9-ТӤ УРОК

Вӧсяськыса Инмарлы матэ кариське

ЛЭЗЁНО

Вал-а тӥляд сыӵе учыръёсты, куке тӥледлы визь-кенеш кулэ вал? Утчаськоды-а тӥ кулэ луись юанъёстылы валэктонъёс? Кулэ-а тӥледыз юнматыны яке юрттыны тӥледлы? Потэ-а тӥляд Иеговалы матэгес кариськемды? Вань та учыръёсын тӥледлы юрттоз вӧсяськон. Нош кызьы вӧсяськоно? Кылзэ-а Инмар вань вӧсяськонъёсты? Кызьы тӥледлы вӧсяськоно, Инмар тӥледыз мед кылоз шуыса? Ойдолэ тодомы.

1. Кинлы вӧсяськоно но мар сярысь?

Иисус вераз, милемлы инмысь Атаймылы гинэ вӧсяськоно шуыса. Иисус но Иеговалы вӧсяськиз. Со вераз: «Тӥ тазьы вӧсяськелэ: Инмысь Атаймы!» (Матфей 6:9). Иеговалы вӧсяськыса, милям соин кусыпъёсмы юнмало.

Ми котьмар сярысь вӧсяськыны быгатӥськомы. Нош Инмар вӧсяськонъёсмылы ответ мед сётоз шуыса, милемлы вӧсяськоно со сярысь, мар солы ярамон луэ. «Солэн эрикезлы тэрытскыса, мае гинэ ум куриське, Со асьмеды кылзэ» (1 Иоанн 5:14). Иисус вераз, мар сярысь вӧсяськыны луоз. (Лыдӟе Матфейлэсь 6:9—13.) Ми быгатӥськомы вӧсяськыны со сярысь, мар милемыз сюлмаськытэ. Но милемлы вунэтоно ӧвӧл Инмарлы тау карыны ваньмыз понна, мар со милемлы сётӥз. Озьы ик вунэтоно ӧвӧл курыны мукетъёсызлы юрттыны.

2. Кызьы вӧсяськоно?

Библия ӧте милемыз: «Со [Инмар] азьын аслэсьтыд сюлэмдэ усьты» (Псалтирь 61:9). Соин ик милям вӧсяськонъёсмы сюлмысь потыны кулэ. Ми быгатӥськомы вӧсяськыны ас поннамы но, шара но. Но Иегова уг куры, ми солы одно ик сылыса, пукыса яке пыдесъяськыса мед вӧсяськомы шуыса. Иеговалы котькызьы но вӧсяськыны луэ, мед гинэ адӟиськоз, ми соин гажаса вераськиськомы шуыса. Озьы ик ми солы вӧсяськыны быгатӥськомы котьку но котькытын.

3. Кызьы Инмар вӧсяськонъёсмылы ответ сётэ?

Инмар вӧсяськонъёсмылы ответ сётыны пӧртэм сямен быгатэ. Иегова милемлы аслэсьтыз Кылзэ, Библиез, сётӥз. Отысь ми юанъёсмылы валэктонъёс шедьтыны быгатӥськомы. Библиез лыдӟон «огшоры калыкез визьма». (Псалтирь 18:8; лыдӟе Иаковлэсь 1:5.) Озьы ик, шуг-секытъёсын пумиськыкумы, Иегова милесьтым сюлэммес каньыл карыны быгатэ. Со сяна, кулэ дыръяз, со милемлы аслаз ужась-тыршисьёсыз пыр юрттыны быгатэ.

МУРГЕС ЭСКЕРЕ

Ойдолэ тодомы, кызьы Инмарлы вӧсяськоно, милям сюлмысь потэм кылъёсмы солы мед яралозы шуыса, но кыӵе пайда вайыны быгатэ вӧсяськон.

4. Мар кароно, Инмар вӧсяськонъёстэс мед кылоз шуыса

Кызьы валано, ярало-а Инмарлы вӧсяськонъёсмы? Учке ВИДЕОРОЛИКЕЗ.

ВИДЕОРОЛИК: «Кылзэ-а Инмар вань вӧсяськонъёсты?» (люкетэз) (2:42)

Иегова возьма, ми солы вӧсяськомы шуыса. Лыдӟе Псалтирез 64:3 но та юанъёслы валэктонъёс сётэ:

Кызьы тӥ малпаськоды, потэ-а Иеговалэн, тӥ солы мед вӧсяськоды шуыса? Малы тӥ озьы малпаськоды?

Инмар вӧсяськеммес мед кылоз шуыса, солэсь кылзӥськыса улыны тыршоно. Лыдӟе Михейлэсь 3:4 но 1 Пётрлэсь 3:12 но та юанлы валэктон сётэ:

Мар кароно, Иегова вӧсяськонъёсмес мед кылоз шуыса?

Война дыръя кыкез ик ожмаськись шаеръёс вормон курыса вӧсяськыны быгато. Шонер-а луоз возьманы, Инмар соосызлэсь но, таосызлэсь но вӧсяськемзэс кылоз шуыса?

5. Милям вӧсяськонъёсмы сюлмысьтымы потыны кулэ

Куд-ог адямиосты дышетӥзы дышетэм вӧсяськонъёсты вераны яке соосты вӧсяськон книгаосысь лыдӟыны. Но кельшо-а Инмарлы сыӵе вӧсяськонъёс? Лыдӟе Матфейлэсь 6:7 но та юанлы валэктон сётэ:

Мар юрттоз милемлы «мултэссэ» вератэк, яке одӥг мае ке ик выльысь но выльысь вератэк, вӧсяськыны?

Тырше котькуд нунал мае ке умойзэ адӟыны но тау каре со понна Иеговалы. Озьы арня ӵоже котькуд нунал тӥ пӧртэмез сярысь вӧсяськыны быгатоды.

Умой атайлэн потэ, солэн нылпиосыз солы мед вералозы шуыса ваньзэ, мар соосыз сюлмаськытэ. Иеговалэн но потэ, ми солы сюлэммес мед кисьтомы шуыса

6. Вӧсяськон — со Инмарлэн кузьымез

Кызьы вӧсяськон милемлы кужым сётыны быгатэ, тужгес но секыт дыръёсы? Учке ВИДЕОРОЛИКЕЗ.

ВИДЕОРОЛИК: «Вӧсяськон чиданы юрттэ» (1:32)

Библия вера, ми вӧсяськимы ке, милям сюлэммы каньылгес луоз шуыса. Лыдӟе Филиппыослы 4:6, 7 но та юанъёслы валэктонъёс сётэ:

Вӧсяськон котьку ик шуг-секытъёсмес уг быдты ке но, кызьы со милемлы юрттэ?
Мар сярысь тӥляд вӧсяськемды потэ?

Тодӥськоды-а тӥ?

«Аминь» кыл «озьы мед луоз» яке «шонер» шуэмез возьматэ. Вашкала дырысен ик вӧсяськонлэн пумаз «аминь» кылэз верало (1 Паралипоменон 16:36).

7. Вӧсяськыны юри дыр висъялэ

Куддыръя милям туж трос ужъёсмы, соин ик ми вӧсяськыны вунэтӥськомы. Нош вунэтэ-а вал Иисус вӧсяськыны? Лыдӟе Матфейлэсь 14:23 но Марклэсь 1:35, собере та юанъёслы валэктонъёс сётэ: