GIHEVBULO 9

Hidzimeya ga Nungungulu khu nombelo

WOMBISA

U di nga tshuka u manega ga giemo gi gu giridego u vbweta wusingalagadzi nya wadi? Ina u na ni siwudziso nyo khaguri nya lisima u dogoreyago ngudzu gu mana mihlamulo ya kona? U ngu vbweta gu thaveledwa ni gu tiyiswa? U ngu dzina gu dzipwa vbafuvbi ni Jehovha? Nombelo wu nga gu phasa ga satshavbo soso. Ganiolu, khu yevbini ndziya nya yadi nyo gombeye khiyo? Ina Nungungulu a ngu engisa milombelo yatshavbo? Ginani u yedego gu gira gasi Nungungulu a engisa milombelo yago. Hongoleni hi si wonani.

1. Khu mani hi yedego gu gombeya gwaye, nigu ginani hi yedego gu gi gombeleya?

Jesu a hi hevbudzide gu khuye gu vbwetega hi gombeya ga Papayi wathu wa ndzadzini basi. Jesu nuye a di gu gombeya ga Jehovha. A di khuye: “Gombeyani kharati: ‘Papayi wathu u gu romo ndzadzini . . . ’” (Matewu 6:9) Tepo hi gombeyago ga Jehovha, wupari wathu naye wo tiya huwo ro.

Hi tshulegide gu gombeya khu gevbini gilo. Ganiolu, gasi gu Nungungulu a hlamula milombelo yathu, gu vbwetega yi gimbileyana ni gugola gwaye. “Ha gu lomba gilo maningano ni gudzina gwaye, hi na ni lisine nya gukhethu [Nungungulu] a ngu hipwa.” (1 Johane 5:14) Jesu a hi ningide giyeyedzo nya silo hi yedego gu si gombeleya. (Leri Matewu 6:9-13.) Ganiolu, tepo hi gombeyago khu silo sathu, hi nga divali gu mu bonga Nungungulu khesi a hi gireyago ni gu mu lomba gu khethu a phasa vambe.

2. Hi nga gombeya kharini?

Bhibhiliya yo hi kutsa gu khiyo: “Mu embeledzeleni mabala ya monyoni [gwanu Nungungulu].” (Ndzimo 62:8) Khu kharato, omu nya milombelo yathu gu vbwetega hi ganeya silo si dugeyago monyoni. Hi nga gombeya khu lito nyo khugege mwendro u si pwadzi malito. Hi nga gombeya ni yevbini tepo hi dzinago, ni hayini hi gomogo.

3. Nungungulu a gu hlamula kharini milombelo yathu?

A gu gira isoso khu dzindziya nyo hambanehambane. Jehovha a hi ningide Lito laye, Bhibhiliya, a gu omu hi oloveyago gu yi mana umo mihlamulo nya siwudziso sathu. Khu guya khu Ndzimo 19:7, gu leri Bhibhiliya si ngu ninga “gihevbudzo ga oyu nyambati gilo.” (Leri Jakobe 1:5.) Jehovha gambe a nga khongoteya myonyo yathu tepo hi tshanganago ni sigaradzo. A nga thumisa gambe sithumi saye gasi si hi phasa ho ba hi vbweta giphaso.

GIRA WUGEVISISI NYO ETE

Wona edzi u nga girago khidzo milombelo yi khugeyago monyoni ni edzi u nga gombeyago khidzo khu ndziya yi tsakisago Nungungulu, u bwe u wona edzi milombelo yi nga gu phasago khidzo.

4. Ginani u yedego gu gira gasi Nungungulu a engiseya milombelo yago?

Gu na ni silo nya lisima u yedego gu theya kota khiso gasi gu Nungungulu a engiseya milombelo yago.Sistirini VHIDHYU.

VHIDHYU: Ina Nungungulu a ngu engiseya yatshavbo milombelo? — Gipandre (2:42)

Jehovha o vbweta gu khuye hi gombeya gwaye. Lerini Ndzimo 65:2, mu vbedza mu bhula khu siwudziso sesi:

U ngu khodwa gu khuwe ‘Mupwi nya milombelo’ o vbweta gu khuye u gombeya gwaye? Khu ginani?

Ho vbweta gu khethu Nungungulu a engiseya milombelo yathu, gu vbwetega hi dzi garadzeya gu vbanya khu milayo yaye. Lerini Mik 3:4 ni 1 Pedro 3:12, mu vbedza mu bhula khu siwudziso sesi:

Ginani hi yedego gu gira gasi Jehovha a engiseya milombelo yathu?

Avba gu gu na ni mitsawa mivili yi dwanago nyimbi, tsawa moyo ni moyo wo lombeleya gu khuwo wu na pale owu wumbe. Ina hi di hadzi vireya gu khethu Nungungulu a engisa milombelo yoyo?

5. Milombelo yathu gu vbwetega yi khugeya monyoni

Vathu nyo khaguri vo hevbudzwa gu phindra-phindra malito ya ma mowo tepo ni tepo va gombeyago. Ganiolu, ina khidzo kamo Nungungulu a vbwetago gu khuye hi gombeya khidzo? Lerini Matewu 6:7, mu vbedza mu bhula khu giwudziso gi landreyago:

U nga gira kharini gasi u si “phindra-phindri malito ya mamowo” omu nya milombelo yago?

Litshigu ni litshigu gu gyago, dundrugeya khu gilo nyo khaguri a gu giredego Jehovha womini gwago, khavbovbo u mu bonga khigyo. Wo gira isoso ndrani nya semana yatshavbo, u na wona gu khuwe u na ba u gombede khu 7 silo nyo hambane nya mba phindra-phindra gilo.

Papayi nya wadi a ngu tsaka tepo a pwago sanana saye na si gu mu bhuleya esi si gu naso monyoni. Jehovha nuye a ngu tsaka tepo hi mu bhuleyago esi gu naso nethu

6. Nombelo giningwa hi ningidwego khu Nungungulu

Nombelo wu nga hi phasa kharini, ngudzungudzu dziteponi nya sigaradzo? Sistini VHIDHYU.

VHIDHYU: Nombelo wu ngu hi phasa gu emisana ni sigaradzo (1:32)

Bhibhiliya yi ngu tumbisa gu khiyo nombelo wu nga rudzisa monyo ni mapimo yathu. Lerini Vafilipi 4:6, 7, mu vbedza mu bhula khu siwudziso sesi:

Lisine gu nombelo khandri tepo yatshavbo wu hi duseyago sigaradzo sathu. Ganiolu khu ginani wu phasago?
Ginani u dogoreyago gu gi lomba omu nya nombelo wago?

U di gu dziti?

Lito “amen” lo thula gu khilo “si na girege” mwendro “nyi ngu dzumeya.” Gukhugeya matshiguni nya gulowe nya Bhibhiliya, lito “amen” lo ganedwa guhegisani nya milombelo. — 1 Dzikoronika 16:36.

7. Dzi ninge tepo nyo gombeye

Dzimbe dzitepo hi nga tshuka hi taledwa khu silo nyo gire nyo bwe hi divala gu khala vbavbatshi hi gombeya. Ina Jesu a di gu wu ninga lisima nombelo? Lerini Matewu 14:23 ni Marko 1:35, khavbovbo mu bhula khu siwudziso sesi:

Ginani a nga ba a gira Jesu gasi a dzi vegeya tepo nyo gombeye?
Ahati uwe ke, u nga dzi vegeya kharini tepo nyo gombeye?

VAMBE VARI KHAVO: “Ho gombeya hi gombeyago, ganiolu mwalo a engiseyago milombelo yathu.”

Uwe ke, u hadzi khuwe ginani?

REZUMO

Milombelo hi yi girago na yi khugeya monyoni yi ngu tiyisa gupwanana gwathu ni Nungungulu, yi rudzisa myonyo ni mapimo yathu, yi bwe yi hi ninga tshivba nyo gire silo si tsakisago Jehovha.