SAMBIRO 09
Sendelerani kwa Chiuta Kwizira mu Lurombo
Kasi muli kughanaghananirapo kuti mukukhumbikwira ulongozgi pa umoyo winu? Kasi muli na mafumbo ghakuzirwa agho mukukhumba kumanya mazgoro ghake? Kasi mukukhumba kusanguluskika panji kukhozgeka? Kasi mukukhumba kusendelera kwa Yehova? Lurombo lungamovwirani kuti muchite vinthu vyose ivi. Kweni kasi tikwenera kulomba wuli? Kasi Chiuta wakupulika malurombo ghose? Kasi mukwenera kuchita wuli kuti Chiuta wapulike malurombo ghinu? Tiyeni tidumbiskane.
1. Kasi tikwenera kulomba kwa njani ndipo tikwenera kulomba vichi?
Yesu wakasambizga kuti tikwenera kulomba kwa Adada ŵithu ŵakuchanya pera. Yesu wakalombanga kwa Yehova. Iyo wakati: “Ntheura, pakulomba mutenge: ‘Adada ŵithu imwe muli kuchanya . . .’” (Mateyu 6:9) Para tikulomba kwa Yehova tikuŵa nayo paubwezi wakukhora chomene.
Tingalomba chilichose icho tikukhumba. Kweni kuti Chiuta wapulike malurombo ghithu, ghakwenera kukolerana na ivyo iyo wakukhumba. “Kalikose ako tingalomba mwakuyana na khumbo lake, wakutipulika.” (1 Yohane 5:14) Yesu wakapeleka chiyelezgero cha vinthu vyakuzirwa ivyo tingalomba. (Ŵazgani Mateyu 6:9-13.) Padera pa kulomba vinthu ivyo tikwenjerwa navyo, tikweneraso kumuwonga chomene Chiuta chifukwa cha vinthu ivyo watichitira kweniso tikwenera kumupempha kuti wawovwire ŵanji.
2. Kasi tikwenera kulomba wuli?
Baibolo likutichiska kuti: “Pungulirani mitima yinu pamaso [pa Chiuta].” (Salimo 62:8) Ntheura tikwenera kulomba kufumira pasi pa mtima. Tingalomba mwakufumiska mazgu panji cha mu mtima kweni mu nthowa iyo yikulongora kuti tikuchindika Yehova. Tingalomba nyengo yiliyose kweniso kulikose uko tili.
3. Kasi Chiuta wakuzgora wuli malurombo ghithu?
Wakuzgora munthowa zakupambanapambana. Yehova wali kutipa Mazgu ghake, Baibolo, umo kanandi tikusangamo mazgoro gha mafumbo ghithu. Mazgu gha Chiuta, ‘muzeleza ghakumuzgora wavinjeru.’ (Salimo 19:7; ŵazgani Yakobe 1:5.) Yehova wangatipa mtende wa mumtima para tasangana na masuzgo, kweniso wangagwiliskira ntchito Ŵakhristu ŵanyithu kuti ŵatovwire.
MANYANI VINANDI
Wonani umo mungalombera malurombo ghakufumira pasi pa mtima agho ghakukondweska Yehova, kweniso umo lurombo lungamovwilirani.
4. Chiuta wakukhumba kuti tilombenge mwakwenelera
Kasi tikwenera kuchita vichi kuti Chiuta wapulike malurombo ghithu? Wonelerani VIDIYO.
Yehova wakukhumba kuti tilombenge kwa iyo. Ŵazgani Salimo 65:2, kufuma apo dumbiskanani mafumbo agha:
-
Kasi mukughanaghana kuti uyo ‘wakupulika malurombo’ wakukhumba kuti mulombenge kwa iyo? Chifukwa wuli?
Para tikukhumba kuti Chiuta wapulike malurombo ghithu, tikwenera kuchita ivyo iyo wakukhumba. Ŵazgani Mika 3:4 na 1 Petrosi 3:12, kufuma apo dumbiskanani fumbo ili:
-
Kasi tingasimikizga wuli kuti Yehova wapulikenge ivyo tikulomba?
Para kuli nkhondo wose ŵakulomba kuti ŵakaluske. Kasi mukughanaghana kuti Chiuta wakupulika malurombo agha nthena?
5. Tikwenera kulomba kufumira pasi pa mtima
Ŵanthu ŵanyake ŵali kusambizgika kuti ŵawerezgenge waka malurombo. Kweni kasi Chiuta wakukhumba kuti tilombenge nthena? Ŵazgani Mateyu 6:7, kufuma apo dumbiskanani fumbo ili:
-
Kasi mungachita wuli kuti muleke kuyowoya “vinthu vimoza pera mwakuwerezgawerezga” para mukulomba?
Zuŵa lililose mughanaghanirengepo mwakudunjika chinthu icho Chiuta wamutumbikani nacho ndipo muwongani. Para mungachita nthena kwa sabata yimoza, mbwenu ndikuti muŵenge kuti mwawonga Yehova pa vinthu 7 vyakupambanapambana.
Dada muwemi wakukhumba kuti mwana wake wayowoyenge nayo kufumira pasi pa mtima. Yehova nayo wakukhumba kuti timulombenge kufumira mu mtima
6. Lurombo ntchawanangwa chakufuma kwa Chiuta
Kasi lurombo lungatovwira wuli, chomene para tasangana na masuzgo? Wonelerani VIDIYO.
Baibolo likutiphalira kuti lurombo lungatovwira kuŵa na mtende wa mu mtima. Ŵazgani Ŵafilipi 4:6, 7, kufuma apo dumbiskanani mafumbo agha:
-
Nangauli ni nyengo zose yayi apo masuzgo ghithu ghangamara para talomba, kweni kasi lurombo lungatovwira wuli?
-
Kasi ni vinthu wuli vinyake ivyo mungatemwa kulomba?
Kasi mukumanya?
Mazgu ghakuti “ameni” ghakung’anamura kuti “viŵe ntheura” panji “nkhanira.” Kwamba waka kale, mu Baibolo mazgu ghakuti “ameni” ghakuyowoyeka kuumaliro wa lurombo.—1 Midauko 16:36.
7. Sangani nyengo yakulombera
Nyengo zinyake tingatangwanika chomene mwakuti tingaluwa kulomba. Kasi lurombo lukaŵa lwakuzirwa wuli kwa Yesu? Ŵazgani Mateyu 14:23 na Mariko 1:35, kufuma apo dumbiskanani mafumbo agha:
-
Kasi Yesu wakachitanga wuli kuti wasange nyengo yakulombera?
-
Kasi imwe mukutemwa kulomba nyengo wuli?
IVYO ŴANYAKE ŴAKUYOWOYA: “Kulomba nkhutaya waka nyengo chifukwa palije uyo wakupulika.”
-
Imwe mukuti wuli?
MWAKUDUMURA
Malurombo ghakufumira pasi pa mtima ghakutovwira kuti tisendelere kwa Chiuta, tiŵe na mtende wa mu mtima kweniso kuti tikondweskenge Yehova.
Kuweleramo
-
Kasi tikwenera kulomba kwanjani?
-
Kasi tikwenera kulomba munthowa wuli?
-
Kasi lurombo lungatovwira wuli?
SANGANI FUNDO ZAKUSAZGIKIRA
Sangani mazgoro gha mafumbo agho ŵanthu ŵakutemwa kufumba pa nkhani ya lurombo.
Wonani chifukwa icho mukwenera kulombera, kweniso umo mungalombera malurombo ghakupulikikwa.
“Chifukwa Wuli Nkhwenera Kupemphera?” (Nkhani ya pa Intaneti)
Wonani ivyo Baibolo likuyowoya pa nkhani ya uyo tikwenera kumulomba.
Mu sumu iyi, wonani usange malo na nyengo ni vyakukhumbikwa para tikulomba.
Panji Mungatemwa Kuŵerengaso Nkhani Izi
IVYO ŴANTHU ŴAKUTEMWA KUFUMBA
Kasi Kosi ya Kusambira Baibolo ya Ŵakaboni ŵa Yehova Ni Vichi?
Apo mukusambira Baibolo munthowa yakudumbiskana na Ŵakaboni ŵa Yehova, mungagwiliskira ntchito Baibolo lililose ilo mwakhumba. Fwatukani kuchemerako banja linu panji ŵabwezi ŵinu.
