MATAUPU 09

Fakapilipili Atu ki te Atua e Auala i ‵Talo

FAKATAGI/PEI

Kai mafaufau aka loa koe ki se takitakiga i tou olaga? E mata, e isi ne fesili tāua i tou mafaufau? E mata, e manako koe ki se fakamafanafanaga io me se fakamalosiga? E mata, e manako koe ke momea aka tou va pili mo Ieova? E mafai o fesoasoani atu a ‵talo i feitu katoa konei. Kae se a te auala tonu ke ‵talo atu ei? E mata, e fakalogologo te Atua ki ‵talo katoa? Ne a au mea e ‵tau o fai ko te mea ke lagona mai ne ia au ‵talo? Ke onoono aka tatou.

1. Ko oi e ‵tau o ‵talo tatou ki ei, mo mea e mafai o ‵talo atu tatou ki ei?

Ne akoako mai Iesu me e ‵tau fua mo tatou o ‵talo ki ‵tou tamana i te lagi. Ke oko ki a Iesu, ne ‵talo a ia ki a Ieova. Ana muna: “E ‵tau mo koutou o ‵talo atu penei: ‘Te motou Tamana telā i te lagi . . . ’” (Mataio 6:9) Kafai e ‵talo tatou ki a Ieova, ko fakamalosi aka ei ‵tou va fakataugasoa mo ia.

E mafai o ‵talo tatou mō so se mea. Ko te mea ke mafai o tali ne te Atua ‵tou ‵talo, e ‵tau o fetaui ‵lei mo tena loto. “So se mea e fakatagi atu tatou ki ei e ‵tusa mo [te] loto [o te Atua], e lagona eiloa ne ia tatou.” (1 Ioane 5:14) Ne tuku mai ne Iesu se fakaakoakoga o mea ‵lei e mafai o ‵talo tatou ki ei. (Faitau te Mataio 6:9-13.) I tafa o te ‵talo atu e uiga ki mea e manava‵se tatou ki ei, ke mo a ma puli o fakafetai ki te Atua ki mea ne fai ne ia mō tatou kae akai atu foki ke fesoasoani ki nisi tino.

2. E ‵tau o ‵talo atu pefea tatou?

E fakamalosi mai te Tusi Tapu ke “‵ligi atu ki tua a mea i [‵tou] loto ki . . . mua [o te Atua].” (Salamo 62:8) Tela la, e ‵tau o ‵talo atu tatou mai i ‵tou loto. E mafai o ‵talo tatou ki a Ieova i se leo maluga io me ‵talo lēmū atu i so se tulaga telā e fakaasi atu ei te āva ki a Ia. E mafai o ‵talo tatou i so se taimi mo so se koga.

3. E tali mai pefea ne te Atua ‵tou ‵talo?

E tali mai a ia ki ‵tou ‵talo i auala e uke. Ne tuku mai ne Ieova tena Muna, ko te Tusi Tapu, telā e maua ne tatou i ei a tali ki ‵tou fesili. A te faitau ki te Muna a te Atua, e mafai o “fai ne ia te tino telā e se lasi tena mea e iloa ke poto.” (Salamo 19:7; faitau te Iakopo 1:5.) E mafai o fai ne ia ke filemu ‵tou mafaufau māfai ko fe‵paki mo tulaga faiga‵ta. Kae e mafai o fakamalosi ne ia ana tino tapuaki ke fesoasoani mai māfai e manakogina.

KELI MALOSI IFO

Iloilo ki auala e mafai ei o fai atu a ‵talo mai i tou loto kolā e fakafiafia ki te Atua, mo te auala ka aoga ei ki a koe.

4. Mea e manakogina ne te Atua mō ‵talo

E mafai pefea o iloa ne tatou me e talia io me e se talia ne te Atua ‵tou ‵talo? Pei te VITIO.

VITIO: E Mata, e Fakalogologo te Atua ki ‵Talo Katoa? —Se vaega i ei (2:42)

E manako a Ieova ke ‵talo tatou ki a ia. Faitau te Salamo 65:2, ko sau‵tala ei ki fesili konei:

E mata, e manako a “te Tino e Lagona ne ia a ‵talo” ke ‵talo atu koe ki a ia? Kaia e fai mai ei koe penā?

E ‵tau o taumafai tatou ke ola e ‵tusa mo tulaga o te Atua māfai e ma‵nako tatou ke lagona ne ia ‵tou ‵talo. Faitau te Mika 3:4 mo te 1 Petelu 3:12, ko sau‵tala ei ki te fesili tenei:

E fakamautinoa aka pefea ne tatou me ka fakalogologo mai a Ieova ki ‵tou ‵talo?

I taimi o taua, e mafai o ‵talo a feitu e lua ke maua te manumalo. E mata, se mea ‵tau ke fakamoe‵moe tatou ke tali ne te Atua a ‵talo konei?

5. Ke ‵talo atu mai ‵tou loto

Ne akoako a nisi tino ke fakafoki‵foki faeloa a pati i olotou ‵talo. Kae e mata, tenā te auala e manako te Atua ke ‵talo tatou ki a ia? Faitau te Mataio 6:7, ko sau‵tala ei ki te fesili tenei:

E ‵kalo keatea pefea koe mai te “fakafoki‵foki” faeloa o pati i au ‵talo?

I aso takitasi, e mafai o mafaufau koe ki se fakamanuiaga i tou olaga, ko fakafetai atu ei ki a Ieova mō te fakamanuiaga tenā. Kafai e fai penā i aso takitasi o te vaiaso, ko tena uiga ko fitu a mea kese‵kese ne ‵talo koe ki ei i lō te fakafoki‵foki faeloa o au pati.

E manako se tamana ‵lei ke fakaasi atu ne tena tama a mea katoa i tena loto. E penā foki loa, e manako a Ieova ke ‵talo atu tatou mai i ‵tou loto

6. Te ‵talo se meaalofa mai te Atua

E maua pefea ne tatou a te malosi e auala i ‵talo i taimi ‵lei mo taimi sē ‵lei? Pei te VITIO.

VITIO: E Mafai o Fa‵ki Tatou e Auala i ‵Talo (1:32)

E tauto mai te Tusi Tapu me e mafai ne ‵talo o fai ke filemu tonu ‵tou mafaufau. Faitau te Filipi 4:6, 7, ko sau‵tala ei ki fesili konei:

E tiga eiloa e se faka‵lei aka ne ‵talo a ‵tou fakalavelave, kae aoga pefea ki a tatou?
Ne a nisi mea e manako koe ke ‵talo ki ei?

E iloa ne koe?

A te pati “amene” e fakauiga ki te “ke fai eiloa penā” io me “e tonu.” Ne fakaaoga faeloa te pati “amene” i fakaotiga o ‵talo talu mai taimi o te Tusi Tapu.—1 Nofoaiga Tupu 16:36.

7. Ke mo a ma puli o ‵talo

I nisi taimi ko to fakalave‵lave tatou, telā ko puli o ‵talo. E pefea te tāua o ‵talo ki a Iesu? Faitau te Mataio 14:23 mo te Maleko 1:35, ko sau‵tala ei ki fesili konei:

Ne fakaavanoa pefea ne Iesu ana taimi mō ‵talo?
Ne a taimi ‵lei e mafai o ‵talo ei koe?

MEA E FAI MAI NE NISI TINO: “E fai ne ‵talo ke ‵lei ou lagonaga kae seai sena aoga.”

Se a tau faka‵tau?

MANATU AOGA

A ‵talo kolā e fai mo te loto kātoa e fai ei ke pili atu tatou ki te Atua, e filemu ei ‵tou mafaufau kae maua mai i ei te malosi e manakogina ke fakafiafia ki a Ieova.