ኣብ ህይወትካ መምርሒ ዜድልየካ ዀይኑዶ ይስምዓካ፧ ኪምለሰልካ እትደልዮ ኣገዳሲ ሕቶታትዶ ኣሎካ፧ መጸናንዒ ወይ መተባብዒ የድልየካዶ፧ ንየሆዋ ብዝያዳ ኽትቀርቦ ትደሊዶ፧ ጸሎት ነዚ ዅሉ ኽትገብር ኪሕግዘካ ይኽእል እዩ። ግናኸ፡ ከመይ ጌርካ ኢኻ ግቡእ ጸሎት ከተቕርብ እትኽእል፧ ኣምላኽ ንዅሉ ጸሎት ይሰምዖ ድዩ፧ ንጸሎትካ ምእንቲ ኺሰምዖ እንታይ ክትገብር ትኽእል፧ እስከ ንርአ።

1. ናብ መን ኢና ኽንጽሊ ዘሎና፧ ብዛዕባ እንታይከ ኢና ኽንጽሊ እንኽእል፧

የሱስ ናብ ሰማያዊ ኣቦና ኽንጽሊ ኸም ዘሎና ምሂሩ እዩ። ንሱ ባዕሉ እውን ናብ የሆዋ ጸልዩ እዩ። ብዘይካዚ ድማ፡ “ንስኻትኩምሲ ኸምዚ ኢልኩም ደኣ ጸልዩ፦ ‘ኣብ ሰማያት እትነብር ኣቦና፡ . . .’” ኢሉ ምሂሩ እዩ። (ማቴዎስ 6:9) ናብ የሆዋ ኽንጽሊ ኸለና፡ ምስኡ ዘሎና ዕርክነት ነደልድል ኢና።

ብዛዕባ ዝዀነ ነገር ክንጽሊ ንኽእል ኢና። ኣምላኽ ንጸሎትና ምላሽ ምእንቲ ኺህበና ግና፡ ምስ ፍቓዱ ተሰማሚዕና ኽንጽሊ ኣሎና። “ከም ፍቓዱ ጌርና እንልምኖ ዘበለ ይሰምዓና እዩ።” (1 ዮሃንስ 5:14) የሱስ ብዛዕባ እንታይ ክንጽሊ ኸም ዚግባእ ኣብነታት ሂቡና ኣሎ። (ማቴዎስ 6:9-13 ኣንብብ።) ብብሕቲ ብዛዕባ ዜተሓሳስበና ነገራት ኣብ ርእሲ ምጽላይ፡ ንኣምላኽ ስለቲ ዝገበረልና ምምስጋንን ንኻልኦት ኪሕግዞም ምልማንን እውን ክንርስዕ የብልናን።

2. ብኸመይ ክንጽሊ ይግባእ፧

መጽሓፍ ቅዱስ “ልብኹም ኣብ ቅድሚኡ ኣፍስሱ” ኢሉ የተባብዓና እዩ። (መዝሙር 62:8) ስለዚ፡ ጸሎትና ኻብ ልቢ ኪኸውን ኣለዎ። ኣኽብሮት ብዘለዎ መገዲ ዓው ኢልና ወይ ብልብና ኽንጽሊ ንኽእል ኢና። ኣብ ዝዀነ ግዜ ወይ ኣብ ዝዀነ ቦታ ኽንጽሊ ንኽእል ኢና።

3. ኣምላኽ ንጸሎትና ብኸመይ ይምልሶ፧

ብእተፈላለየ መገድታት እዩ ዚምልሶ። የሆዋ ቓሉ መጽሓፍ ቅዱስ ሂቡና ኣሎ፣ ኣብኡ ድማ ንመብዛሕትኡ ሕቶታትና መልሲ ንረኽበሉ ኢና። ቃል ኣምላኽ፡ “ንዘይለበመ የጥብቦ” እዩ። (መዝሙር 19:7፣ ያእቆብ 1:5 ኣንብብ።) ጸገማት ኬጋጥመና ኸሎ፡ የሆዋ ናይ ኣእምሮ ሰላም ኪህበና ይኽእል እዩ። ክንሽገር ከለና እውን፡ ብኣገልገልቱ ገይሩ ኺድግፈና ይኽእል እዩ።

 ጽማቝ

ልባዊ ጸሎት ናብ ኣምላኽ የቕርበና፡ ኣእምሮኣዊ ሰላም ይህበና፡ ንየሆዋ ባህ ከነብሎ ዜኽእል ብርታዐ እውን ይህበና።

ክለሳ

• ናብ መን ኢና ኽንጽሊ ዘሎና፧

• ብኸመይ ኢና ኽንጽሊ ዘሎና፧

• ገለ ኻብ ጥቕምታት ጸሎት እንታይ እዩ፧