LISAUN 09
Hakbesik ba Maromak liuhusi orasaun
Ita sente katak Ita presiza matadalan ba Ita-nia moris ka lae? Ita hakarak hetan ajuda hodi rezolve problema sira? Ita hakarak sente kmaan? Ita hakarak sente besik liu ho Jeová ka lae? Orasaun bele ajuda Ita ho buat sira-neʼe. Maibé oinsá mak atu halo orasaun iha dalan neʼebé loos? Maromak rona ba orasaun hotu ka lae? Saida mak Ita presiza halo atu Maromak rona ba Ita-nia orasaun? Mai ita haree toʼok.
1. Ita tenke halo orasaun ba sé, no orasaun kona-ba saida?
Jesus hanorin katak ita tenke halo orasaun ba ita-nia Aman iha lalehan. Jesus rasik mós halo orasaun ba Jeová. Nia hatete: “Imi tenke halo orasaun hanesan neʼe: ‘Ami Aman iha lalehan . . .’” (Mateus 6:9) Kuandu ita halo orasaun ba Jeová, ita-nia relasaun ho nia sei sai metin liu.
Ita bele husu buat naran deʼit iha orasaun, naran katak tuir Maromak nia hakarak. Se ita halo nuneʼe, Jeová sei hatán ba ita-nia orasaun. Bíblia dehan: ‘Buat naran deʼit neʼebé ita husu hodi tuir Maromak nia hakarak, nia rona ita.’ (1 João 5:14) Jesus fó ezemplu balu kona-ba saida mak ita bele temi iha orasaun. (Lee Mateus 6:9-13.) Maski ita halo orasaun kona-ba ita-nia presiza, ita labele haluha atu hatoʼo agradese ba buat neʼebé Maromak halo ona mai ita no husu katak nia mós sei ajuda ema seluk.
2. Iha dalan oinsá mak ita tenke halo orasaun?
Bíblia anima ita atu ‘fakar sai ita-nia laran iha Maromak nia oin’. (Salmo 62:8) Tan neʼe, ita tenke halo orasaun husi laran. Ita bele halo orasaun ho lian, ka iha laran deʼit no ho pozisaun naran deʼit neʼebé hatudu respeitu. Ita bele halo orasaun iha tempu no fatin naran deʼit.
3. Oinsá mak Maromak hatán ba ita-nia orasaun?
Maromak hatán ita-nia orasaun iha dalan oioin. Jeová fó mai ita ninia Liafuan, Bíblia, neʼebé bele hatán ba ita-nia pergunta sira. Lee Maromak nia Liafuan bele “halo ema neʼebé la iha esperiénsia sai matenek”. (Salmo 19:7; lee Tiago 1:5.) Nia bele halo ita sente dame iha laran kuandu hasoru susar. No nia bele book ninia atan sira atu ajuda ita kuandu ita presiza.
KEʼE KLEʼAN
Buka-hatene oinsá mak Ita bele halo orasaun neʼebé Maromak simu, no oinsá mak orasaun bele ajuda Ita.
4. Halo orasaun tuir dalan neʼebé Maromak hakarak
Oinsá mak Maromak bele rona ba ita-nia orasaun? Loke VÍDEO.
Jeová hakarak ita halo orasaun ba nia. Lee Salmo 65:2, depois koʼalia hamutuk kona-ba pergunta tuirmai:
-
Ita hanoin “Maromak neʼebé rona ba orasaun” hakarak Ita rasik halo orasaun ba nia ka lae? Tanbasá?
Atu Maromak rona ita-nia orasaun, ita tenke hakaʼas an halo tuir nia. Lee Miqueias 3:4 no 1 Pedro 3:12, depois koʼalia hamutuk kona-ba pergunta tuirmai:
-
Saida mak ita presiza halo atu Jeová rona ba ita-nia orasaun?
Durante tempu funu, parte ida-idak halo orasaun atu bele manán. Lójiku ka lae katak Maromak sei hatán ba orasaun sira-neʼe?
5. Ita-nia orasaun tenke mai husi laran
Ema balu hanoin katak sira tenke dekór orasaun no repete liafuan ida-idak. Maibé Maromak hakarak ita halo orasaun hanesan neʼe ka lae? Lee Mateus 6:7, depois koʼalia hamutuk kona-ba pergunta tuirmai:
-
Ita bele halo saida hodi la “repete beibeik liafuan neʼebé hanesan” iha Ita-nia orasaun?
Loroloron, Ita bele hanoin kona-ba buat espesífiku ida neʼebé Jeová halo ona ba Ita no tuirmai hatoʼo agradese ba ida-neʼe. Se Ita halo ida-neʼe ba semana ida, neʼe katak Ita sei halo orasaun kona-ba buat hitu no la repete deʼit ita-nia liafuan.
Aman neʼebé diʼak hakarak ninia oan koʼalia ba nia husi laran. Jeová mós hakarak ita halo orasaun ba nia husi laran
6. Orasaun mak prezente husi Maromak
Oinsá mak orasaun fó ita kbiit, liuliu kuandu hasoru situasaun susar? Loke VÍDEO.
Bíblia promete katak orasaun bele ajuda ita atu sente kalma. Lee Filipe 4:6, 7, depois koʼalia hamutuk kona-ba pergunta tuirmai:
-
Maski orasaun labele halakon ita-nia problema hotu, oinsá mak neʼe bele ajuda ita?
-
Ita hakarak halo orasaun kona-ba saida deʼit?
Ita hatene ka lae?
Liafuan “amen” katak “sai nuneʼe bá” ka “loos duni.” Husi Bíblia nia tempu, liafuan “amen” sempre temi iha liafuan ikus husi orasaun.—1 Krónikas 16:36.
7. Buka tempu atu halo orasaun
Dala ruma ita okupadu demais toʼo haluha halo orasaun. Saida mak hatudu katak orasaun importante tebes ba Jesus? Lee Mateus 14:23 no Marcos 1:35, depois koʼalia hamutuk kona-ba pergunta tuirmai:
-
Saida mak Jesus halo hodi bele iha tempu atu halo orasaun?
-
Oinsá mak Ita bele buka tempu atu halo orasaun?
EMA BALU DEHAN: “Orasaun labele ajuda ita tanba Maromak la hatán.”
-
Ita sei hatán oinsá?
PONTU IMPORTANTE
Hatoʼo orasaun husi laran bele halo ita besik liután ba Maromak, halo ita sente kalma, no fó ita forsa neʼebé ita presiza atu halo Jeová nia hakarak.
Rezumu
-
Ita tenke hatoʼo orasaun ba sé?
-
Iha dalan oinsá mak ita tenke halo orasaun?
-
Oinsá mak orasaun bele ajuda ita?
BUKA-HATENE LIUTÁN
Haree resposta ba pergunta neʼebé baibain ema husu kona-ba orasaun.
“Buat hitu neʼebé Ita presiza hatene kona-ba orasaun” (Livru Haklaken, 1 Janeiru 2011)
Aprende kona-ba razaun importante tanbasá halo orasaun no oinsá Ita bele halo orasaun iha dalan neʼebé diʼak liután.
“Tanbasá haʼu presiza halo orasaun?” (Informasaun iha jw.org/tdt)
Haree toʼok saida mak Bíblia hatete kona-ba ita tenke hatoʼo orasaun ba sé.
“Ita bele halo orasaun ba santu-santa sira ka lae?” (Informasaun iha jw.org/tdt)
Iha vídeo múzika neʼe, haree toʼok bainhira no iha neʼebé mak ita bele halo orasaun.
Karik Ita sei gosta
PERGUNTA SIRA NEʼEBÉ BAIBAIN EMA HUSU
Kursu Bíblia hanesan saida mak Testemuña ba Jeová oferese?
Ita bele uza tradusaun Bíblia naran deʼit atu halaʼo kursu Bíblia interativu ho Testemuña ba Jeová ho gratuitu. Bele mós konvida Ita-nia kolega no família tomak atu estuda hamutuk.
