LEKSYON 09
Magin Duok ha Dios Pinaagi ha Pag-ampo
Inabat mo na ba nga nagkikinahanglan ka hin giya? May-ada ka ba importante nga mga pakiana nga karuyag mo mabaton? Nagkikinahanglan ka ba hin pagliaw o pasarig? Karuyag mo ba magin mas duok kan Jehova? May kalabotan hito, makakabulig ha imo an pag-ampo. Pero ano an tama nga paagi ha pag-ampo? Ginpapamatian ba han Dios an ngatanan nga pag-ampo? Ano an puydi mo buhaton basi masiguro nga papamatian niya an imo mga pag-ampo? Kitaon naton.
1. Kan kanay kita dapat mag-ampo, ngan ano an puydi naton ig-ampo?
Igintutdo ni Jesus nga dapat mag-ampo kita ngadto la ha aton langitnon nga Amay. Hi Jesus mismo nag-ampo kan Jehova. Hiya nagsiring: “Pag-ampo kamo ha sugad hini nga paagi: ‘Amay namon ha langit . . . ’” (Mateo 6:9) Kon nag-aampo kita kan Jehova, ginpaparig-on naton an aton pakigsangkay ha iya.
Puydi kita mag-ampo hin bisan ano. Pero syempre, para batunon han Dios an aton mga pag-ampo, kinahanglan uyon ito ha iya kaburut-on. “Anoman an aton aroon uyon ha [kanan Dios] kaburut-on, namamati hiya ha aton.” (1 Juan 5:14) Naghatag hi Jesus hin mga ehemplo han mga butang nga angayan ig-ampo. (Basaha an Mateo 6:9-13.) Labot la ha pag-ampo hin personal nga mga butang, kinahanglan diri kita mahingalimot pagpasalamat ha Dios tungod han iya ginbuhat para ha aton ngan paghangyo ha iya nga buligan an iba.
2. Paonan-o kita dapat mag-ampo?
Gin-aaghat kita han Biblia nga aton ‘isumat an ngatanan nga aada ha aton kasingkasing ha atubangan han Dios.’ (Salmo 62:8) Salit an aton mga pag-ampo dapat sinsero ngan kinasingkasing. Puydi kita mag-ampo ha daku nga tingog o hin hilom la ngan ha bisan ano nga posisyon nga nagpapakita hin respeto. Puydi kita mag-ampo ha bisan ano nga oras ngan ha bisan diin.
3. Paonan-o ginbabaton han Dios an aton mga pag-ampo?
Ginbabaton niya ito ha iba-iba nga paagi. Igintagana ni Jehova an iya Pulong, an Biblia, nga kasagaran na nga may mga baton ha aton mga pakiana. An pagbasa ha Pulong han Dios “[makakahimo] ha waray eksperyensya nga magin maaramon.” (Salmo 19:7; basaha an Santiago 1:5.) Makakahatag hiya ha aton hin kamurayawan ha hunahuna kon naatubang kita hin mga problema. Ngan mapapagios niya an iya mga magsiringba nga buligan kita ha panahon nga ginkikinahanglan gud naton ito.
DUGANG NGA USISAHA
Usisaha kon paonan-o ka makakag-ampo hin kinasingkasing ngan nakakapalipay ha Dios, ngan hibaroi kon ano an kapulsanan ha imo han pag-ampo.
4. Kon ano an karuyag han Dios nga buhaton naton para pamatian an aton pag-ampo
Ano nga mga butang an magigin basihan kon kakarawaton ba han Dios an aton mga pag-ampo o diri? I-play an VIDEO.
Karuyag ni Jehova nga mag-ampo kita ha iya. Basaha an Salmo 65:2, katapos, hisguti niyo ini nga mga pakiana:
-
Ha imo hunahuna, karuyag ba han “Parapamati han pag-ampo” nga mag-ampo ka ha iya? Kay ano?
Talinguhaon gud naton nga magkinabuhi uyon ha mga suruklan han Dios basi pamatian niya an aton mga pag-ampo. Basaha an Micas 3:4 ngan 1 Pedro 3:12, katapos, hisguti niyo ini nga pakiana:
-
Paonan-o naton masisiguro nga papamatian ni Jehova an aton mga pag-ampo?
Kon may girra, an magkontra nga grupo bangin pariho mag-ampo nga magdaog hira. Makatadunganon ba an paghunahuna nga babatunon han Dios an ira mga pag-ampo?
5. An aton mga pag-ampo dapat kinasingkasing
An iba gintutdoan nga uroutruhon an pipira nga pag-ampo gamit an amo gihapon nga mga pulong. Pero ito ba an karuyag han Dios nga paagi han aton pag-ampo ha iya? Basaha an Mateo 6:7, katapos, hisguti niyo ini nga pakiana:
-
Paonan-o mo malilikyan an ‘pag-uroutro han amo gihapon nga mga pulong’ ha imo mga pag-ampo?
Kada adlaw, paghunahuna hin espisipiko nga bendisyon ha imo, katapos, pasalamati hi Jehova tungod hito. Kon bubuhaton mo ini kada adlaw ha sulod hin usa ka semana, makakag-ampo ka hin pito nga iba-iba nga topiko nga diri nag-iinuroutro.
Karuyag han maopay nga tatay nga an iya anak makiistorya ha iya hin kinasingkasing. Karuyag liwat ni Jehova nga mag-ampo kita ha iya hin kinasingkasing
6. An pag-ampo regalo han Dios
Paonan-o an pag-ampo makakabulig ha aton ha maopay ngan diri maopay nga mga kahimtang? I-play an VIDEO.
An Biblia nagsasaad nga an pag-ampo makakabulig ha aton nga magkaada tinuod nga kamurayawan ha hunahuna. Basaha an Filipos 4:6, 7, katapos, hisguti niyo ini nga mga pakiana:
-
Bisan kon diri man pirme nawawara an aton mga problema kon nag-aampo kita, paonan-o ito nakakabulig?
-
Ano an pipira nga butang nga karuyag mo ig-ampo?
Maaram ka ba?
An pulong nga “amen” nangangahulogan hin “matuman unta” o “sigurado.” Tikang pa ha panahon han Biblia, an “amen” ginyayakan na ha kataposan han mga pag-ampo.—1 Cronicas 16:36.
7. Paggahin hin panahon ha pag-ampo
Usahay bangin damu hinduro an aton buruhaton salit nangangalimot kita ha pag-ampo. Ano kaimportante kan Jesus an pag-ampo? Basaha an Mateo 14:23 ngan Marcos 1:35, katapos, hisguti niyo ini nga mga pakiana:
-
Ano an ginbuhat ni Jesus basi magkaada panahon ha pag-ampo?
-
Ano an imo bubuhaton basi magkaada ka panahon ha pag-ampo?
AN IBA NASIRING: “An pag-ampo pagkarag la hin panahon kay diri ito ginpapamatian han Dios.”
-
Ano an imo masisiring hito?
SUMARYO
An sinsero nga mga pag-ampo nabulig ha aton nga magin mas duok ha Dios, nahatag ha aton hin kamurayawan ha hunahuna, ngan nabulig ha aton nga magkaada han kusog nga ginkikinahanglan basi mapalipay hi Jehova.
Repaso
-
Kan kanay kita dapat mag-ampo?
-
Paonan-o kita dapat mag-ampo?
-
Ano an pipira nga kapulsanan han pag-ampo?
DUGANG NGA IMPORMASYON
Hibaroi an baton ha komon nga mga pakiana mahitungod ha pag-ampo.
“Pito nga Butang nga Kinahanglan Mo Hibaroan Mahitungod ha Pag-ampo” (An Barantayan, Oktubre 1, 2010)
Hibaroi kon kay ano nga dapat ka mag-ampo ngan kon paonan-o mo mapapauswag an kalidad han imo mga pag-ampo.
Usisaha an igintututdo han Biblia kon kan kanay kita dapat mag-ampo.
Hini nga music video, hibaroi kon importante ba kon diin o san-o kita nag-aampo.
Bangin Maruyagan Mo Liwat
KOMON NGA MGA PAKIANA
Ano an Pag-aram ha Biblia nga Igintatanyag han mga Saksi ni Jehova?
Ha libre nga interactive nga programa nga igintatanyag han mga Saksi ni Jehova, puydi mo gamiton an bisan ano nga bersyon han Biblia. Ayaw pag-alang nga paupdon an imo bug-os nga pamilya o an imo kasangkayan.
