JORHENGUARHIKUA 9
Kómarhikua uaati eskajtsï andarhieraaka Tata Diosïni
¿Ménisïjtsï uétarhinchasïni eskaksïni nema arhistachiaka néna úni ambe ma? ¿Jatsiaskijtsï kurhamarhikuechani engajtsï nótki exeantani jaka mókuntskuechani? ¿Uétarhinchaxakijtsï eskaksïni nema uinhaperantaaka o sési pʼikuastantani? ¿Uékapirintsï sánderu andarhierani Jeobani? Kómarhikuaksïni uaati jarhuatani iámindu ini ambe jingoni. Peru, ¿nénachi jatsiski para kómarhini? ¿Kurhauasïni Tata Diosï iámindu kómarhikuechani? ¿Nénajtsï uaa seguru jarhani eska Tata Diosï kurhauaka chaari kómarhikuechani? Ju je exeni.
1. ¿Nénchi jatsiski para kómarhini? ¿Ambe ka ambechi uaa uandani kómarhikua jimbo?
Jesúsi jorhentpispti eskachi solu juchaari Taati auandarhu anapuni jatsiska para kómarhini. Jesúsi ísï úsïrendi, ima Jeobani kómarhisïrendi. Ma xanhari uandaspti: “Ísï kómarhi je: ‘Juchaari Taati engari auandarhu jaka’” (Mateu 6:9). Engachi kómarhijka Jeobani, sánderuchi sési pájperasïnga imani jingoni.
Kómarhikua jimbochi uaaka uandani ambe uéjkiri. Peru engachi uéjka eska Tata Diosï mókuantauaka juchaari kómarhikuechani, nóchi jatsiska para imani ambe kurhakuni enga ima no jaiapanhintajka. Biblia arhisïndi “eska engachi kurhajkuarhiaka ma ambe eska ima na uékajka, imajtsïni kurhajchaaka” (1 Juanu 5:14). Jesúsi uandaspti máru amberi engachi uaaka kurhajkuarhini engachi kómarhini jauaka (arhinta je Mateu 6:9-13). Uaakachi kurhajkuarhini juchaari ambe ka ístu diosmaiamukua arhini Tata Diosïni imani ambe jimbo engajtsïni íntskujka ka kómarhijpikuani máteruechani.
2. ¿Nénachi jatsiski para kómarhini Tata Diosïni?
Bibliajtsïni arhisïndi: “Aiangukuarhi je [Tata Diosïni] iámindu ambe enga chaari mintsita pʼikuarhinhijka” (Salmo 62:8). Ísï jimbo, jatsiskachi para imani ambe kómarhini engachi pʼikuarherajka, mintsitarhu uératini. Uaakachi uandaparini kómarhini o eratsekua jingontku ka uaakachi na uéjki jarhani, peru engachi xarhataaka eskachi janhanharhisïnga Jeobani. Ístuchi uaaka kómarhini na uéjki jatini ka nani uéjki.
3. ¿Néna mókuantasïni Tata Diosï juchaari kómarhikuechani?
Mámaru ambe jimbojtsïni mókuchiantasïndi. Imeeri Karakata jimbo enga jindeeka Biblia, mókuantasïndi juchaari kurhamarhikuechani. Arhintani Tata Diosïri Karakatani “mímixeti úsïndi imani enga no ma ambe míteaka” (Salmo 19:7; arhinta je Santiagu 1:5). Ka engachi problemechani jatsiauaka Jeoba uaati úni eskachi no xáni uandanhiauaka. Ístu, Jeoba uaati úni eskajtsïni imeeri marhuaricha jarhuataaka jiáni engachi uétarhinchaaka.
JORHENGUARHI JE SÁNDERU AMBE
Ju je exeni nénachi uaa mintsitarhu uératini kómarhini Tata Diosïni eska ima na jaiapanhintajka ka nénaksïni uaa jarhuatani kómarhikuecha.
4. Tata Diosï uandarixatia na engachi jatsika para kómarhini
¿Ambesï újki eska Tata Diosï jiókuarhiauaka juchaari kómarhikuechani? Exe je BIDEUNI.
Jeoba uékasïndi eskachi imantku kómarhiaka. Arhinta je Salmo 65:2 ka uandontskuarhi je íri ambe:
-
¿Exesïntsï eska ima Tata Diosï enga kurhauajka kómarhikuechani uéjki eskajtsï chá kómarhiaka? ¿Andijtsïsï ísï eratsejki?
Engachi uéjka eska Tata Diosï kurhauaka juchaari kómarhikuechani, jatsiskachi para ísï irekani eska ima na juramujka. Arhinta je Miqueas 3:4 ka 1 Pedru 3:12 ka uandontskuarhi je íri ambe:
-
¿Ambechi jatsiski para úni parachi seguru jarhani eska Tata Diosï kurhauaka juchaari kómarhikuechani?
Engaksï tsimani grupu sondaduecheri kurhakupiringa Tata Diosïni paraksï andani guerrarhu, ¿sési japirini eratseni eska Tata Diosï mókuantauaka ini kómarhikuechani?
5. Jatsiskachi para mintsitarhu uératini kómarhini
Uánikuechaksï jorhendanhasïndi paraksï memoria jimbo kómarhini ka uandatsekuarhini. ¿Peru ini járhati kómarhikuechanisï tsitiajki Tata Diosï? Arhinta je Mateu 6:7 ka uandontskuarhi je íri ambe:
-
¿Ambechi jatsiski para úni parachi no méntku úndani májku ambe uandani juchaari kómarhikuecharhu?
¿Andijtsïsï no pauani pauani eratsentajki imani sési jásï ambe engajtsï nitamakuarhika ka tátsekuajtsï diosmaiamukua arhini Jeobani ini ambe jimbo? Engajtsï ma semana ísï úska, uaakajtsï siete amberi kómarhini Tata Diosïni no ma ambe repetiriparini.
Taati ma uékasïndi eska imeeri sapi aianguaka na engamindu pʼikuarherajka, májkueni Jeobajtu uékasïndi eskachi mintsita jingoni kómarhiaka.
6. Kómarhikua Tata Diosïri intsïmperata máesti
¿Nénajtsïni uaa kómarhikua uinhaperantani, sánderia jiáni engachi no sési nitamakuarhini jauaka? Exe je BIDEUNI.
Bibliajtsïni aiachisïndi eskajtsïni kómarhikua uaaka jarhuatani parachi no xáni uandanhiani. Arhinta je Filipusʌ 4:6, 7 ka uandontskuarhi je íri ambe:
-
Nájkiruka kómarhikua no kénditaajka iámindu uandanhiatechani, ¿nénajtsïni jarhuatasïni?
-
¿Ambe ka ambejtsï uékapirini arhini Tata Diosïni chaari kómarhikuecharhu?
¿Mítespijtsï ini ambe?
Uandakua enga jindeeka ameni arhikuekasïndi “eska ísï úkuarhiaka”. Desde iónisïa, kómarhikuechaksï kʼamarhukunhasindi arhiparhini “ameni” (1 Crónicas 16:36).
7. Arhuta je tiempu parajtsï kómarhikua úni
Ménisïchi xáni uánikua ambe úkua jatsisïnga engachi no jamberi miájka kómarhini. ¿Na xáni jukaparharasïreni Jesúsi kómarhikua úni? Arhinta je Mateu 14:23 ka Markusʌ 1:35 ka uandontskuarhi je íri ambe:
-
¿Néna úsïreni Jesúsi arhutani tiempu para kómarhini?
-
Ka chá, ¿néna úpirini arhutani tiempu parajtsï kómarhini?
MÁRUKSÏ I AMBE UANDASÏNDI: “Kómarhikuakini no jarhuatasïndi, solu úsïndi eskari sáni sési pʼikuarherantaaka”.
-
¿Chá ambe uandapirini?
AMBE ENGACHI JORHENGUARHIKA
Mintsita jingoni kómarhini, úsïndi eskachi andarhieraaka Tata Diosïni. Ístu úsïndi eskachi no xáni uandanhiauaka ka jarhuatasïndijtsïni parachi imani ambe úni enga Jeoba jaiapanhintajka.
Ambejtsï jorhenguarhiski
-
¿Nénchi jatsiski para kómarhini?
-
¿Nénachi jatsiski para kómarhini?
-
¿Nénajtsïni jarhuatasïni kómarhikua úni?
ÍSTU EXE JE INI AMBE
Exea je mókuntskuechani imani kurhamarhikuecheri engaksï uánikuecha úkuarhiajka kómarhikueri ambe.
“Siete kurhamarhikuecha kómarhikueri ambe” (Aianhpiri, 1 de oktubri de 2010)
Arhinta je andisï xáni jukaparhakue eskajtsï chá kómarhiaka ka nénajtsï uaa sánderu sési kómarhini.
“¿Andisï xáni jukaparhakue kómarhini?” (Artikulu ma enga jw.org jimbo jaka)
Exe je ambe enga Biblia jorhentpijka, nénchi jatsiski para kómarhini.
“¿Sési jaki santuechani uandatsekuarhikuani?” (Artikulu ma enga jw.org jimbo jaka)
Ini bideu jingoni, exe je sini uétarhisïni lugari ma parachi kómarhini.
Jamberijtsï ístu uéjka ini ambe míteni
KURHAMARHIKUECHA ENGAKSÏ SÁNDERU ÚKUARHIJKA
¿Nénaksï jorhentpisïni Biblieri ambe Jeobaeri testiguecha?
Parajtsï Jeobaeri testiguechani jingoni jorhenguarhini Biblieri ambe, chájtsï uaaka náki uéjki Bibliani jingoni jorhenguarhini. Ístujtsï uaaka pʼímarhini chaari familiani o amiguechani.
