KAPITE 09
Te Faikole
ʼE ke tau logoʼi koa ʼe ʼaoga ke tokoni atu he tahi ki tou maʼuli? ʼE ke fia iloʼi koa te tali ki ʼihi fehuʼi ʼe ke fai? ʼE ʼaoga atu koa ni fakalotofimalie? ʼE ke fia fakaovi lahi age koa kia Sehova? ʼE tokoni atu te faikole ki te ʼu meʼa ʼae ʼe ʼaoga kia koe. Kae ko te faʼahiga faikole fea ʼe leleiʼia e te ʼAtua? ʼE fagono koa te ʼAtua ki te ʼu faikole fuli? Pea kotea ʼe feala ke ke fai ke fagono ai te ʼAtua ki ʼau faikole? ʼE ke vakaʼi anai te faʼahi ʼaia ʼi te kapite ʼaeni.
1. Ko ai ʼe tonu ke ke faikole ki ai? Pea kotea ʼae ʼe ke kole?
Neʼe akoʼi mai e Sesu ʼe tonu ke tou faikole ʼateaina pe ki tatatou Tamai ʼae ʼe ʼi selo ko Sehova. Pea ko te faʼahi ʼaia neʼe ina fai he neʼe ina ui fenei: “Koia ʼe tonu ke kotou faikole fenei: ‘Ko tamatou Tamai ʼae ʼe ʼi selo . . .’” (Mateo 6:9) ʼE mahino ia, ʼe malohi anai ʼau felogoi mo Sehova moka ke faikole kia te ia.
ʼE feala ke ke kole ia meʼa fuli kia Sehova. Kae kapau ʼe ke loto ke tali e te ʼAtua ʼau faikole, ʼe tonu foki ke alu tahi mo tona finegalo. “Ko he meʼa pe ʼe tou kole ki te ʼAtua ʼo mulimuli ki tona finegalo, ʼe fagono mai kia tatou.” (1 Soane 5:14) Neʼe fakaha mai e Sesu he ʼu aluʼaga ʼe feala ke kita kole ki te ʼAtua. (Lau ia Mateo 6:9-13.) ʼE feala tau kole te ʼu meʼa ʼae ʼe ʼaoga kia koe, mo fakafetaʼi kia te ia ki te ʼu meʼa ʼae ʼe ina fai maʼa koe. Pea ʼe feala hau toe kole ke tokoni ki ʼihi.
2. ʼE tonu ke feafeaʼi ʼau faikole?
ʼE fakalotomalohiʼi tatou ʼi te Tohi-Tapu ke tou ‘fakaha ki te ʼAtua te ʼu meʼa ʼae ʼi ʼotatou loto.’ (Pesalemo 62:8) Koia, ʼe tonu ke fakamalotoloto ʼau faikole pea ke haʼu mai tou loto. ʼE feala tau faikole leʼo lahi peʼe fakalogologo, tatau aipe pe ke tuʼutuli, mo heka peʼe tuʼu. Kae ko te faʼahi ʼae ʼe maʼuhiga ke fai ʼaki te fakaʼapaʼapa. ʼEi, ʼe feala tau faikole ʼi he temi pe, ʼi he koga meʼa pe ʼe ke nofo ai.
3. ʼE tali feafeaʼi e te ʼAtua ʼau faikole?
ʼE tali mai ʼi he ʼu aluʼaga kehekehe. Neʼe foaki mai e Sehova tana Folafola, ʼae ʼe ke maʼu ai te ʼu tali ki ʼau fehuʼi. Ka ke lau, pea ʼe feala ke ina “fakaliliu ʼo poto ia ia ʼae ʼe vale.” (Pesalemo 19:7; lau ia Sakopo 1:5.) ʼE feala ke ina foaki mai te tokalelei ʼo te loto moka ke tau mo ni fihifihia. Pea ʼe feala ke ina uga ʼana kaugana ke natou tokoni atu.
TA FAKALOLOTO
Ta vakaʼi pe ko te ʼu faikole fea ʼae ʼe leleiʼia e te ʼAtua pea he koʼe ʼe ta logoʼi he fimalie moka ta faikole.
4. ʼE mole fakalogo te ʼAtua ki ʼihi faikole
Ko te ʼu faikole fea ʼae hoki fakalogo ki ai te ʼAtua? Vakaʼi te ʼATA VITEO.
ʼE loto e Sehova ke ke faikole age kia te ia. Lau ia Pesalemo 65:2, pea fai te ʼu fehuʼi ʼaeni:
-
ʼI tau manatu la, ʼe fia ‘fakalogo koa e te ʼAtua ʼau faikole?’ Kotea tona tupuʼaga?
Kapau ʼe ke loto ke fakalogo e te ʼAtua ʼau faikole, ʼe tonu ke ke faiga ʼo maʼuliʼi ʼana lao. Lau ia Mikea 3:4 mo 1 Petelo 3:12, pea fai te fehuʼi ʼaeni:
-
Kotea ʼe tonu ke ke fai ke fakalogo ai te ʼAtua ki ʼau faikole?
Lolotoga he tau, ʼe tahi faikole pe te foʼi solia ke malo. Kae ʼe tali anai koa e te ʼAtua te ʼu faikole ʼa te ʼu foʼi solia ʼaia ʼe lua?
5. Ka ke faikole, pea ʼe tonu ke haʼu mai tou loto
ʼE manatu ʼihi ʼe tonu ke natou lau liuliuga ni kole. Kae ko te faʼahiga fai koa ʼaia ʼe loto ki ai ia Sehova? Lau ia Mateo 6:7, pea fai te fehuʼi ʼaeni:
-
Kotea ʼae ʼe mole tonu ke ke fai moka ke faikole?
ʼI te ʼaho fuli, manatuʼi he ʼu aluʼaga fakafiafia neʼe hoko kia koe pea ke fakamalo kia Sehova. Kapau ʼe ke fai feia lolotoga he vahaʼa katoa, ʼe ke faikole ʼo ʼuhiga mo aluʼaga kehekehe ʼe fitu ʼo mole ke lau liuliuga ni palalau.
ʼE loto e he tamai ke fakaha age e tana fanau te ʼu meʼa ʼae ʼi tona loto moka nā faipalalau. Pea ʼe toe feia pe mo Sehova
6. Ko te faikole ʼe ko he meʼa ʼofa mai te ʼAtua
ʼE tokoni feafeaʼi mai te faikole ke tou lotomalohi ʼi te temi fuli pe? Vakaʼi te ʼATA VITEO.
ʼE ui ʼi te Tohi-Tapu, ʼe feala ke tou maʼu te tokalelei ʼo te loto ʼaki te faikole. Lau ia Filipe 4:6, 7, pea fai te ʼu fehuʼi ʼaeni:
-
ʼE mahino ia, ʼe mole haga leva te faikole ʼo toʼo fuli ʼou fihifihia, kae kotea ʼe feala ke ke maʼu ai?
-
Kotea ʼihi aluʼaga ʼe ke fia kole?
Kua ke iloʼi koa?
Ko te kupu “ameni” ko tona fakaʼuhiga ʼe tou “io” peʼe “fai ki ai.” ʼE fakaha ʼi te Tohi-Tapu neʼe kua fualoa te fakaʼaogaʼi e te ʼu kaugana ʼa te ʼAtua te kupu “ameni” ʼi te fakaʼosi ʼo he faikole.—1 Koloniko 16:36.
7. ʼE maʼuhiga te faikole
ʼI ʼihi temi, ʼe galo leva te faikole he ʼe tou maʼumaʼua fau. Kae neʼe maʼuhiga feafeaʼi kia Sesu te faikole? Lau ia Mateo 14:23 mo Maleko 1:35, pea fai te ʼu fehuʼi ʼaeni:
-
Kotea la ʼae neʼe fai e Sesu ke maʼu ai hona temi faikole?
-
Ko te temi fea ʼae ʼe feala ai hau faikole?
ʼE UI E ʼIHI: “ʼE mole he ʼaoga ia ʼo te faikole?”
-
ʼE ke tali feafeaʼi age anai?
MANATU TAFITO
Ka tou faikole fakamalotoloto, ʼe malohi ai ʼatatou felogoi mo te ʼAtua, mo maʼu ai te tokalelei ʼo te loto pea mo te malohi.
Fehuʼi Fakamanatu
-
Ko ai ʼe tonu ke ke faikole ki ai?
-
ʼE tonu ke feafeaʼi ʼau faikole?
-
ʼE fua lelei feafeaʼi kia koe te faikole?
TE TAHI ʼU MANATU
Vakaʼi te tali ki ni fehuʼi ʼe fai e te tokolahi ʼo ʼuhiga mo te faikole.
Vakaʼi pe koʼe ʼe maʼuhiga te faikole pea ʼe feafeaʼi hau hikihiki ke lelei age.
ʼE akoʼi mai ʼi te Tohi-Tapu pe ko ai ʼe tonu ke tou faikole ki ai.
“ʼE Tonu Koa Ke Au Faikole Ki Te Kau Sagato?” (Alatike ʼi te jw.org)
ʼE fakaha ʼi te ʼata viteo ʼaeni ʼe feala ke tou faikole ʼi he temi pe, ʼi he koga meʼa pe ʼe tou nonofo ai.