09-ДӘРИС
Дуа арқилиқ Яратқучиға йеқинлишиш
Сиз һаятиңизда көрсәтмиләргә муһтаҗ болғанму? Җавап тапмақчи болған муһим соаллириңиз барму? Сиз тәсәллигә яки илһамға муһтаҗму? Яратқучи Худаға техиму йеқинирақ болушни халамсиз? Мошуларниң һәммисигә дуа ярдәм берәләйду. Амма қандақ усулда дуа қилиш тоғра болиду? Худа һәрқандақ дуани тиңшамду? Униң дуалириңизға қулақ салидиғанлиғиға ишиниш үчүн немә қилалайсиз? Келиң, көрүп бақайли.
1. Кимгә дуа қилишимиз керәк?
Нуһ, Ибраһим, Муса вә Давут пәйғәмбәрләр һәқ Худа Йәһваға дуа қилған. Мәсилән, Давут пәйғәмбәр мундақ дегән: «Йәһва Рәббим, дуайимни аңлап, ярдәм Тоғрилиқ илтиҗамни қобул қилғина» (Зәбур 143:1). Биз Йәһваға дуа қилғанда, Униң билән болған достлуғимиз күчийиду.
Дуада немә сорисақ болиду? Биз дуалиримизда Йәһваниң ирадисигә мас келидиған һәрқандақ нәрсини сорисақ болиду. Әгәр шундақ қилсақ, Яратқучимиз дуалиримизға җавап бериду. Муқәддәс китап: «Пәрвәрдигарға мураҗиәт қилғанда, шуниңға ишинимизки: Униң ирадисигә мувапиқ неминила сорисақ, У бизни тиңшайду»,— дәйду (Йоһанниң 1-хети 5:14). Әйса пәйғәмбәр үлгилик дуасида немиләр һәққидә дуа қилишни көрсәткән еди (Мәтта 6:9—13ни оқуң). Биз шәхсий еһтияҗлиримиз һәққидә дуа қилғандин башқа, чоқум Худаниң биз үчүн қилғанлириға миннәтдарлиқ билдүрүшимиз вә башқилар үчүн ярдәм сорашни унтумаслиғимиз керәк.
2. Дуани қандақ қилишимиз керәк?
Муқәддәс китап Худаға «пүтүнләй жүрәкләрни төкүп бериңлар» дәп бизгә илһам бериду (Зәбур 62:8). Шуңа дуалиримиз сәмимий вә чин жүрәктин чиқиши керәк. Биз үнлүк яки үнсиз авазда, бәдинимиз һәрхил йөнилиштә яки һаләттә, һәрқандақ җайда вә һәрқандақ вақитта һөрмәт билән дуа қилсақ болиду.
3. Худа дуалириңизға қандақ җавап қайтуриду?
У һәрхил усуллар билән җавап қайтуриду. Йәһва Өз Сөзи болған Муқәддәс китапни бәргән. Униңдин соаллиримизға җавапларни тапалаймиз. Худаниң Сөзини оқуш «Тәҗрибисизни дана қилиду» дәп йезилған (Зәбур 19:7; Яқуп 1:5ни оқуң). Биз қийинчилиқларға дуч кәлгәндә, У бизгә көңүл хатирҗәмлигини берәләйду. Биз муһтаҗлиққа чүшсәк, У Өз хизмәтчилирини ишлитип, бизгә ярдәм бериду.
ЧОҢҚУРИРАҚ ҚЕЗИҢ
Яратқучиңизни хурсән қилиш үчүн дуани қандақ қилсақ болиду вә дуаниң сиз үчүн қандақ пайдиси барлиғи һәққидә издинип көрүң.
4. Яратқучи қобул қилидиған дуалар
Яратқучи Йәһваниң дуалиримизни қобул қилиш-қилмаслиғи немә қилишимизға бағлиқ? ВИДЕОНИ көрүң.
Йәһва Униңға дуа қилишимизни халайду. Зәбур 65:2ни оқуң, кейин төвәндики соалларға җавап бериң:
-
Сизниңчә, «дуа Аңлиғучи» Худа сизниң Униңға дуа қилишиңизни халамду? Немә үчүн?
Яратқучиниң дуалиримизға қулақ селишини халисақ, биз чоқум Униң өлчәмлиригә мувапиқ яшишимиз керәк. Мика 3:4 вә Петрусниң 1-хети 3:12ни оқуң, кейин төвәндики соалға җавап бериң:
-
Йәһваниң дуалиримизға қулақ салидиғанлиғиға қандақ ишинәләймиз?
Уруш болғанда, һәр иккила тәрәп ғәлибә үчүн дуа қилиду. Шундақ дуаларни Яратқучи қобул қилиду, дәп үмүт қилиш әқилгә сиғамду?
5. Дуалиримиз охшаш сөзләрни қайта-қайта тәкрарлаш әмәс, чин жүрәктин чиққан сөзләр болуши керәк
Бәзи адәмләр дуаларни сөзму сөз ядлавелиш керәк дәп үгитиду. Йәнә бәзиләр өзлириму чүшәнмәйдиған тилларда дуа қилиду. Бирақ Яратқучи бизниң шундақ дуа қилишимизни халамду? Мәтта 6:7ни оқуң, кейин төвәндики соалға җавап бериң:
-
Дуалириңизда охшаш сөзләрни қайта-қайта тәкрарлаштин өзүңизни қандақ сақлалайсиз?
Һәр күни һаятиңизда еришкән мәлум бир бәрикәт һәққидә ойлап, шу бәрикәт үчүн Яратқучиға миннәтдарлиқ билдүрүң. Бир һәптә һәр күни шундақ қилиң. Шунда йәттә күндә йәттә нәрсә һәққидә дуа қилип, охшаш нәрсини тәкрарлимайсиз.
Көйүмчан ата балисиниң қәлбидики жүрәк сөзлирини ейтип беришини халайду. Худди шуниңдәк, дуа қилғинимизда, меһир-шәпқәтлик Яратқучимиз, ич бағримизни Униңға төкүп беришимизни халайду
6. Дуа — Йәһва Худа бизгә бәргән һәдийә
Дуа яхши-яман күнләрдә бизгә қандақ күч бериду? ВИДЕОНИ көрүң.
Муқәддәс китап шундақ вәдә беридуки, дуа бизгә һәқиқий роһий хатирҗәмликкә еришишимизгә ярдәм бериду. Филипиликләргә 4:6, 7ни оқуң, кейин төвәндики соалларға җавап бериң:
-
Гәрчә дуа һемишәм қийинчилиқлиримизни пүтүнләй йоқ қилмисиму, У қандақ ярдәм бериду?
-
Сиз немиләр һәққидә дуа қилишни халайсиз?
Сиз биләмсиз?
«Амин» сөзиниң мәнаси «шундақ болсун» яки «тоғра». Муқәддәс китап заманидин башлап та һазирғичә «амин» сөзи дуа ахирлашқанда ейтилиду (Тарихнамә 1-язма 16:36).
7. Дуа қилиш үчүн вақит чиқириш
Бәзидә шунчә алдираш болуп кетип, дуа қилишни унтуп қалимиз. Әйса пәйғәмбәр үчүн дуа қилиш қанчилик муһим болған? Мәтта 14:23 вә Марк 1:35ни оқуң, кейин төвәндики икки соалға җавап бериң:
-
Әйса пәйғәмбәр дуа қилишқа вақит чиқириш үчүн, немә иш қилған?
-
Сиз дуа қилиш үчүн, қачан вақит чиқиралайсиз?
БӘЗИЛӘР МУНДАҚ ДӘЙДУ: «Пәрвәрдигар пәқәт әрәп тилида қилған дуаларни қобул қилиду».
-
Яратқучимиз пәқәт әрәп тилини чүшинәмду?
ХУЛАСӘ
Чин жүрәктин қилған дуалар бизни Худаға йеқинлаштуриду, роһий хатирҗәмликкә ериштүриду вә Яратқучини хурсән қилиш үчүн тоғра ишларни қилишқа күч бериду.
Тәкрарлаш
-
Кимгә дуа қилишимиз керәк?
-
Қандақ дуа қилишимиз керәк?
-
Дуа қилишниң қандақ пайдиси бар?
ИЗДИНИП КӨРҮҢ
Дуа һәққидә көп соралған соалларниң җаваплирини көрүп беқиң.
«Дуа һәққидә билишкә тегишлик йәттә нәрсә» («Күзитиш мунари» 2010-жил, 1-октябрь)
Дуа қилишниң сәвәплири вә дуалириңизниң сүпитини қандақ яхшилаш һәққидә биливелиң.
Муқәддәс китап немә үчүн дуа қилишимиз һәққидә немиләрни үгитидиғанлиғини муһакимә қилиң.
Бу музыкилиқ видеодин қачан вә қәйәрдә дуа қилиш керәклиги һәққидә биливелиң.
Буларғиму қизиқишиңиз мүмкин
КӨПЧИЛИКНИ ҚИЗИҚТУРИДИҒАН СОАЛЛАР
Муқәддәс китаптин билим елиш үчүн Йәһва гувачилири билән тәтқиқ қилиш қандақ өткүзүлиду?
Өзүңизгә тонушлуқ һәрқандақ Муқәддәс китапни ишлитип, Йәһва гувачилири тәминлигән һәқсиз билим елиш дәрислирини тәтқиқ қилип үгәнсиңиз болиду. Тәтқиқ үгинишкә пүтүн аилә әзалириңизни яки достлириңизни чақирсиңиз болиду.
