XOOK 09
Le oraciónoʼ ku natsʼkech yiknal Dios
¿Ka wuʼuyik wa yaan kʼiin kʼaʼabéettech áantaj? ¿Yaan wa baʼaloʼob taak a wojéeltik u núukil? ¿Kʼaʼabéet wa u líiʼsaʼal a wóol? ¿A kʼáat wa a maas natsʼaba yiknal Jéeoba? Wa beyoʼ jach jeʼel u yáantkech le oraciónoʼ. Chéen baʼaleʼ, ¿bix unaj a orar? ¿Ku yuʼubik wa Dios tuláakal le oraciónoʼoboʼ? ¿Baʼax kʼaʼabéet a beetik utiaʼal u yuʼubik le oraciónoʼob ka beetkoʼ? Koʼox ilik.
1. ¿Tiʼ máax unaj k-orar yéetel baʼax jeʼel u páajtal k-aʼalikeʼ?
Jesúseʼ tu yaʼaleʼ chéen tiʼ u Taata unaj k-orar tumen letiʼeʼ bey xan tu beetiloʼ. Juntéeneʼ tu yaʼalaj: «Bey unaj a orareʼexaʼ: ‹K-Taata yanech teʼ kaʼanoʼ...›» (Mateo 6:9). Kéen orarnakoʼon tiʼ Jéeobaeʼ k-maas bisikba tu yéetel.
Le kéen k-beet k-oracióneʼ jeʼel u páajtal k-aʼalik jeʼel baʼalakeʼ. Chéen baʼaleʼ wa k-kʼáat ka uʼuyaʼak k-oración tumen Dioseʼ unaj k-beetik le baʼax ku yaʼalik le Bibliaaʼ: «Jeʼel baʼalak ka k-kʼáat tiʼ Dioseʼ, wa maʼ tu bin tu contra u voluntadeʼ, letiʼeʼ yaan u yuʼubik» (1 Juan 5:14). Jesúseʼ tu yaʼalaj baʼax jeʼel u páajtal k-aʼalik tiʼ Jéeoba kéen orarnakoʼoneʼ (xok Mateo 6:9-13). Pero maʼ chéen unaj k-kʼáatik baʼaloʼob t-oʼolaliʼ, kʼaʼabéet xan k-tsʼáaik gracias tiʼ Jéeoba yoʼolal baʼaxoʼob tsʼoʼok u beetik t-oʼolal yéetel unaj xan k-kʼáat óolal yoʼolal u maasil.
2. ¿Bix unaj k-orar?
Le Bibliaoʼ ku yaʼalik: «Jeʼekʼabt a puksiʼikʼaleʼex tiʼ [Dios]» (Salmo 62:8). Le oraciónoʼob k-beetkoʼ kʼaʼabéet u jóokʼol t-puksiʼikʼal. Jeʼel u páajtal k-orar kʼaʼam, chéen ichil k-tuukul, waʼalakbaloʼon wa jeʼel bixakeʼ pero ka k-beet yéetel respeto. Jeʼel u páajtal xan k-orar jeʼel tuʼuxak yanoʼoneʼ yéetel jeʼel baʼalak horaeʼ.
3. ¿Bix u núukaʼal k-oraciónoʼob?
Dioseʼ jejeláas bix u núukik k-oraciónoʼob. Por ejemploeʼ yéetel le Bibliaoʼ ku núukik le baʼaxoʼob taak k-ojéeltikoʼ. U xookil le Bibliaoʼ «ku beetik u yantal u naʼat le máax maʼ jach yaan u naʼatoʼ» (Salmo 19:7; xok Santiago 1:5). Jéeobaeʼ jeʼel u yáantkoʼon utiaʼal maʼ k-sen chiʼichnaktal le kéen yanaktoʼon problemaseʼ. Tsʼoʼoleʼ jeʼel xan u beetik k-áantaʼal tumen le máaxoʼob meyajtikoʼ.
UTIAʼAL A MAAS NAʼATIK
Ilawil bix jeʼel k-orar utiaʼal ka kʼaʼamak tumen Dioseʼ yéetel bix jeʼel u yáantkoʼon le oraciónoʼ.
4. Bix kʼaʼabéet k-orar
¿Baʼax kʼaʼabéet k-beetik utiaʼal ka uʼuyaʼak k-oraciónoʼob tumen Dios? Chaʼanteʼex le VIDEOOʼ.
Jéeobaeʼ u kʼáat ka orarnakoʼon chéen tiʼ letiʼ. Xokeʼex Salmo 65:2, kéen tsʼoʼokkeʼ ka tsikbaltikeʼex lelaʼ:
-
A tuklikeʼ, ¿le Dios «uʼuyik le oraciónoʼoboʼ» u kʼáat wa ka orarnakech tiʼ letiʼ? ¿Baʼaxten ka tuukul beyoʼ?
Wa k-kʼáat ka uʼuyaʼak k-oraciónoʼobeʼ, kʼaʼabéet k-beetik le baʼax u kʼáat Diosoʼ. Xokeʼex Miqueas 3:4 yéetel 1 Pedro 3:12, kéen tsʼoʼokkeʼ ka tsikbaltikeʼex lelaʼ:
-
¿Baʼax kʼaʼabéet a beetik utiaʼal ka uʼuyaʼak a oraciónoʼob tumen Dios?
Le soldadoʼoboʼ ku kʼáatkoʼob tiʼ Dios ka ganarnakoʼob, u enemigoʼob xaneʼ láayliʼ le ku kʼáatkoʼobeʼ. ¿Jeʼel wa u yuʼubaʼal u oraciónoʼob tumen Dioseʼ?
5. Unaj u jóokʼol t-puksiʼikʼal
Yaʼab máakeʼ ku kaʼansaʼal rezar yéetel ka u yaʼal de memoriail le oraciónoʼoboʼ. Pero ¿bey wa le oraciónoʼob uts tu tʼaan Diosoʼ? Xokeʼex Mateo 6:7, kéen tsʼoʼokkeʼ ka tsikbaltikeʼex lelaʼ:
-
¿Baʼax jeʼel u yáantkoʼon utiaʼal ‹maʼ k-babal aʼalik junpʼéeliliʼ baʼal› kéen orarnakoʼoneʼ?
Tiʼ junpʼéel semanaeʼ sáamsamaleʼ tsʼáa gracias tiʼ Jéeoba yoʼolal le baʼaloʼob jatsʼutstak ku tsʼáaiktechoʼ. Beyoʼ tiʼ junpʼéel semanaeʼ yaan a tsʼáaik u graciasil yoʼolal siete jejeláas baʼaloʼob.
6. Junpʼéel regalo ku taal tiʼ Dios
¿Bix u yáantkoʼon le oración teʼ súutukiloʼob jach táan k-sufriroʼ? Chaʼanteʼex le VIDEOOʼ.
Le Bibliaoʼ ku yaʼalikeʼ le oraciónoʼ ku yáantkoʼon utiaʼal ka yanaktoʼon jeetsʼelil. Xokeʼex Filipenses 4:6, 7, kéen tsʼoʼokkeʼ ka tsikbaltikeʼex lelaʼ:
-
Le oraciónoʼ maʼ tu yutskíintik tuláakal k-problemaʼob. Chéen baʼaleʼ, ¿bix u yáantkoʼon?
-
¿Baʼaxoʼob jeʼel a kʼáatik ich oracióneʼ?
¿A wojel wa?
Le tʼaan aménoʼ u kʼáat u yaʼal «ka béeyak» wa «jach beyoʼ». Le tʼaanaʼ desde úuchjeakil ku yaʼalaʼal le kéen orarnak máak (1 Crónicas 16:36).
7. Jóoʼs u súutukil utiaʼal a orar
Yaan kʼiineʼ jach yaʼab baʼax k-beetik hasta ku tuʼubul k-orar. Chéen baʼaleʼ, ¿Jesúseʼ kʼaʼanaʼan wa u yilik kaʼach u orar? Xokeʼex Mateo 14:23 yéetel Marcos 1:35, kéen tsʼoʼokkeʼ ka tsikbaltikeʼex lelaʼ:
-
¿Baʼax ku beetik kaʼach Jesús utiaʼal u jóoʼsik u tiempoil u orar?
-
Kux túun teech, ¿baʼax jeʼel a beetik utiaʼal a jóoʼsik u tiempoil a orareʼ?
BAʼAX SUUK U YAʼALAʼAL: «Le oraciónoʼ chéen ku meyaj utiaʼal ka u yuʼububa máak maʼalobil».
-
Techeʼ, ¿bix a wilik?
BAʼAX TSOʼOLI
Le oraciónoʼoboʼ ku natsʼkoʼon yiknal Dios. Ku yáantkoʼon utiaʼal maʼ k-sen chiʼichnaktal yéetel utiaʼal k-beetik baʼax u kʼáat Jéeoba.
Baʼax ta kanaj
-
¿Tiʼ máax unaj k-orar?
-
¿Bix unaj k-orar?
-
¿Bix u yáantkoʼon le oraciónoʼ?
KAN U MAASIL
Ilawil u núukil le preguntaʼob ku beetik yaʼab máak yoʼolal le oraciónoʼ.
Ilawil baʼaxten kʼaʼanaʼan u orar máak yéetel bix jeʼel u jatsʼutskíintik u oraciónoʼobeʼ.
Ilawil bix u tsolik le Biblia tiʼ máax unaj k-oraroʼ.
Teʼ video tsʼaʼan u paaxiloʼ ilawil tuʼux yéetel baʼax hora jeʼel u páajtal a orareʼ.