AISISIAET NA 09

Ikunyak Neejai Edeke Kotoma Ailip

KOBOLIAK

Ipuda kereka ijo aingarenikinio kotoma aijar? Ejaasi kereka jo aingiseta nuepolok nuikoto ijo adumun abongonokinetakec? Ikoto kereka ijo aitalakaario arai bo aisinyikokinio? Ikoto kereka ijo ainyikokinit aitogogong eidicanekon ka Yawe? Ingarakini ailip ijo aitodolikin ngun kere. Konye epone ani lokabeit loibusakinitor ailip? Iiranari kereka Edeke ailipasinei kere? Inyo ibusakinit ijo aswam tetere nges iirari ailipasineikon? Aso kaanyutu.

1. Neejai ingai ebeit oni ailipenen, ido ipedori oni ailip nuikamunitos inyo?

Isisianakinit Yesu oni ailip neejai Papawok lokokuju bon. Yesu da elopet elipenenei neejai Yawe. Abala ebe: “Kilipenenete yesi kwanata: Papakosi loejai toma akuj . . .” (Matayo 6:9) Nailipianana oni neejai Yawe, itogogongi oni epaperonewok keda nges.

Ipedori oni ailip kanu idiobore kere. Eja ngun da, kanu Edeke aiirar oni ibusakinit ailipasineiwok koraasi nuiriamara keda akoteke. “Arai kiilip ibore kwape ejaar akoteke, kipupuni ngesi oni.” (1 Yokana 5:14) Abu Yesu kijaik aanyunet naka iboro luibusakinit oni ailip. (Kosiom Matayo 6:9-13) Ilema ailipenen kanuikamunitos nuipuda oni, ekoto oni aiitunit aisiyalamikin Edeke kanuka iboro lueswamaki ngesi oni keda bobo ailip nges aingarakin luce.

2. Epone bo ani ibusakinitor oni ailip?

Isinyikokinit Ebaibuli oni kobala ebe “kobukokisi ikusitauon akonyeneke [Edeke].” (Isabulin 62:8) Ailipasineiwok ekoto koraasi nuelomunitos kotau. Ipedori oni ailip keporoto loikeuna arai bo eililinga ido kediopone kere loitodunit ayongit. Ipedori oni ailip ediosawa ido kaiboisit adio kere.

3. Epone bo ani ebongonokinia Edeke ailipasineiwok?

Iswamai ngesi ngun koponesio luipu. Einakinit Yawe oni Akekirot, Ebaibuli, neipedoria oni adumakin abongonokineta nuka aingisetawok. Asiomenen Akirot Naka Edeke “itocouni” yenekadit aijen. (Isabulin 19:7; kosiom Yakob 1:5.) Epedori ngesi ainakin oni ainapakin naka aomisio kapak naijaar oni kainingosia. Ido epedori ngesi atiror etau loka ejaanakinakake aingarakin oni.

KISISIAU NUIPU

Kisisiau epone loipedoria ijo ainakin ailipasinei nuisiyalamikinitos Edeke, ido koany epone loepedoria ailip aingarakin ijo.

4. Ejaasi nutupitono kotoma ailip

Anyoika bo nueinakinete Edeke acamun arai bo ainger ailipasineiwok? Koboliak EBIDIO.

EBIDIO: Iiranari Kereka Edeke Ailipasinei Kere?—Nuetiakunitai (2:42)

Ekoto Yawe oni ailipenen neejai ngesi. Kosiom Isabulin 65:2, kosodete aimor aingiseta nuta:

Iwomit kereka ijo ebe “loiirari ailip” ekoto ijo ailipenen neejai ngesi? Kanuinyo, arai bo kanuinyo mam?

Ibusakinit oni arimaar aicoreta nuka Edeke arai ikoto oni nges aiirar ailipasineiwok. Kosiom Mika 3:4 keda 1 Petero 3:12, kosodete aimor aingiset nata:

Inyo ibusakinit oni aswam tetere Yawe iirari ailipasineiwok?

Kotoma apak naka ejie, ilipete iwaitin kere aipikor. Ipedori kereka oni amunokin ebe iirari Edeke ailipasineikec?

5. Ekoto ailipasineiwok kolomunitos kotoma otau

Isisianakinitai icetunga ainyogonyog akiro nailipiata kesi. Konye erai kereka ngol epone loekotor Edeke oni ailipenen neejai ngesi? Kosiom Matayo 6:7, kosodete aimor aingiset nata:

Epone bo ani ipedoria jo aisac ‘ainyogonyog akiro’ nailipianana ijo?

Kanginipaaran, koomoom adiorereng naidum jo kaneejai Edeke kosodi aisiyalamikin nges kanuangun. Iswama jo kwangin kanginipaaran adaun esabiiti ediope, iwanyuni ijo ebe ilipi ijo akiro akanyaarei nuegelegela komam inyogokinit adiokirot.

Ekoto Papa loemina ikekoku alimokin nges epone loepupio. Kwape kwangin da, ekoto Yawe ailipiwok korai naelomunit kotau

6. Erai ailip ainakinet kaneejai Edeke

Epone bo ani ingarakinia ailip oni kanoinoi kapakio nuetioko? Koboliak EBIDIO.

EBIDIO: Ingarakini Ailip Oni Atitingikinit (1:32)

Isumunit Ebaibuli ebe epedori ailip aingarakin oni adumun ainapakin naka aomisio. Kosiom Ipilipin 4:6, 7, kosodete aimor aingiseta nuta:

Karaida mam ailip elemari atiokisiowok, epone bo ani ingarakinia ailip oni?
Anu bo akiro nuikoto ijo alimokin Edeke kotoma ailip?

Ijeni kereka jo?

Akirot “amen” erai akepolou ebe “kikote nepenen” arai bo “eebo cut.” Agear kapakio nuewadikaere Ebaibuli, elimunio akirot “amen” kangeset naka ailip.—1 Aisiitonokin 16:36.

7. Kodum apak naka ailipenen

Acepakio epedori aswam apolokin oni kitoni oni aimurwokin ailip. Epone bo ani ayaitor Yesu ailip? Kosiom Matayo 14:23 keda Marako 1:35, kosodete aimor aingiseta nuta:

Inyo bo abu Yesu kiswama tetere edumuni apak kanu ailip?
Ani bo apak naipedori ijo aitemokin kanu ailip?

EBAKASI ICETUNGA EBE: “Emamei ajokis ailip.”

Itemari bo jo ai?

NUIDAU AISISIAUN

Ailipasinei nuelomunitos kotau isukunyikinete oni neejai Edeke, einakinete oni ainapakin kotoma aomisio, ka agogong naka aswam nuisiyalamikinito Yawe.