DJONDZO 09

Xikhongelo Xi Tiyisa Wunghanu La Wena Na Yehovha

CHAYA

U tshama u humeleliwa hi minchumu leyi a wu lava ku pfuniwa hikakunene? Ku ni swivutiso leswi u lavaka ku tiva tinhlamulu ta swona? U lava ku tiyisiwa ni ku pfuniwa? U navela ku titwa u li kusuhi na Yehovha? Ku khongela swi nga ku pfuna ka minchumu leyi hinkwayu. Kambe hi yini ndlela ya yinene ya ku khongela? Indje Xikwembu xa swi yingisa swikhongelo hinkwaswu? U nga yentxa yini swaku Xikwembu xi yingisa swikhongelo swa wena? A hi swi voneni.

1. Hi nga khongela ka mani, naswona hi khongelela yini?

Yesu a vule leswaku hi fanele hi khongela ka Papayi wa hina lweyi a nga matilweni ntsena. Phela na yena a a yentxa swoleswo. Yesu a te: “Kutani mi fanele mi khongelisa xileswi: ‘Papayi wa hina lweyi a nga matilweni . . . ’” (Matewu 6:9) Loko hi khongela ka Yehovha, wunghanu la hina na yena li ya li tiya.

Hi nga khongela hi kombela xin’wana ni xin’wana. Kambe Xikwembu, xi ta hlamula ntsena leswi fambisanaka ni ku rhandza ka xona. “Ha tshemba swaku Xikwembu xa hi twa loko hi kombela xin’wana ni xin’wana lexi fambisanaka ni ku rhandza ka xona.” (1 Yohani 5:14) Yesu a hi vekele xikombiso xa leswi hi faneleke hi khongelisa xiswona. (Lerha Matewu 6:9-13.) I ntiyiso swaku hi nga khongela hi kombela leswi hi swi lavaka, kambe a hi fanelanga hi khohlwa ku khongelela van’wana ni ku khensa leswi Xikwembu xi hi yentxelaka swona.

2. Hi nga khongelisa ku yini?

Bibele li li hi fanele hi “byela [Xikwembu] leswi nga timbilwini [ta hina].” (Tipisalema 62:8) Hi fanele hi khongela hi mbilu hinkwayu. Hi mhaka leyo, hi nga ha khongela hi nkama lowu hi wu lavaka, na hi li ka ndhawu yin’wana ni yin’wana, hi rito la ku tlakuka kumbe la le hansi. Naswona a ku na nawu lowu vulaka swaku hi fanele hi khongela na hi nyimile kumbe hi tshamile.

3. Xikwembu xi swi hlamulisa ku yini swikhongelo swa hina?

Xi swi hlamula hi tindlela ta tinyingi. Hi xikombiso, ka Bibele hi kuma tinhlamulu ta swivutiso swa hina. Ku lerha Rito la Xikwembu swi nga “tlharihisa lweyi a pfumalaka wutlharhi.” (Tipisalema 19:7; lerha Yakobo 1:5.) Yehovha a hi rhulisa mbilu ni ku hi pfuna loko hi kumana ni swikarhatu. A nga tirhisa vanhu va yena swaku va hi pfuna loko hi lava ku pfuniwa.

DJONDZA SWIN’WANA

Vona swaku u nga yentxa yini swaku Xikwembu xi yingisa swikhongelo swa wena, tlhela u vona swaku ku yentxa xikhongelo swi nga ku pfunisa ku yini.

4. Hi nga yentxa yini swaku Xikwembu xi yingisa swikhongelo swa hina

I mpsini leswi nga yentxaka swaku Xikwembu xi yingisa swikhongelo swa hina kumbe xi nga swi yingisi? Sixtirani VHIDIYO.

VHIDIYO: Indje Xikwembu Xi Yingisa Swikhongelo Hinkwaswu? — Xiyenge (2:42)

Yehovha a lava leswaku hi khongela ka yena. Lerhani Tipisalema 65:2, mi gama mi bula hi swivutiso leswi landzelaka:

U pimisa swaku “Mutwi wa xikhongelo” a lava leswaku u khongela ka yena? Loko u pimisa leswo, hi mhaka muni?

Swaku Xikwembu xi yingisa swikhongelo swa hina hi fanele hi hanya hi minawu ya xona. Lerhani Mikiya 3:4 ni 1 Pedru 3:12, mi gama mi bula hi xivutiso lexi landzelaka:

I yini xi hi kholwisaka swaku Yehovha a ta swi yingisa swikhongelo swa hina?

Ka nyimpi yin’wana, masonchwa ya tlhelo lin’we ni masonchwa ya tlhelo lelin’wana, ma kombela Xikwembu leswaku ma hlula. U pimisa swaku Xikwembu xi nga swi yingisa swikhongelo swa ku tshamisa xileswo?

5. Hi fanele hi khongela hi mbilu hinkwayu

Vanhu van’wana va djondzisiwe swaku loko va khongela ka Xikwembu va fanele va phindha minchumu ya ku fana nkama ni nkama. Kambe hi swoleswo Xikwembu xi swi lavaka? Lerhani Matewu 6:7, mi gama mi bula hi xivutiso lexi xi landzelaka:

U nga yentxa yini swaku “u nga phindhi minchumu ya ku fana” ka swikhongelo swa wena?

Siku ni siku zama ku pimisa hi nkateko lowu Yehovha a nga ku nyika wona u gama u mu khensa hi mhaka wona. Loko u yentxa leswo vhiki hinkwalu, u ta vona swaku u kombele 7 wa minchumu ya ku hambana na swi nga zanga swi lava swaku u phindha marito ya ku fana.

Hi ntolovelo papayi wa tsaka loko n’wana wa yena a vulavula na yena swi suka mbilwini. Na yena Yehovha, wa tsaka loko hi khongela swi suka mbilwini

6. Xikhongelo i nkateko lowu taka hi ka Xikwembu

Xikhongelo xi nga hi nyikisa ku yini matimba loko hi kumana ni swikarhatu? Sixtirani VHIDIYO.

VHIDIYO: Xikhongelo Xi Hi Pfuna Leswaku Hi Tiyisela (1:32)

Bibele li vula swaku xikhongelo xi nga hi pfuna swaku hi kuma ku rhula ka mimpimisu. Lerhani Vafilipiya 4:6, 7, mi gama mi bula hi swivutiso leswi landzelaka:

I ntiyiso swaku xikhongelo a xi nga ta yentxa swaku swikarhatu swa wena swi tekela ku nyamalala. Hambileswo, hi mhaka muni swi pfuna ku khongela?
U navela ku khongelela yini?

Indje a wu swi tiva?

A rito “amen” li vula swaku “a swi yentxeke” kumbe “a swi ve tanu.” Ku sukela khale ka minkama ya Bibele, a rito leli li tirhisiwa loko xikhongelo xi hela. — 1 Tikronika 16:36.

7. Tinyiki nkama wa ku khongela

Phela nkama wun’wana hi nga ha va ni minchumu ya yinyingi ya ku yi yentxa lakakuva hi khohlwa ni ku khongela. Indje ku khongela a swi li swa lisima ka Yesu? Lerhani Matewu 14:23 ni Marku 1:35, mi gama mi bula hi swivutiso leswi landzelaka:

Yesu a a yentxa yini swaku a kuma nkama wa ku khongela?
Se wena u yentxa yini swaku u kuma nkama wa ku khongela?

VAN’WANA VA LI: “Xikhongelo i ndlela ya ku vanhu va titwa kahle kambe a xi pfuni nchumu.”

U li yini hi mhaka leyi?

LESWI HI NGA SWI DJONDZA

Swikhongelo leswi hi swi yentxaka na swi suka mbilwini swi nga hi yentxa hi va kusuhi ni Xikwembu, swi hi nyika ku rhula ka mimpimiso, swi tlhela swi hi nyika ntamu lowu hi wu lavaka swaku hi kota ku tsakisa Xikwembu.