FUNDO 09
Khwederai Dhuze na Mwari Nge Munamato
Makambozwa here mecida kutungamirirhwa mu upenyu? Muno mibvunzo yamunoda kudairhwa here? Munoda kunyaradzwa kana kubambiswa here? Munoda kuzwa muri dhuze na Djehovha here? Munamato unokwanisa kumubetsera kudzadzisa zviro zvese zvamunoda. Asi ngaupi mushobo wakanaka we kuita munamato? Mwari anozwa minamato yese here? Mungaitei kuti mugare ne cokwadi cokuti Mwari acapurutana minamato yenyu? Ngatione.
1. Tinodikana kunamata kunaani, uye nge zvei?
Djesu akafundisa kuti tinodikana kuita munamato kuna Baba edu basi e kudenga. Djesu pacake akanamata kuna Djehovha. Iyena akati: “Munodikana kunamata kudai: ‘Baba edu ari kudenga . . .’” (Mateu 6:9) Patinoita munamato kuna Djehovha, tinobambisa ukama wedu naye.
Tinganamata tecikumbira ciro cese catinoda. Honde, kuti Mwari adaire minamato yedu, iyona inodikana kuenderana ne kuda kake. “Kana tikakumbira ciro cipi haco maererano no kuda ka [Mwari], iyena anotizwa.” (1 Juau 5:14) Djesu akapasa miezaniso ye zviro zvakasisira zvatingabatanidza pa minamato yedu. (Erengai Mateu 6:9-13.) Patinoita munamato, atidikani kubhuya nge zve zvinetso zvedu basi, asi tinodikanawo kutenda Mwari nge zviro zvese zvaanotiitira uye kumukumbira kuti abetserewo amweni.
2. Tinodikana kunamata kudini?
Bhaibheri rinotikohomedzesa kuti “tidurure mwoyo [yedu] pamberi pa [Mwari].” (Pisarema 62:8) Minamato yedu inodikana kubva mukati me mwoyo. Tingaita munamato ne izwi guru kana cinyararire pa nguwa ipi hayo kana mbuto yatinonga tiri kunyazi takagodama, takagara uye takaima. Cinokosha kupangidza rureremedzo kuna Djehovha.
3. Mwari anodaira kudini minamato yedu?
Mwari anozviita nge mishobo yakasiyana-siyana. Djehovha akatipasa Soko rake Bhaibheri matinonyanya kugumira mhinduro dze mibvunzo dzedu. Kuerenga Soko ra Mwari “[kungangwadza] asina ruziyo.” (Pisarema 19:7; erengai Tiyago 1:5.) Iyena anokwanisa kutipasa runyararo re ku mwiya patinosongana ne zvinetso. Uye iyena anokwanisa kuita kuti anamati ake atibetsere patinonga tecida.
FUNDAI ZVAKAWANDA
Ongororai kuti mungaita kudini minamato inobva pa mwoyo uye inopfadza Mwari, mozoonawo kuti munamato ungakwanisa kumubetsera kudini.
4. Pano zvatinodikana kuita kuti Mwari azwe minamato yedu
Zvinyi zvinoita kuti minamato yedu itambirhwe kana kusama kutambirhwa na Mwari? Ridzai VHIDHIYO.
Djehovha anoda kuti tinamate kaari. Erengai Pisarema 65:2, pedzepo cedzai nge zve mibvunzo dzinoteera:
-
Munorangarira kuti “Muzwi we minamato” anoda kuti imwimwi munamate kaari here? Ngei?
Tinodikana kuedza kurarama maererano ne mitemo ya Mwari kana tecida kuti iyena azwe minamato yedu. Erengai Mika 3:4 uye 1 Pedru 3:12, pedzepo cedzai nge zve mubvunzo unoteera:
-
Tingaita kudini kuti tigare ne cokwadi kuti Djehovha acazwa minamato yedu?
Mu nguwa ye hondo dii rimwe na rimwe ringakwanisa kuita minamato yekuda kuwina. Djehovha anodaira minamato yakadaro here?
5. Minamato yedu inodikana kubva pa mwoyo
Anhu amweni akafundiswa kuphinda-phinda masoko pa minamato. Asi Mwari anoda kuti tinamate kudaro here? Erengai Mateu 6:7, pedzepo cedzai nge zve mubvunzo unoteera:
-
Mungaitei kuti musaphinde-phinde “masoko” pa minamato yenyu?
Zuwa rimwe na rimwe, mungarangarira cikomborero cimwe pa zuwa pedzepo tendai Djehovha nge cikomborero icona. Zviitei mazuwa ese pa sumana, kana mukadaro munonga maita munamato nge zve zviro zvinomwe zvakasiyana-siyana musikazviphindi.
Baba akanaka anoda kuti mwana wawo arekete nawo ne mwoyo wese. Djehovha anoda kuti muite munamato kaari ne mwoyo wese
6. Munamato cipo ca Mwari
Munamato ungabambisa kudini, kunyazi mu nguwa yakanaka uye ne isikazi kunaka? Ridzai VHIDHIYO.
Bhaibheri rinopikira kuti munamato ungatibetsera kuti tigumire runyararo re mwiya. Erengai Afiripi 4:6, 7, pedzepo cedzai nge zve mibvunzo dzinoteera:
-
Kunyazi munamato usikapedzi zvinetso zvedu, unotibetsera kudini?
-
Imwimwi maizoda kuita minamato nge zviro zvipi?
Maizviziya here?
Soko rokuti “ameni” rinoda kureya kuti “ngazviitike” kana kuti “zvirokwazvo.” Kubva mu nguwa ye Bhaibheri, “ameni” unoseenzeswa pa kupera ke munamato. —1 Makoronika 16:36.
7. Musakanganwe kuita munamato
Nguwa dzimweni, tingabatikana maningi dakara kukanganwa kuita munamato. Djesu aikoshesa munamato here? Erengai Mateu 14:23 uye Marko 1:35, pedzepo cedzai nge zve mibvunzo dzinoteera:
-
Djesu aiitei kuti aone nguwa yekuita munamato?
-
I nguwa ipi yamungaona mukana kuti muite munamato?
ANHU AMWENI ANOTI: “Munamato aubetseri.”
-
Imwimwi munotiwo kudini?
MUCIGWAGWA
Minamato inobva mukati me mwoyo inotikhwededza dhuze na Mwari, inotipasa runyararo re mwiya uye inotipasa simba ratinoda kuti tipfadze Djehovha.
Mibvunzo yekuhwirinzira
-
Tinodikana kuita munamato kunaani?
-
Tinodikana kuita kudini munamato?
-
Munamato unobetsera kudini?
ZIYAI ZVAKAWANDA
Gumirai mhinduro dze mibvunzo dzinoizwa nge anhu ajinji dzakaringana ne minamato.
“Zviro Zvinomwe Zvamunodikana Kuziya nge zve Munamato” (Murindiri wa 1 ya Otubro wa 2010)
Fundai nge zve zvikonzero zvinokosha zvinoita kuti munamate uye kuti mungagadzirisa kudini manamatire enyu.
Onai zvinofundiswa ne Bhaibheri zvakaringana nezvekuti tinodikana kuita munamato kunaani.
“Ndinodikana Kuita Munamato ku Acena Here?” (Fundo ye mu saite)
Mu vhidhiyo ii ye ngoma, onai kuti zvino basa here kuti tiri kuita munamato tiripi uye nguwai.
