LIJIGANYO 09
Lipopelo Mpaka Litukamuchisye Kuŵa Paunasi ni Yehofa
Ana pakwete paganisisye kuti akusosekwa mundu jwakwalongolela paumi wawo? Ana akwete yiwusyo yakusasaka ali apatile kwanga kwakwe? Ana akusasaka mundu jwine ali ŵalimbikasisye? Ana akusasaka ali amŵandichile Yehofa? Lipopelo mpaka lyakamuchisye pa yosope yakusasakagayi. Nambo ana mpaka tupopeleje chamtuli? Ana Mlungu akusajanga mapopelo gosope? Ana mpaka atende chichi kuti Mlungu ajanjeje mapopelo gawo? Kwende tulole.
1. Ana tukusosekwa kupopelaga kwa ŵani soni tusaleje yamtuli?
Yesu ŵatujiganyisye kuti tupopeleje kwa Atati ŵetu ŵakwinanipe basi. Yesu jwapopelaga kwa Yehofa. Jwalakwe ŵatite, “Pandaŵi jimkupopela mjileje myi, ‘Atati ŵetu ŵakwinani, . . . ’” (Mateyu 6:9) Patukupopela kwa Yehofa, unasi wetu ni jwalakwe ukusalimba.
Patukupopela tusaleje yindu yiliyose yatukusaka. Kuti Mlungu ajanjeje mapopelo getu, yatukuŵendayo yikamulaneje ni chakulinga cha Mlungu. Baibulo jikusati, ‘Jwalakwe akusatupikana pandaŵi jitukuŵenda kandu kalikose mwakulingana ni yakusasaka [Mlungu].’ (1 Yohane 5:14) Yesu jwasasile yine mwa yindu yampaka tusale patukupopela. (Aŵalanje Mateyu 6:9-13.) Patukumsalila Mlungu yayikutulagasya nganisyo, tukaliŵalilaga kumyamichila payindu yatutendele soni tumŵendeje kuti ŵakamuchisye ŵane.
2. Ana tupopeleje chamtuli?
Baibulo jikusatulimbikasya kuti, “mumsalileje [Mlungu] yakusawusya yenu yosope.” (Salimo 62:8) Mapopelo getu gaŵeje gakutyochela mumtima. Mpaka tupopeleje mwakoposya maloŵe kapena chamumtima nambo mwaulemu. Mpaka tupopele ndaŵi jilijose soni malo galigose.
3. Ana Mlungu akusajanga chamtuli mapopelo getu?
Jwalakwe akusajanga mapopelo getu m’matala gakulekanganalekangana. Yehofa atupele Baibulo jajikusatukamuchisya kupata kwanga kwa yiwusyo yetu. Maloŵe ga Mlungu mpaka “[gape] ŵandu wambape lunda.” (Salimo 19:7; aŵalanje Yakobo 1:5.) Patusimene ni yakusawusya, Mlungu mpaka atupe mtendele wa mumtima. Soni jwalakwe mpaka akamulichisye masengo ŵakutumichila ŵakwe kuti atukamuchisye.
KULIJIGANYA YEJINJI
Chitulole mwampaka tupopelele kwa Mlungu kutyochela mumtima soni mwakumsangalasya. Chitulolesoni mwampaka lipopelo lyakamuchisye wawojo.
4. Yakusasaka Mlungu pangani ja lipopelo
Ana ni chichi champaka chimtendekasye Mlungu kwanga mapopelo getu kapena ngajanga? Alolele FIDIYO.
Yehofa akusasaka kuti tupopeleje kwa jwalakwe. Aŵalanje Salimo 65:2, kaneko akambilane yiwusyo ayi:
-
Ana Mlungu ‘jwakusapikana lipopelo’ akusasakaga kuti wawojo apopeleje kwa jwalakwejo? Ligongo chichi akwanga myoyo?
Naga tukusaka kuti Mlungu atujanjeje mapopelo getu, tukusosekwa tukuyeje malamusi gakwe. Aŵalanje Mika 3:4 soni 1 Petulo 3:12, kaneko akambilane chiwusyo achi:
-
Ana chichi champaka chimtendekasye Yehofa kuti ajanje mapopelo getu?
Asilikali ŵa mbali syosope akupopela kuti awine ngondo. Ana Mlungu mpaka ajanje mapopelo gelega?
5. Mapopelo getu gatyocheleje mumtima
Ŵandu ŵane akusapeleka mapopelo gaŵagajinjisye pamtima. Ana Mlungu akusasakaga kuti tupopeleje myoyo? Aŵalanje Mateyu 6:7, kaneko akambilane chiwusyo achi:
-
Ana mpaka tuŵambale chamtuli “kuwilisyawilisya mapopelo getu”?
Lisiku lililyose mpaka aganichisyeje chindu chimo chaŵatendele Yehofa ni kumyamichila. Naga akutenda yeleyi lisiku lililyose, pakumalaga wiki chachiŵa ali asasile yindu 7 mwipopelo mwangawilisyawilisya chindu chichocho.
Mtati jwambone akusasaka kuti mwanache jwawo aŵecheteje yakulukosi kwakwe. Yehofa akusasakasoni kuti patukupopela tusaleje yakulukosi kwetu
6. Lipopelo chili chindu chakusosekwa mnope chaŵatupele Mlungu
Ana lipopelo mpaka litukamuchisye chamtuli patusimene ni yakusawusya? Alolele FIDIYO.
Baibulo jikusatusalila kuti lipopelo mpaka litukamuchisye kola mtendele wa mumtima. Aŵalanje Afilipi 4:6, 7, kaneko akambilane yiwusyo ayi:
-
Ana lipopelo mpaka litukamuchisye chamtuli atamose kuti ngalikusamasya yakusawusya yetu yosope?
-
Ana wawojo mpaka asache kusala yindu yapi mwipopelo?
Ana akumanyilila?
Liloŵe lyakuti ame likusagopolela kuti “elo, yiŵe myoyo.” Kutandila kalakala, ŵandu aŵele ali mkusala maloŵe gakuti ame pambesi pa lipopelo.—1 Mbili 16:36.
7. Apateje ndaŵi jakupopela
Ndaŵi sine yindu yikusatutupila mwamti mpaka tukusaliŵalila kupopela. Ana Yesu ŵakuwonaga mwamtuli kupopela? Aŵalanje Mateyu 14:23 soni Maliko 1:35, kaneko akambilane yiwusyo ayi:
-
Ana Yesu jwatendaga yamtuli kuti apateje ndaŵi jakupopela?
-
Ana wawojo mpaka apateje ndaŵi japi jakuti apopeleje?
YAKUSAŴECHETA ŴANDU ŴANE: “Kupopela kuli kwasa ndaŵi ligongo pangali jwakusakupikanila.”
-
Ana wawojo akuganisya uli?
YALIJIGANYISYE
Mapopelo gakutyochela mumtima gakusatukamuchisya kumŵandichila Mlungu, kukola mtendele wa mumtima soni kutupa machili kuti tutendeje yakumsangalasya Yehofa.
Yiwusyo Yakuwilisya
-
Ana tupopeleje kwa ŵani?
-
Ana tupopeleje chamtuli?
-
Ana lipopelo mpaka lyakamuchisye chamtuli?
YAKULINGA YINESONI
Apate kwanga kwa yiwusyo yakusawusya ŵajinji yakwamba lipopelo.
“Yindu 7 Yatukusosekwa Kumanyilila Yakwamba Lipopelo” (Sanja ja Mlonda ja, Okotoba 1, 2010)
Amanyilile ligongo lyakwe akusosekwa kupopelaga soni yampaka atende kuti mapopelo gawo gaŵeje gambone.
“Ligongo Chichi Ngusosekwa Kupopela?” (Ngani ja pa intaneti)
Ana Baibulo jikusajiganya kuti tupopeleje kwa ŵani?
“Ana Mbopeleje kwa Ŵandu Ŵaswela Mtima?” (Ngani ja pa intaneti)
Munyimbo jakuyichisyaji chalole kuti pangali malo soni ndaŵi jisyesyene jakupopela.
You May Also Like
YIWUSYO YAKUSANONYELA ŴANDU KUWUSYA
Ana Ljiganyo lya Baibulo Lyakusatendesya Ŵamboni sya Yehofa Likusatendekwa Mwamtuli?
Muyakambilana ni Ŵamboniyi akwete ufulu ŵakamulichisya masengo Baibulo jawo. Yili yakomboleka kwaŵilanga achimjawo soni ŵamwiŵasa mwawo kuti atende nawo lijiganyoli.
