UYONO 09
Sikẹrẹ Ọghẹnẹ Womarẹ Ẹrhovwo
Wo rorori nẹ wọ guọnọ odjekẹ vwẹ akpeyeren? Wo vwo enọ eghanghanre ru wọ guọnọ ẹkpahọnphiyọ rayen? Wọ guọnọ uchebro yẹrẹ ọbọngan? Wọ guọnọ sikẹrẹ Jihova vwọ vrẹ obo ri jovwo? Ẹrhovwo se ru erọnvwọn nana eje kẹ wẹ. Jẹ mavọ yen ofori nẹ a nẹrhovwo wan? Ẹrhovwo eje yen Ọghẹnẹ kerhọ rọyen? Die yen wo se ru o vwo muwẹro nẹ ọ kerhọ rẹ ẹrhovwo wẹn? E jẹ a fuẹrẹn enọ nana.
1. Ono yen ofori nẹ a nẹrhovwo rhe, kẹ die yen a sa nẹrhovwo kpahen?
Jesu yonori nẹ Ọsẹ avwanre rọhẹ odjuvwu ọvo yen avwanre nẹrhovwo rhe. Jesu komobọ nẹrhovwo rhe Jihova. Ọ da ta: “Enẹ ovwan nẹ ẹrhovwo: Ọsẹ rẹ avwanre rọ hẹ obo odjuvwu . . . ” (Matiu 6:9) A da nẹrhovwo rhe Jihova, ọ cha nẹrhẹ oyerinkugbe rẹ avwanre vẹ ọ rọyen ganphiyọ.
Avwanre sa nẹrhovwo kpahen kemu kemu. Vwọrẹ uyota, Ọghẹnẹ ke sa kpahenphiyọ ẹrhovwo avwanre, ofori nẹ o shephiyọ ọhọre rọyen. “Avwanre da nọ ekpẹn rẹ emu ro shephihọ ọhọre [rẹ Ọghẹnẹ] ko nyo kẹ avwanre.” (1 Jọn 5:14) Jesu ru udje rẹ obo ra sa nẹrhovwo kpahen. (Se Matiu 6:9-13.) Vwọba ẹrhovwo ra cha nẹ kpahen ọdavwẹ romobọ avwanre, o ji fo nẹ a kpẹvwẹ Ọghẹnẹ vwọ kẹ obo ro ru kẹ avwanre, a me je vuẹ nẹ ọ chọn ihwo efa uko.
2. Mavọ yen a nẹrhovwo wan?
Baibol na vuẹ avwanre nẹ e “ku udu [rẹ avwanre] ejobi phihọ otọ vwẹ obaro [rẹ Ọghẹnẹ].” (Une Rẹ Ejiro 62:8) Ọtiọyena, ofori nẹ ẹrhovwo avwanre nẹ otọ rẹ ubiudu rhe. A sa nẹrhovwo phia yẹrẹ phiyọ evun takpẹ e muomaphiyọ ọghọ. A sa nẹrhovwo kọke kọke vwẹ kasan kasan.
3. Mavọ yen Ọghẹnẹ kpahanphiyọ ẹrhovwo rẹ avwanre wan?
O ruo vwẹ idjerhe sansan. Jihova kẹ avwanre Baibol na, asan ra da sa mrẹ ẹkpahọnphiyọ rẹ enọ rẹ avwanre. E de se Ota rẹ Ọghẹnẹ, ọ sa “nẹrhẹ ogbori ghwanra.” (Une Rẹ Ejiro 19:7; se Jems 1:5.) Ọ sa kẹ avwanre ẹwẹn ri dọe siẹrẹ e de hirharoku ebẹnbẹn. Ọ je sa nẹrhẹ idibo rọyen chọn avwanre uko vwẹ ọke rẹ ebẹnbẹn.
HIẸ KODO
Fuẹrẹn obo wọ sa vwọ nẹrhovwo vwẹ idjerhe ro shephiyọ vwẹ ẹro rẹ Ọghẹnẹ vẹ oborẹ ẹrhovwo se vwo fierere kẹ wẹ.
4. O vwo oborẹ Ọghẹnẹ guọnọre nẹ a nẹrhovwo wan
Die yen sa nẹrhẹ Ọghẹnẹ rhiabọreyọ ẹrhovwo avwanre yẹrẹ siọn? Hworo IVIDIO na.
Jihova guọnọre nẹ a nẹrhovwo vwo rhe. Se Une Rẹ Ejiro 65:2, ovwan ta ota kpahen enọ nana:
-
Wo rorori nẹ ‘Ọ ro nyo ẹrhovwo na’ guọnọre nẹ wọ nẹrhovwo rhe? Kẹ, diesorọ?
Avwanre da guọnọ nẹ Ọghẹnẹ nyo ẹrhovwo rẹ avwanre, ko fori nẹ a yọnrọn irhi rọyen. Se Maika 3:4 vẹ 1 Pita 3:12, ovwan ta ota kpahen onọ nana:
-
Mavọ yen e se vwo vwo imuẹro nẹ Jihova kerhọ rẹ ẹrhovwo rẹ avwanre?
Vwẹ ọke rẹ ofovwin, ẹbẹre ivẹ re họnra na sa nẹrhovwo rẹ ophikparobọ. O muwẹro nẹ Ọghẹnẹ cha kpahenphiyọ ẹrhovwo nana?
5. Ofori nẹ ẹrhovwo avwanre nẹ ubiudu rhe
E yono ihwo evo nẹ ayen vwanriẹn ẹrhovwo evo kọke kọke. Ẹkẹvuọvo, oka rẹ ẹrhovwo tiọyen yen Ọghẹnẹ guọnọre? Se Matiu 6:7, ovwan ta ota kpahen onọ nana:
-
Mavọ wo se vwo nene uchebro na, a “ta ota ọvo asiava-a” vwẹ ẹrhovwo wẹn?
Kẹdẹ kẹdẹ, wo se roro kpahen ebruphiyọ ọvo vwẹ akpeyeren wẹn, wọ kpẹvwẹ Jihova vwọ kẹ ebruphiyọ yena. Wo de ru ọnana kẹdẹ kẹdẹ vwẹ udughwrẹn ọvo, kọyen wọ nẹrhovwo kpahen erọnvwọn ighwrẹn jẹ wọ vwanriẹn ọvuọvo-o.
Omamọ rẹ ọsẹ guọnọre nẹ ọmọ rọyen ta ota kẹ vwo nẹ ubiudu rhe. Ọtiọyen ọ je hepha, Jihova guọnọre nẹ a ta ota kẹ ọyen vwo nẹ ubiudu rẹ avwanre rhe
6. Ẹrhovwo ọyen okẹ ro nẹ obọ rẹ Ọghẹnẹ rhe
Mavọ yen ẹrhovwo sa vwọ bọn avwanre gan vwẹ ọke rẹ erọnvwọn de yovwin vẹ ọke rẹ ebẹnbẹn? Hworo IVIDIO na.
Baibol na veri nẹ ẹrhovwo sa chọn avwanre uko vwo vwo ẹwẹn re dọe. Se Filipae 4:6, 7, ovwan ta ota kpahen enọ nana:
-
Dede nẹ ẹrhovwo ghwe siẹ ebẹnbẹn rẹ avwanre no ọkieje-e, mavọ yen ọ sa vwọ chọn avwanre uko?
-
Erhọ yen erọnvwọn evo wọ guọnọ nẹrhovwo kpahen?
Wọ riẹnre jovwo?
Ubiota na “isẹ” mudiaphiyọ “e jẹ ọ dia ọtiọyen.” Vwo nẹ awanre rhe, ọyen e vwo ru “isẹ” vwẹ oba rẹ ẹrhovwo. —1 Ikun Rivie 16:36.
7. Rhuẹrẹ ọke wọ vwọ nẹrhovwo
Ọke evo, erọnvwọn sa vọn avwanre abọ te ẹdia rẹ ẹrhovwo me chọrọ avwanre ẹro. Mavọ yen ẹrhovwo ghanre te vwọ kẹ Jesu? Se Matiu 14:23 vẹ Mak 1:35, ovwan ta ota kpahen enọ nana:
-
Die yen Jesu ruru ọ sa vwọ mrẹ ọke vwọ nẹrhovwo?
-
Ọke vọ wọ sa vwọ nẹrhovwo?
IHWO EVO TA: “Ẹrhovwo ọyen ọke ẹghwọrọ.”
-
Die wọ cha ta?
ỌDJẸKOKO
Ẹrhovwo ro nẹ ubiudu rhe si avwanre kẹrẹ Ọghẹnẹ, ọ kẹ avwanre ẹwẹn ri dọe, vẹ ẹgba re se vwo ru obo re vwerhen Jihova ivun.
Ẹrhomafuẹrẹn
-
Ono yen ofori nẹ a nẹrhovwo rhe?
-
Mavọ yen a cha nẹrhovwo wan?
-
Erhọ yen erere evo rẹ ẹrhovwo ghwa cha?
HIẸ GUỌNỌ
Guọnọ ẹkpahọnphiyọ rẹ enọ re dje ẹnẹnọ kpahen ẹrhovwo.
“Erọnvwọn Ighwrẹn ro Fori nẹ Wọ Riẹn Kpahen Ẹrhovwo” (Uwevwin Orhẹrẹ rẹ October 1, 2010)
Yono kpahen oboresorọ ra vwọ nẹrhovwo vẹ obo ru wo se vwo ru ẹrhovwo wẹn yovwinphiyọ.
Fuẹrẹn oborẹ Baibol na yono kpahen ohwo ro fori nẹ a nẹrhovwo rhe.
“Ofori nẹ Mi Nẹrhovwo kẹ Ihwo Efuanfon?” (Uyovwinrota rọhẹ jw.org)
Vwẹ ividio rẹ uhworo nana, noso sẹ otoro asan yẹrẹ ọke ra vwọ nẹrhovwo.
Wọ je sa Fuẹrẹn
ENỌ REDJE ẸNẸNỌ
Die Yen Uyono ri Baibol rẹ Iseri ri Jihova Vwo Muẹ kẹ Ihwo?
Vwẹ uyono ri Baibol ọphẹ rẹ Iseri ri Jihova vwo muẹ kẹ ihwo na, wọ sa reyọ kefanfan kefanfan ri Baibol ro je we vwo ruiruo. Wo se durhie ihwo rẹ orua wẹn eje yẹrẹ kugbeyan kugbeyan ru wọ guọnọre odedede.
