sěmbaụ al᷊amatẹ̌ seng nitarimạu, kụ pakitarimakasẹe si Yehuwa ual᷊ingu al᷊amatẹ̌ ene. Mạeng i kau měkoạ ene su ral᷊ungu sěngkamisa, i kau sarung mẹ̌doa soal u pitu hal᷊ẹ̌ nẹ̌tatěntang, kụ tawe měngkate maul᷊ị hal᷊ẹ̌ mẹ̌sul᷊ung.

Matimadẹ̌ esẹ mapia tantu mapulu anạe mẹ̌běke lohong naunge si sie. Yehuwa lai mapulu i kitẹ mẹ̌doa si Sie bọu naung

6. Daroa kai hadiah bọu Mawu

Kerea daroa botonge makatoghasẹ̌ si kitẹ su tempo mal᷊uasẹ̌ dingangu su tempo masigěsạ? Putarẹ̌ VIDEONE.

VIDEO: Daroa Nakatul᷊ung si Kami Tatapẹ̌ Nẹ̌tatahang (1:32)

Alkitapẹ̌ nẹ̌diandi daroa makatul᷊ung si kitẹ makapěndang dame su naung. Basa Filipi 4:6, 7, bọu ene bisarai manga kakiwal᷊o ini:

Maning daroa tawe sěntiniạ makailang masalang i kitẹ, kerea ene makatul᷊ung si kitẹ?
I kau mapulu mẹ̌doa soal u apa?

Apa i kau masingkạ?

Bawera ”amin” mangal᷊ene ”kariadiko kerene”, arau ”pasti”. Dongkeng zaman Alkitapẹ̌, bawera ”amin” sẹ̌sěbạkeng su pěngěngsuengu daroa.—1 Tawarikh 16:36.

7. Pěnadia tempo gunang mẹ̌doa

Pẹ̌sěngsul᷊ẹ, i kitẹ tumanịu masibukẹ̌ sarang niwul᷊e mẹ̌doa. Si Yesus, mẹ̌doa kai sěbạe penting. Basa Matius 14:23 dingangu Markus 1:35, bọu ene bisarai manga kakiwal᷊o ini:

Kerea Yesus něnadia tempo gunang mẹ̌doa?
Kange i kau botonge měnadia tempo gunang mẹ̌doa?

PIẠ U NAUL᷊Ị: ”Mawu marěngụ sumimbahẹ̌ daroang i kitẹ.”

Kerea tumuhụ si kau?

RINGKASAN

Mạeng i kitẹ mẹ̌doa bọu naung, i kitẹ botonge marani dingangu Mawu, matěnang su tempong tumatěngo masalah, dingangu limembong mapulu tumuhụ si Yehuwa.