OCIPAMA 09
Ohutililo yi Pamisa Ukamba Wove la Suku
Anga hẽ wa pitile ale locitangi cimue okuti, wa sukilile onumbi yimue yiwa? O kuete hẽ apulilo a velapo atiamẽla komuenyo o sukila okuti a tambuluiwa? O sukila hẽ elembeleko kuenda ekuatiso? O yongola hẽ oku kuata ukamba wa pama la Yehova? Ohutililo yi pondola oku ku kuatisa kovina viosi o sukila. Pole, yipi onjila ya suapo yoku likutilila? Anga hẽ Suku o yevelela olohutililo viosi? Nye o sukila oku linga oco Suku a yeve olohutililo viove? Tu ci konomuisi.
1. Tu sukila oku likutilila kulie kuenda nye tu pondola oku pinga?
Yesu wa longisa okuti, tu sukila oku likutilila lika ku Isietu wo kilu. Yesu wa enda oku likutilila ku Yehova. Eye hati: “Vu sukila oku likutilila ndoco: ‘A Isietu o kasi kovailu . . . ’” (Mateo 6:9) Eci tu likutilila ku Yehova, ukamba wetu laye u pamisiwa.
Vohutililo tu pondola oku pinga cosi tu sukila. Ocili okuti, oco Suku a tambulule olohutililo vietu, ovio vi sukila oku likuata locipango caye. “Nda tu pinga ovina viosi vi likuata locipango [ca Suku], eye o tu yeva.” (1 Yoano 5:14) Yesu wa eca ongangu yiwa catiamẽla kovina tu pondola oku pinga. (Tanga Mateo 6:9-13.) Tu pondolavo oku likutilila catiamẽla kovina vietu muẽle. Pole, ka tu ka ivaliko oku likutililako vakuetu kuenda oku eca olopandu ku Suku omo liovina a siata oku tu lingila.
2. Tu likutilila ndati?
Embimbiliya li tu vetiya oku ‘situluila ovisimĩlo [vietu ku Suku].’ (Olosamo 62:8) Olohutililo vietu vi sukila oku lingiwa lutima wosi. Tu pondola oku likutilila londaka yi yevala, oku loñola kuenda lonjila yimue yi lekisa okuti, tua sumbila Yehova. Citava okuti, tu likutilila vapuluvi osi kuenda pocitumãlo cosi tu sangiwa.
3. Suku o tambulula ndati olohutililo vietu?
Eye o ci linga volonjila vialua. Yehova wa eca Ondaka yaye Embimbiliya muna tua siata oku sanga atambululo apulilo etu. Oku tanga Ondaka ya Suku, ku kuatisa “omunu wa kamba olondunge oku kuata olondunge.” (Olosamo 19:7; tanga Tiago 1:5.) Yehova o pondola oku tu ĩha ombembua yo vutima eci tu liyaka lovitangi. Eye o vetiya afendeli vaye oco va tu kuatise eci tu sukila ekuatiso.
LILONGISA ONDONGOSI
Kũlĩhĩsa eci o sukila oku linga oco olohutililo o linga lutima wosi vi yeviwe la Suku kuenda ndomo vi pondola oku ku kuatisa.
4. Ceci tu sukila oku linga oco Suku a yeve olohutililo vietu
Ovina vipi vi lekisa nda olohutililo vietu vi taviwa la Suku ale sio? Tala OVIDEO.
Yehova o yongola okuti tu likutilila kokuaye. Tanga Olosamo 65:2, noke konomuisa apulilo a kuãimo:
-
O sima hẽ okuti ‘Ukuakuyeva ohutililo’ o yongola okuti o likutilila kokuaye? Momo lie o simĩla ndoco?
Tu sukila oku ambata omuenyo u litava lovihandeleko via Suku nda tu yongola okuti, eye o yeva olohutililo vietu. Tanga Mika 3:4 kuenda 1 Petulu 3:12, noke konomuisa epulilo li kuãimo:
-
Tu kolela ndati okuti Yehova o yeva olohutililo vietu?
Vokuenda kuyaki umue asualali vovimunga vivali via litepa, va likutilila ku Suku oco va yule. O sima hẽ okuti ca sunguluka ku Suku oku tambulula olohutililo viaco?
5. Olohutililo vietu vi sukila oku lingiwa lutima wosi
Omanu vamue va lilongisa okuti, va sukila oku linga olohutililo ku Suku poku pitolola olondaka vimuamue olonjanja viosi. Anga hẽ eci oco Suku a yongola? Tanga Mateo 6:7, noke konomuisa epulilo li kuãimo:
-
Nye o sukila oku linga oco ku ka “tukole ovina vimuamue olonjanja viosi” volohutililo viove?
Eteke leteke, sokolola kesumũlũho limue Yehova a eca kokuove kuenje eca olopandu kokuaye omo liesumũlũho liaco. Nda wa ci linga oloneke viosi viosemana, o ka limbuka okuti, wa likutilila ovina epanduvali via litepa okuti kua pituluile olondaka vimuamue.
Isia umue uwa o sole eci omõlaye a sapela laye lutima wosi. Haicovo Yehova a sole. Eye o sole eci tu likutilila lutima wosi
6. Ohutililo ombanjaile yimue yi tunda ku Suku
Ohutililo yi tu ĩha ndati ongusu, ca piãla enene kapuluvi ovitangi? Tala OVIDEO.
Embimbiliya li popia okuti, ohutililo yi tu kuatisa oku kuata ombembua yo vutima. Tanga Va Filipoi 4:6, 7, noke konomuisa apulilo a kuãimo:
-
Ndaño okuti olohutililo ka vi maliko ovitangi viove, ovio vi ku kuatisa ndati?
-
Ovina vipi o yongola oku pinga vohutililo?
Wa ci kũlĩha?
Ondaka “amene” yi lomboloka “ci lingiwe” ale “ocili muẽle.” Tunde kosimbu, ondaka “amene” ya siata oku tukuiwa kesulilo liolohutililo.—1 Asapulo 16:36.
7. Sokiya otembo yoku likutilila
Olonjanja vimue tu ivalako oku likutilila omo liovina vialua tu linga. Ohutililo ya kuatele esilivilo lipi ku Yesu? Tanga Mateo 14:23 kuenda Marko 1:35, noke konomuisa apulilo a kuãimo:
-
Nye Yesu a enda oku linga oco a kuate otembo yoku likutilila?
-
Nye o sukila oku linga oco o kuate otembo yoku likutilila?
OMANU VAMUE VA POPIA VATI: “Ohutililo onjila yimue ño oco omanu va liyeve ciwa, pole, ka yi kuatisa.”
-
Nda wa popia nye?
NYE WA LILONGISA?
Olohutililo tu linga lutima wosi, vi pamisa ukamba wetu la Suku, vi tu ĩha ombembua yo vutima kuenda ongusu tu sukila oco tu sanjuise Yehova.
Oku Pitulula
-
Tu sukila oku likutilila kulie?
-
Tu likutilila ndati?
-
Ohutililo yi tu kuatisa ndati?
OCO O KŨLĨHE OVINA VIKUAVO
Sanga atambululo apulilo a siata calua atiamẽla kohutililo.
“Ovina Epanduvali o Sukila Oku Kũlĩha Viatiamẽla Kohutililo” (Utala Wondavululi wa Susu-Elombo 2011)
Lilongisa esilivilo lioku likutilila kuenda ndomo o pondola oku mioñolola olohutililo viove.
“Ci Kuete hẽ Esilivilo Oku Likutilila?” (Ocipama ci sangiwa lika vo Internet)
Kulie tu sukila oku likutilila? Kũlĩhĩsa eci Embimbiliya li longisa catiamẽla kondaka yaco.
“Ndi Sukila hẽ Oku Likutilila Kolosandu?” (Ocipama ci sangiwa lika vo Internet)
Vocisungo eci ci lekisiwa vovideo, limbuka okuti, tu pondola oku likutilila vapuluvi osi kuenda kovitumãlo viosi.
Ove o ka ci Sola
APULILO A SIATA
Elilongiso Liembimbiliya li Lingiwa Lolombangi Via Yehova li Lomboloka Nye?
Lekuatiso lielilongiso li lingiwa ocali Lolombangi Via Yehova, o pondola oku kuama Lembimbiliya liosi o yongola. Lianja poku laleka epata liove liosi ale akamba vove, oco vu lilongisili kumosi.
