CIIYO 09
Amube Acilongwe a Leza Kwiinda mu Mupailo
Sena kuli ziindi nomulimvwa kuti muyandika busolozi mubuumi? Sena mujisi mibuzyo iiyandika kapati njomuyanda kuti iingulwe? Sena muyandika luumbulizyo naa kukulwaizyigwa? Sena mulayanda kuba acilongwe a Jehova? Mupailo inga wamugwasya mumbazu zyoonse eezyi. Pele mbuti mbotukonzya kupaila munzila iiluzi? Sena Leza ulaiswiilila mipailo yoonse? Ncinzi ncomukonzya kucita kutegwa aiswiilile mipailo yanu? Atubone.
1. Nkuuli ni nkotweelede kupaila alimwi nzintu nzi nzyotukonzya kwaamba mumupailo?
Jesu wakayiisya kuti tweelede kupaila buyo kuli Taateesu wakujulu. Walo wakali kupaila kuli Jehova. Wakaamba kuti: “Mboobu mbomweelede kupaila: ‘Taateesu ooli kujulu . . . ’” (Matayo 6:9) Ciindi notupaila kuli Jehova, tuyumya cilongwe cesu anguwe.
Tulakonzya kupailila cintu cili coonse. Nokuba boobo, kutegwa Leza ayiingule mipailo yesu, nkokuti yeelede kweendelana akuyanda kwakwe. ‘Kufwumbwa cintu ncotumulomba Leza ceendelana akuyanda kwakwe, ulatumvwa.’ (1 Johane 5:14) Jesu wakapa zikozyanyo zyazintu nzyotweelede kupailila. (Amubale Matayo 6:9-13.) Kunze buyo lyakupailila zintu zijatikizya ndiswe, tatweelede kuluba kumulumba Leza akaambo kazintu nzyaakatucitila alimwi akumulomba kugwasya bamwi.
2. Mbuti mbotweelede kupaila?
Bbaibbele litukulwaizya kumwaambila Leza “zyoonse zili mumyoyo.” (Intembauzyo 62:8) Aboobo mipailo yesu yeelede kuzwa ansi aamoyo. Tulakonzya kupaila cakupozya naa cakaumuumu, munzila iili yoonse iitondezya kuti tulamulemeka Jehova. Tulakonzya kupaila kufwumbwa ciindi alimwi abusena buli boonse.
3. Mbuti Leza mbwayiingula mipailo yesu?
Ulacita oobo munzila ziindene-indene. Jehova wakatupa Jwi lyakwe, Bbaibbele, mwalo motujana bwiinguzi kumibuzyo yesu. Kubala Jwi lya Leza kulakonzya ‘kubasongwaazya batakwe luzyibo.’ (Intembauzyo 19:7; amubale Jakobo 1:5.) Ulakonzya kutupa luumuno lwamumizeezo ciindi notuli mumapenzi. Alimwi ulakonzya kupa babelesi bakwe ikuti batugwasye iciindi notuyandika lugwasyo.
AMWIIYE ZINJI
Atubone mbotukonzya kupaila kuzwa ansi aamoyo munzila iimukkomanisya Leza akubona mupailo mboukonzya kutugwasya.
4. Leza kuli mbwayanda kuti katupaila
Ncinzi cikonzya kupa kuti Leza aiswiilile mipailo yesu naa pe? Atweebelele VIDIYO.
Jehova uyanda kuti katupaila kulinguwe. Amubale Intembauzyo 65:2, akubandika mubuzyo ooyu:
-
Nkaambo nzi ncomuyeeya kuti ‘Sikuswiilila mipailo’ uyanda kuti nywebo kamupaila kulinguwe?
Kuti katuyanda kuti Leza aiswiilile mipailo yesu, tweelede kusolekesya kupona kweelana ambwayanda. Amubale Mika 3:4 alimwi a 1 Petro 3:12, akubandika mubuzyo ooyu:
-
Mbuti mbotukonzya kuba masimpe kuti Jehova ulaiswiilila mipailo yesu?
Ilyankondo, nkamu zyabasikalumamba zyoonse zyobilo aimwi ilapaila kutegwa izunde. Sena ncamaano kulangila kuti Leza inga wayiingula mipailo yabo?
5. Mipailo yesu yeelede kuzwa ansi aamoyo
Bantu bamwi bakayiisyigwa kupaila mupailo wakwiinduluka bbala-abbala. Pele sena Leza oobo mbwayanda kuti katupaila kulinguwe? Amubale Matayo 6:7, akubandika mubuzyo ooyu:
-
Mbuti mbomukonzya kuleka cilengwa cakwaamba “majwi ngoonya cakwiinduluka-induluka” mumipailo yanu?
Buzuba-abuzuba, amuyeeye cilongezyo comwe cigaminide akumulumba Jehova kujatikizya cilongezyo eeco. Kuti kamucita oobu abuzuba kwansondo yoonse, nkokuti muyoopailila zintu zili ciloba ziindene-indene kakunyina kuziinduluka.
Usyi mubotu uyanda kuti mwanaakwe kamwaambila zili kumoyo. Mbubwenya buyo, awalo Jehova uyanda kuti katupaila kuzwa ansi aamoyo
6. Mupailo ncipego kuzwa kuli Leza
Mbuti mupailo mboukonzya kutugwasya kwaambisya muziindi zyamapenzi? Atweebelele VIDIYO.
Bbaibbele lisyomezya kuti mupailo ulakonzya kutugwasya kujana luumuno lwini-lwini lwamumizeezo. Amubale Bafilipi 4:6, 7, akubandika mibuzyo eeyi:
-
Nokuba kuti talili lyoonse mupailo noukonzya kupa kuti mapenzi eesu amane, mbuti mboutugwasya?
-
Nzintu nzi nzyomunga mwayanda kubikkilizya mumipailo yanu?
Sena Mulizyi?
Ibbala lyakuti “ameni” lyaamba kuti “akube boobo” naa kuti “masimpe.” Kuzwa kaindi, ibbala lyakuti “ameni” lyali kwaambwa kumamanino aamipailo.—1 Makani 16:36.
7. Amujane ciindi cakupaila
Zimwi ziindi tulakonzya kujata maanka-maanka cakuti inga twaluba akupaila. Mbuti mupailo mbowakali kuyandika kuli Jesu? Amubale Matayo 14:23 a Marko 1:35, akubandika mibuzyo eeyi:
-
Ncinzi Jesu ncaakali kucita kutegwa ajane ciindi cakupaila?
-
Ndilili nomukonzya kujana ciindi cakupaila?
BAMWI BAAMBA KUTI: “Mupailo taugwasyi kapati, pele upa buyo kulimvwa kabotu.”
-
Ino nywebo muyeeya buti?
MUBUFWAAFWI
Mipailo iizwa ansi aamoyo itupa kuba acilongwe a Leza, luumuno lwamumizeezo alimwi anguzu nzyotuyandika kutegwa tumukkomanisye Jehova.
Ncinzi Ncomwaiya?
-
Nkuuli ni nkotweelede kupaila?
-
Mbuti mbotweelede kupaila?
-
Mbubotu nzi bumwi mbotujana kwiinda mukupaila?
AMUZYIBE ZINJI
Atujane bwiinguzi kumibuzyo njobavwula kubuzya bantu kujatikizya mupailo.
“Zyintu Zili Ciloba Nzyomweelede Kuzyiba Kujatikizya Mupailo” (Ngazi Yamulindizi, January 1, 2011)
Atubone twaambo ncociyandika kapati kupaila alimwi ambomukonzya kubotya mipailo yanu.
Atubone Bbaibbele ncoliyiisya kujatikizya nkotweelede kupaila.
Muvidiyo yanyimbo eeyi, amubone kuti mulakonzya kupaila kufwumbwa ciindi aabusena buli boonse.
Andiza Inga Mwaakkomanina Ayaaya
MIBUZYO IIVWULA KUBUZYIGWA
Ino Ndwiiyo Nzi Lwamu Bbaibbele Ndobapa Bakamboni ba Jehova?
Mulakonzya kubelesya Bbaibbele lili lyoonse nomwiiya mupulogilamu iitabbadelelwi ya Bakamboni ba Jehova. Amwaanguluke kutamba bamukwasyi wanu boonse naa balongwe.
