LĒSONI 09
ʻUnuʻunu Ofi ki he ʻOtuá ʻi he Lotu
Kuó ke ʻosi ongoʻi nai ʻi ha taimi ʻokú ke fiemaʻu ha tataki ʻi he moʻuí? ʻOku ʻi ai haʻo ngaahi fehuʻi mahuʻinga ʻokú ke loto ke tali? ʻOkú ke fiemaʻu ha fakafiemālie pe fakalototoʻa? Te ke saiʻia nai ke ke ongoʻi ofi ange kia Sihova? ʻE lava ke tokoniʻi koe ʻe he lotú ke fakalato kotoa ʻa e ngaahi fiemaʻu ko iá. Ka ko e hā ʻa e founga totonu ke lotu aí? ʻOku fanongo mai ʻa e ʻOtuá ki he ngaahi lotu kotoa pē? Ko e hā ʻe lava ke ke faí ke fakapapauʻi te ne fanongo atu ki hoʻo ngaahi lotú? Tau sio angé ki aí.
1. Ko hai ʻoku totonu ke tau lotu ki aí, pea ko e hā ʻe lava ke tau lotu fekauʻaki mo iá?
Naʻe akoʻi ʻe Sīsū ʻoku totonu ke tau lotu pē ki heʻetau Tamai fakahēvaní. Ko Sīsū tonu naʻá ne lotu kia Sihova. Naʻá ne pehē: “Kuo pau leva ke peheni hoʻomou lotú: ‘Ko ʻemau Tamai ʻoku ʻi hēvani . . .’” (Mātiu 6:9) ʻI he taimi ʻoku tau lotu ai kia Sihová, ʻoku tau fakaivimālohiʻi ai ʻetau kaumeʻa mo iá.
ʻE lava ke tau lotu fekauʻaki mo ha faʻahinga meʻa pē. Ko e moʻoni, ke tali ʻe he ʻOtuá ʻetau ngaahi lotú, kuo pau ke fehoanaki ia mo hono finangaló. “ʻIlonga ha meʻa ʻoku tau kole ʻo fakatatau ki hono finangaló [ʻo e ʻOtuá], ʻokú ne fanongo mai kiate kitautolu.” (1 Sione 5:14) Naʻe ʻomai ʻe Sīsū ʻa e ngaahi fakatātā ʻo e ngaahi meʻa totonu ke lotu fekauʻaki mo iá. (Lau ʻa e Mātiu 6:9-13.) Tānaki atu ki he lotu fekauʻaki mo ʻetau ngaahi hohaʻa fakafoʻituituí, kuo pau ke ʻoua naʻa ngalo ʻiate kitautolu ke fakamālō ki he ʻOtuá ki he meʻa kuó ne fai maʻa kitautolú pea kole kiate ia ke ne tokoniʻi ʻa e niʻihi kehé.
2. ʻOku totonu ke fēfē ʻetau lotú?
ʻOku fakalototoʻaʻi kitautolu ʻe he Tohi Tapú ke “huaʻi atu [hotau] lotó ʻi hono ʻaó [ʻo e ʻOtuá].” (Saame 62:8) Ko ia ko ʻetau ngaahi lotú ʻoku totonu ke haʻu moʻoni mei he lotó. ʻOku lava ke tau lotu leʻo-lahi pe lotu fakalongolongo pea tatau ai pē pe ʻoku tau tuʻu pe tangutu kae ʻi ha tuʻunga fakaʻapaʻapa. ʻE lava ke tau lotu ʻi ha faʻahinga taimi pē pe ʻi ha faʻahinga feituʻu pē.
3. ʻOku anga-fēfē hono tali ʻe he ʻOtuá ʻetau ngaahi lotú?
ʻOkú ne fai ia ʻi he ngaahi founga kehekehe. Kuo tokonaki mai ʻe Sihova ʻene Folofolá, ʻa e Tohi Tapú, ʻa ia ʻoku tau faʻa maʻu ai ʻa e ngaahi tali ki heʻetau ngaahi fehuʻí. Ko hono lau ʻa e Folofola ʻa e ʻOtuá ʻe lava ke ne “ʻai ke poto ʻa e tokotaha taʻetaukeí.” (Saame 19:7; lau ʻa e Sēmisi 1:5.) ʻOku lava ke ne ʻomai kiate kitautolu ʻa e nonga ʻo e fakakaukaú ʻi he taimi ʻoku tau fehangahangai ai mo e ngaahi polé. Pea ʻe lava ke ne ueʻi ʻene kau lotú ke tokoniʻi kitautolu ʻi he taimi ʻoku tau fiemaʻu moʻoni ai iá.
KELI LOLOTO ANGE
Sivisiviʻi ʻa e founga ʻe lava ke ke fai ai ʻa e ngaahi lotu loto-moʻoni ʻoku fakahōifua ki he ʻOtuá, pea vakai ki he founga ʻe lava ke ʻaonga ai ʻa e lotú kiate koé.
4. ʻOku ʻi ai ʻa e ngaahi fiemaʻu ʻa e ʻOtuá ki he lotú
Ko e hā ʻa e ngaahi meʻa ʻokú ne fakapapauʻi pe ʻoku fakahōifua ʻetau ngaahi lotú ki he ʻOtuá pe ʻikai? Huluʻi ʻa e VITIOÓ.
ʻOku loto ʻa Sihova ke tau lotu ange kiate ia. Lau ʻa e Saame 65:2, pea lāulea leva ki he ongo fehuʻi ko ení:
-
ʻOkú ke fakakaukau ʻoku loto ʻa e “Tokotaha-Fanongo ki he lotú” ke ke lotu ange kiate ia? Ko e hā hono ʻuhingá pe ko e hā ʻoku ʻikai pehē aí?
Kuo pau ke tau feinga ke moʻuiʻaki ʻa e ngaahi tuʻunga ʻa e ʻOtuá kapau ʻoku tau loto ke ne fanongo mai ki heʻetau ngaahi lotú. Lau ʻa e Maika 3:4 mo e 1 Pita 3:12, pea lāulea leva ki he fehuʻi ko ení:
-
ʻE lava fēfē ke tau fakapapauʻi ʻe fanongo mai ʻa Sihova ki heʻetau ngaahi lotú?
ʻI he lolotonga ha tau, ʻe lotu nai ʻa e ongo tafaʻakí fakatouʻosi ke ikuna. ʻOku ʻuhinga lelei nai ke ʻamanekina ʻa e ʻOtuá ke ne tali ʻa e lotu ko ení?
5. Ko ʻetau ngaahi lotú ʻoku totonu ke haʻu mei he lotó
Ko e kakai ʻe niʻihi kuo akoʻi kinautolu ke toutou leaʻaki ʻi he lotú ʻa e ngaahi lea tatau. Ka ko e founga ia ʻoku fiemaʻu mai ʻe he ʻOtuá ke tau lotu ange ai kiate iá? Lau ʻa e Mātiu 6:7, pea lāulea leva ki he fehuʻi ko ení:
-
ʻE lava fēfē ke ke fakaʻehiʻehi mei hono “toutou leaʻaki ʻa e ngaahi meʻa tatau” ʻi hoʻo ngaahi lotú?
ʻI he ʻaho taki taha, te ke fakakaukau nai ki ha foʻi tāpuaki pau ʻe taha ʻi hoʻo moʻuí pea fakamālō leva kia Sihova ki he tāpuaki ko iá. Fai eni ʻi he ʻaho kotoa ʻi ha uike ʻe taha, pea te ke lotu leva ai fekauʻaki mo ha kaveinga kehekehe ʻe fitu ʻo ʻikai te ke toutou leaʻaki ai ʻa e ngaahi meʻa tatau.
ʻOku loto ha tamai lelei ke lea ange hono kiʻi fohá kiate ia mei he lotó. Pehē foki, ʻoku loto ʻa Sihova ke tau lotu ange kiate ia mei hotau lotó
6. Ko e lotú ko ha meʻaʻofa ia mei he ʻOtuá
ʻE lava fēfē ke ʻomai ʻe he lotú kiate kitautolu ʻa e mālohi, fakatouʻosi ʻi he ngaahi taimi leleí mo e taimi ʻikai leleí? Huluʻi ʻa e VITIOÓ.
ʻOku talaʻofa mai ʻe he Tohi Tapú ko e lotú ʻe lava ke ne tokoniʻi kitautolu ke maʻu ʻa e nonga moʻoni ʻo e fakakaukaú. Lau ʻa e Filipai 4:6, 7, pea lāulea leva ki he ongo fehuʻi ko ení:
-
Neongo ko e lotú ʻoku ʻikai ke ne toʻo atu maʻu pē ʻetau ngaahi palopalemá, ʻoku anga-fēfē ʻene tokoní?
-
Ko e hā ʻa e ngaahi meʻa ʻe niʻihi te ke saiʻia ke lotu fekauʻaki mo iá?
Naʻá ke ʻiloʻi?
Ko e foʻi lea ko e “ʻēmeni” ʻoku ʻuhingá “ke hoko ʻo pehē” pe “moʻoni ia.” Talu mei he taimi ʻo e Tohi Tapú, ko e “ʻēmeni” kuo leaʻaki ia ʻi he fakaʻosinga ʻo e ngaahi lotú.—1 Kalonikali 16:36.
7. Vaheʻi ha taimi ke lotu ai
Ko e taimi ʻe niʻihi ʻoku tau faʻa fuʻu femoʻuekina ʻo ngalo ai ke tau lotu. Naʻe mahuʻinga fēfē ʻa e lotú kia Sīsū? Lau ʻa e Mātiu 14:23 mo e Maʻake 1:35, pea lāulea leva ki he ongo fehuʻi ko ení:
-
Ko e hā naʻe fai ʻe Sīsū ke vaheʻi ai ha taimi ke lotú?
-
Ko fē ʻa e taimi ʻe lava ke ke lotu aí?
ʻOKU PEHĒ ʻE HE NIʻIHI: “Ko e lotú ko e foʻi fakanonga fakaʻatamai pē ia.”
-
Ko e hā haʻo lau?
FAKANOUNOU
Ko e ngaahi lotu loto-moʻoní ʻoku tohoakiʻi ai kitautolu ke ofi ange ki he ʻOtuá, ʻomai ai ʻa e nonga ʻo e fakakaukaú, pea ʻomai kiate kitautolu ʻa e mālohi ʻoku tau fiemaʻú ke tau fakahōifuaʻi ai ʻa Sihova.
Fakamanatu
-
Ko hai ʻoku totonu ke tau lotu ki aí?
-
ʻOku totonu ke fēfē ʻetau lotú?
-
Ko e hā ʻa e ngaahi ʻaonga ʻe niʻihi ʻo e lotú?
AKO LAHI ANGE
Kumi ʻa e ngaahi tali ki he ngaahi fehuʻi anga-maheni ʻoku ʻeke fekauʻaki mo e lotú.
“Meʻa ʻe Fitu ʻOku Fiemaʻu Ke Ke ʻIlo Fekauʻaki mo e Lotú” (Toʻo mei he Ko e Taua Leʻo)
Ako fekauʻaki mo e ngaahi ʻuhinga mahuʻinga ke lotu aí mo e founga ke fakaleleiʻi ai ʻa e tuʻunga hoʻo ngaahi lotú.
Vakai ki he meʻa ʻoku akoʻi ʻe he Tohi Tapú fekauʻaki mo e tokotaha ʻoku totonu ke tau lotu ki aí.
“ʻOku Totonu Ke U Lotu ki he Kau Sangató?” (Kupu ʻi he uepisaití)
ʻI he vitiō tā fasi ko ení, sio pe ʻoku mahuʻinga ʻa e feituʻu mo e taimi ke tau lotu aí.
Te Ke Fie Vakai Foki ki Heni
NGAAHI FEHUʻI ʻOKU TOUTOU ʻEKE
Ko e Hā ʻa e Polokalama Ako Tohi Tapu ʻOku Fai ʻe he Kau Fakamoʻoni ʻa Sihová?
ʻI he polokalama ako fetalanoaʻaki taʻetotongi ʻa e Kau Fakamoʻoni ʻa Sihová, ʻe lava ke ke ngāueʻaki ai ha faʻahinga liliu Tohi Tapu pē. Ongoʻi tauʻatāina ke fakaafeʻi ʻa e kotoa ho fāmilí pe kaumeʻá ke kau fakataha mo koe.
