LISOMO LYA 09
Mupalame Leeza Kupitila Lipepo
Lipepo kunti lyakukwasia mu nzila ingi. Kwa mufuano, kunti lyakukwasia kupata butunguluzi mu buikazi bobe kabili kunti lyakukwasia musita luukebele kupata byasuko bya biipuzio byobe bya mana. Kabili, lipepo kunti lyakukwasia musita luukebele kuteekiiwa mutima ao kukoseleziiwa. Kuongezia pakaako, kunti lyakukwasia umupalame Yehova. Inzi kunti waiipuzia, ‘Ni namuna ki iweeme ya kupepelamo? Eba, Leeza ali watuilizia mapepo onse? Kunti nakita siani eevi ngie nali ni kisinka nangue Leeza wakaba kutuilizia mapepo ane?’ Tumone.
1. Tupalile kupepa kuli ni, kabili tupalile kupepa palua ki?
Yesu waasambiliziizie nangue tupalile kupepasie kuli Baba weetu wa ku muulu. Yesu ye muine waapepele kuli Yehova. Waalandile eevi: “Kansi, mupalile kupepa eevi: ‘We Baba weetu wa ku muulu . . .’” (Mateo 6:9, NWT) Musita utuli twapepa kuli Yehova, tuli twakosia bukibuza bwetu pamo nakue.
Kunti twapepa palua kila kintu. Kakiine, pakuti Leeza aasuke mapepo etu, azo mapepo apalile kuya apateene ni kutona kwakue. “Kine twamuloomba Leeza kubalua kantu kukoonkana ni mwatoneene, ali watunvua.” (1 Yoane 5:14) Yesu waaleetele mufuano wa bintu bipalile kubiikua mu lipepo. (Some Mateo 6:9-13.) Kuongezia pa beelia bituli twapepa palua bintu byetu fwe beene, te tupalile kulaba kumutasia Leeza palua beelia byakitukitila, ni kumuloomba abakwasieko ni bantu bange.
2. Tupalile kupepa siani?
Bibilia ili yatulanda “tumupalamine Leeza na mitima ya kisinka ni kiketekelo kya kiine.” (Baebrania 10:22) Pakaako, tupalile kupepa kwa mutima weetu onse. Kunti twapepa lizui lyaunvuikile ao twapepela ku mutima. Kunti twapepa twafukeeme, twaimeene, twaikeele, inzi kintu kya mana saana ni kupepa kuli Yehova twali ni mukinzi. Kunti twapepa nsa yonse ni ku fuasi yonse.
3. Leeza ali waasuka siani mapepo etu?
Ali waasuka mu nzila ingi. Yehova watupeele Mulandu wakue, Bibilia. Lingi mu keekio kitabu tuli twapatamo byasuko bya biipuzio byetu. Nga vilandile Malumbo 19:7, kusoma Mulandu Wakue Leeza “[kuli kwalengia] muntu asili na kibeelezio aaluke ni mulangue.” (Some Yakobo 1:5.) Yehova kunti watupeela mutende wa mu maano kine twaaluka mu maavia. Kabili kunti wabombia babombi bakue eevi batukwasie musita utukebele kakiine kukwasiiwa.
TUKEBE SAANA
Tumone vyakukita eevi tupepe mu nzila elia ili kumusaansamusia Leeza, kabili tumone kupepa vikuli kutukwasia.
4. Leeza alandile bya kuti tukite eevi atuilizie mapepo eetu
Ni bintu ki bili byalengia mapepo etu atuiliziiwe ao te kuti atuiliziiwe na Leeza? Mone VIIDEO.
Yehova atonene tupepe kuli weene. Some Malumbo 65:2, kisia londoluele beebi biipuzio:
-
Eba, watontonkania nangue “Katuilizia wa lipepo” atonene weewe upepe kuli weene? Juu ya ki walanda evio?
Kine tutonene Leeza atuilizie mapepo etu, tupalile kuya twaikeele twakoonkele mafunde akue mu buikazi bwetu. Some Mika 3:4 ni 1 Petro 3:12, kisia londoluele keeki kiipuzio:
-
Kunti twakita ki eevi tuye twali ni kisinka nangue Yehova wakaba kutuilizia mapepo etu?
Musita wa bului ao vita, kila kikundi kya basoda kili mukupepa eevi kiviinde kuuma baluani babo ku vita. Eba, kunti twaswapila kakiine nangue Leeza ali kwasuka azo mapepo?
5. Mapepo etu apalile kufuma ku mutima
Bantu bange, basambiliziiziwe kuya babweluluka mu mapepo enka aalia. Eba, Leeza i vyatonene tuye twapepa evio kuli weene? Some Mateo 6:7, (NWT), kisia londoluele keeki kiipuzio:
-
Kunti wakita siani eevi te kunti uye walanda “wabweluluka mu bintu beelia byenka” mu mapepo obe?
Kila busiku, kunti watontonkania palua kintu kimo kiweeme kiwapata mu buikazi boobe, kisia mutasie Yehova juu ya keekio kintu. Kine wakita evio kila busiku, mu mulungu umo, uli kupepa palua bintu saba bipusene-puseene bila kubwelelela mu bintu beelia byenka.
Baba aweeme ali watona mwana wakue amubuile bintu byali nabio ku mutima. Yehova ni weene, atonene tupepe kuli weene twamubuila bintu bili ku mutima weetu
6. Lipepo ni bupe kufuma kuli Leeza
Lipepo kunti lyatupeela siani maka mu nsita iweeme ni mu nsita ibiipile? Mone VIIDEO.
Bibilia ilaile nangue lipepo kunti lyatukwasia kwaluka ni mutende wa kisinka mu maano. Some Bafilipi 4:6, 7, kisia londoluele beebi biipuzio:
-
Anzia kine lyonse lipepo telizi kupuisia maavia etu, lili lyatukwasia siani?
-
Ni bintu ki paleepale biuli kutona kubiika mu lipepo lyobe?
Eba, wakiba wamanine?
Mulandu “amen” mana yakue “evio sile”, “kibe evio” ao “kakiine.” Ntangia kale, mulandu “amen” waali walandua ku mpela ya lipepo.—1 Milandu ya Nsiku 16:36.
7. Kebako musita wa kupepa
Musita unge kunti twaya twali ni bingi byakukita, kisia twalaba ni kupepa. Lipepo lyaali lya mana sana kuli Yesu. Kiki kyalangilila evio? Some Mateo 14:23 ni Marko 1:35, kisia londoluele beebi biipuzio:
-
Yesu waakitile ki eevi apateko musita wa kupepa?
-
Weewe umwene nangue ni nsa ki iuli kupatako musita wa kupepa?
BANGE BALI BALANDA: “Kupepa tekuli na faida, Leeza teezi kwasuka mapepo ane.”
-
Kunti walanda siani?
MU KIFUPI
Mapepo afumine ku mutima ali atupalamika kuli Leeza, atupeela mutende wa mu maano, kabili ali atupeela maka atukabiile eevi kumusaansamusia Yehova.
Kunti waasuka siani?
-
Tupalile kupepa kuli ni?
-
Tupalile kupepa siani?
-
Ni mpaalo ki ituli twapata kine twapepa?
MANAKO NI BINGE
Mona byasuko bya biipuzio bili byaipuzia saana bantu bengi palua lipepo.
“Bintu Saba Biupalile Kumana Palua Lipepo” (Lupungu Lwakue Kamwenenena, lwa 01/10/2010)
Mona juu ya ki upalile kupepa, kabili kunti wakita siani eevi kuwaamia mapepo obe.
“Juu ya ki Mpalile Kupepa?” (Lyasi lili mu Kitente kya Enternete)
Mona Bibilia viili yasambilizia kine tupalile kupepa kuli ni.
“Eba, Mpalile Kupepa ku Batakatiifu?” (Lyasi lili mu Kitente kya Enternete)
Mu eezi viideo ya muziki, mona kine ilisie buino kupepa fuasi yonse ao nsa yonse.
