Rowaptẽrẽ te dza aipawapto marĩ ahö na. Te dza aipawapto tsõpẽtẽ da roti duré ĩtsadaꞌöbödzé dadzadanharĩ ĩpire norĩ da dahöimanadzém na hã. Rowaptẽrẽ te dza duré aipẽꞌẽ hi aima robdzei õ wamhã. Taha nhipai u, te dza aipawapto Jeová tẽme atsina rotété da. Tane nherẽ, ãté te ꞌröwi ĩrotsaꞌra: “E niha ĩbö rowaptẽrẽdzé. E Ropotoꞌwa te natsi wapa uburé rowaptẽrẽ.” Oto wa te ꞌmadöꞌö dzaꞌra na e marĩ te dza ĩꞌmanha Ropotoꞌwa te te wapari da atsimirowaptẽrẽ norĩ.

1. E ꞌwai wi wa te ĩrowaptẽrẽ dzaꞌra da tsi duré e marĩ na.

Jesus ma tô rowahutu wa te rowaptẽrẽ dzaꞌra da Wamama höiwa ãma ꞌre ĩtsãmra mono wi tsi. Jesus tsiꞌuihö na ãne ma tô ꞌmanha. Te tinha: ‘Ãne te dza ꞌre aimreme dzutsi aba mo, ꞌRe ĩhöimana uꞌötsi mono ma: “Wamama, höiwa ãma ꞌre ĩꞌatsãmra mono hã . . .”’ (Mateus 6:9) Jeová wi wa te rowaptẽrẽ dzaꞌra wamhã, watsiwaihuꞌudzé õhõ ãma te dza tinhiptete.

Uburé marĩ na wa dza rowaptẽrẽ dzaꞌra ni. Tane nherẽ, Ropotoꞌwa te dza tsadaꞌö wanhimirowaptẽrẽ te te tsima ĩwẽdzéb dzarina wa te tiwi rowaptẽrẽ dzaꞌra waptsi. ‘ꞌRe ĩhöimana uꞌötsi mono u wa te watsina ꞌre rotété dzaꞌra mono wamhã, wa te ꞌre ĩꞌumnhatsi dzaꞌra mono dzé, ãne: ꞌRe ĩhöimana uꞌötsi mono te te tsima ꞌre ĩwẽ mono dzéb dzarina, tsiwaꞌru marĩ hã wa te tiwi ꞌre waptẽrẽ dzaꞌra mono wamhã, te dza te te wama ãma ꞌre ꞌaꞌuwaimrami.’ (1 João 5:14) Jesus ma tô ãma atsanho e marĩ na ĩrowaptẽrẽdzé. (Tsõré na Mateus 6:9-13.) Tô tsena wa dza rowaptẽrẽ dzaꞌra ni wahötöꞌödzém na hã. Tadzahã, wa dza duré rowaptẽrẽ dzaꞌra ni wa te tãma hepãrĩ dzaꞌra da te te wama ĩꞌmanharĩ dzaꞌra dzém na hã duré ĩhöiba amo norĩ te te pawaptob da.

2. E niha wa dza rowaptẽrẽ dzaꞌra ni.

Ropotoꞌwai mreme te tinha ‘wapẽꞌẽ na ꞌröwi ĩtẽme ꞌre watsihutu mono da, ꞌRe ĩhöimana uꞌötsi mono u hã.’ (Hebreus 10:22) Taha wa, ꞌröwi wapẽꞌẽ na wa te tiwi ĩrowaptẽrẽ dzaꞌra da tsi. Wa dza rowaptẽrẽ dzaꞌra ni wamreme ꞌrãihö na niwamhã ariꞌiwi na, tsiwaꞌru bötö na duré tsiwaꞌru darob ãma. Marĩ õ di wa te rowaptẽrẽ dzaꞌra wamhã wahiꞌrãtitõ watsime tsina, watsimatsam na niwamhã watsiꞌubumro na. Tane nherẽ, ĩpire uptabi Jeová wa te wadzéb dzaꞌra da.

3. E niha Ropotoꞌwa te dza tsadaꞌö wanhimirowaptẽrẽ hã.

Õ hã te te ĩwadzadaꞌöbö dzaꞌra dzéb da hã ahö di duré tsipuꞌu di. Ropotoꞌwai mreme wa te ꞌre tsõré dzaꞌra mono wamhã wa dza wa te tsõpẽtẽ dzaꞌra ĩtsadaꞌöbödzé hã wanhimidzadanharĩdzéb da hã. Ropotoꞌwai mreme ‘te rowaihuꞌu prãiꞌwa norĩ ma, rowaihu ĩwẽ hã te te tãma ꞌre anhomri.’ (Salmo 19:7; tsõré na Tiago 1:5.) Jeová te te tsõmri waihuꞌu petse di rowẽ wapẽꞌẽ ma ropire wa te ꞌwapé dzaꞌra wamhã. Duré te te rétsi waihuꞌu petse di tãma romhuriꞌwa norĩ hã te te wapawaptob dzaꞌra da marĩ wamhã.

 ĨWAIHUꞌUDZÉ HÃ

ꞌRöwi wapẽꞌẽ na wa te rowaptẽrẽ dzaꞌra wamhã, wa dza watsina rotété dzaꞌra ni Ropotoꞌwa tẽme. Rowẽ duré wanhiptetedzé te dza wama ꞌre höimana dzaꞌra Jeová ma ĩbö dzarina ꞌre wahöimana dzaꞌra mono da.

Ãma aipoꞌre puꞌu

• E ꞌwai wi tsi wa dza rowaptẽrẽ dzaꞌra ni.

• E niha wa dza rowaptẽrẽ dzaꞌra ni.

• E niha rowaptẽrẽ hã te dza wapawaptob dzaꞌra.