YOOSOMA 09
Ovekela Onnilipiha Waataana Wahu ni Muluku
Niireke waahikhala okathi mwaphavela anyu okhaliheriwa? Niireke aakhala makoho mwaaphavela anyu osuwela waakhuliwa waya? Niireke munniphavela omaalihiwa wala okhaliheriwa? Niireke munnniphavela okhala mpatthani a Yehova? Ovekela onimookhaliheryani vanceene. Masi niireke yookhala enamuna yooloka ya ovekela? Niireke Muluku onniwiriyana mavekelo aatthu otheene? Etthu xeeni munireerela anyu opaka wira Muluku owiriyaneke mavekelo anyu? Nrowe niwehe.
1. Tani ninreerela ahu onvekela ni nivekeleke exeeni?
Yesu ooniixuttiha wira nihaana onvekela paahi Tiithi ahu ori wiirimu. Eyo ti etthu Yesu aapaka awe, maana anvekela paahi Yehova. Yesu aahimmye so: “Nto, nvekeleke so: ‘Tiithi ihu muri wiirimu, . . . ’” (Matheyo 6:9) Vaavo nninvekela ahu Yehova, waataana wahu ni yena, onnilipa vanceene.
Hiyo pooti ovekela khula etthu nimphavela ahu. Masi musuweleke wira Muluku onaakhula paahi mavekelo yaale anivarihana ni yootthuna awe. “Muluku onooniwiriyana wa khula etthu eninvekela ahu, enivarihana ni ele oniphavela awe”. (1 Yohani 5:14) Yesu oonivaha ntakiheryo nooloka na itthu ninreerela ahu ovekela. (Mmusome Matheyo 6:9-13.) Ekeekhai wira nihaana ovekela itthu sinnixankiha ni nimphavela ahu. Masi nihiliyaleke waavekelela atthu akina ni omuxukhurela Muluku mwaha wa itthu onnipakela awe.
2. Nivekeleke sai?
Mavekelo ahu ahaana okhuma vamurimani. Tivonto Biibiliya onnitumererya awe ‘omuhimeerya [Muluku] ovelavela wahu wothene’. (Esalimo 62:9) Hiyo pooti ovekela okathi nimphavela ahu ni opuro nimphavela ahu. Ovekela mowiiwanyeya wala vathi-vathi. Musuweleke wira khakhanle makhalelo a vameekhaaya ntoko weemela aahiiso okilaathi wira nivekele. Nto nyuwo pooti ovekela mukhoromme ene, mukilaathale ene wala mweemenle ene. Etthu yootepa otthuneya onvekela Yehova mmuttittimihaka vanceene.
3. Muluku onaakhula sai mavekelo ahu?
Muluku onnaakhula mavekelo ahu mwa inamuna soovirikana. Mwa ntakiheryo, orumeelaka Nuulumo nawe Biibiliya, ninniphwanya waakhuliwa wa makoho ahu. Nto omusoma Biibiliya onnaavaha “miruku atthu òwiyeviha” wala ahirina ankhili. (Esalimo 19:8; mmusome Yakobo 1:5.) Nave Yehova onninimaaliha okathi ninkumana ahu mixankiho. Ohiya-vo, owo pooti owiiriha atthu awe onikhaliherya okathi wa mixankiho.
MWIIXUTTE ITTHU SIKINA
Nwehe etthu mukhanle anyu oopaka wira Muluku owiriyaneke mavekelo anyu. Nave nwehe moota ovekela onrowa aya wookhaliheryani.
4. Nipakeke exeeni wira Muluku owiriyane mavekelo ahu?
Itthu xeeni sinimwiiriha Muluku owiriyana mavekelo ahu? Nwehe EVIIDIYU.
Yehova oniphavela wira ninvekeleke. Musome Esalimo 65:3, nuumala-vo mwaakhule makoho anittharelana:
-
Nyuwo munoona wira ole ‘onìwa’ mavekelo oniphavela wira nyuwo munvekeleke? Etthu xeeni eniwiirihani wuupuwela siiso?
Wira Muluku owiriyane mavekelo ahu nihaana wiiwelela malamulo ni malakiheryo awe. Mmusome Mikeya 3:4 ni 1 Pedru 3:12, nuumala-vo mwaakhule nikoho ninttharelana:
-
Ninrowa osuwela sai wira Yehova onoowiriyana mavekelo ahu?
Okathi wa ekhotto mipantta soomiili sa anakhotto annivekela wira yaaxintte awanani aya. Niireke Muluku onnaakhula mavekelo ntoko awo?
5. Nivekeleke ni murima wotheene
Atthu akina yiixuttihiwe wira okathi wotheene anivekela aya ahaana oromola moolumo mamosaru yiixuttihiwe aya. Masi niireke Muluku oniphavela wira ninvekeleke mwa enamuna eyo? Mmusome Matheyo 6:7, nuumala-vo mwaakhule nikoho ninttharelana:
-
Munrowa owerya sai ‘ohimakela oromola moolumo mamosa-ru’ okathi munivekela anyu?
Munoonela sai khula nihiku wuupuwela etthu emosa Yehova oovanhaaweni, nuumala-vo munamuxukhurela mwaha wa etthu eyo? Akhala wira munoopaka eyo, nyuwo munoowerya ovekela esumana ntero itthu 7 soovirikana muhitthikenle oromola moolumo mamosaru.
Paapa oophenta oniphavela wira mwanawe okhaleke ootaphuwa vaavo onivaanela awe ni yena. Mwa enamuna emosaru, Yehova oniphavela wira ninvekeleke ni murima ahu wotheene ni mootaphuwa
6. Ovekela yoovaha enikhuma wa Muluku
Ovekela, onrowa onivaha sai ikuru otepexa wene okathi wooxankiha? Nwehe EVIIDIYU.
Biibiliya onihimya wira ovekela onninikhaliherya ophwanya murettele wekeekhai wa mmuupuweloni. Mmusome aFilipi 4:6, 7, nuumala-vo mwaakhule makoho anittharelana:
-
Ekeekhai wira khahiyo wira okathi wotheene ovekela onnimaliha mixankiho sahu. Masi hata vari siiso, ovekela onnikhaliherya sai?
-
Itthu xeeni muniphavela anyu ovekela?
Nyuwo mwaanisuwela?
Nuulumo noowi “amen” nintaphulela “ekeekhai” aahiiso “ekhale siiso”. Okhuma khalai, nuulumo noowi “amen” ninnirumeeliwa wa nikisa wa mavekelo.—1 Wahala 16:36.
7. Muhihiye ovekela
Okathi mukina ninnaatteliwa miteko mpakha oliyala ovekela. Niireke Yesu aanivaha efaita ovekela? Mmusome Matheyo 14:23 ni Marko 1:35, nuumala-vo mwaakhule makoho anittharelana:
-
Etthu xeeni Yesu aapaka awe wira okhalane okathi woovekela?
-
Etthu xeeni mukhanle anyu oopaka wira mukhalane okathi wira nvekele?
ATTHU AKINA ANIHIMYA WIRA: “Ovekela mutthu oniyeeha okathi awe ene mahala, Muluku khoniwiriyana mavekelo”.
-
Nyuwo munoonela sai?
IPONTO SUULUPALE
Ovekela ni murima wotheene onninikhaliherya waataana ni Muluku, onninivaha murettele wa mmuupuweloni ni onninivaha ikuru wira nimusiveliheke Yehova.
Wuuluula
-
Tani ninreerela ahu onvekela?
-
Nihaana ovekela mwa enamuna xeeni?
-
Ovekela onnikhaliherya sai?
NWEHE ITTHU SIKINA
Nwehe waakhuliwa wa makoho atthu anipaka aya voohimya sa ovekela.
“Itthu 7 Munireerela Anyu Osuwela Voohimya sa Ovekela” (Owehaweha, 1 a Outubro, 2010)
Nwehe nthowa naya vari aya vooloka ovekela ni moota mukhanle anyu oovekela mwa enamuna yooloka.
Tani ninreerela ahu onvekela? Nwehe ele Biibiliya onihimya awe voohimya sa mwaha owo.
“Kiireke Vannireerela Waavekela Masanto?” (Mwaha ori va jw.org)
Eviidiyu ya isipo enittharelana, nwehe akhala wira opuro ni okathi woovekela wookhalana efaita yinceene.
