LECCIÓN 09
Zadxíñaluʼ jma gaxha de Dios pa guni orarluʼ laa
¿Ñee riuu ora runi sentirluʼ caquiiñeʼ chuʼ tu gabi lii xi gúniluʼ la? ¿Ñee huanabadiidxaluʼ xiixa ni qué huayanda gusiénecabe lii la? ¿Ñee caquiiñeʼ cúʼcabe gana lii o gacanécabe lii gatadxí ladxidoʼloʼ la? ¿Ñuuláʼdxiluʼ ñuuluʼ jma gaxha de Jehová la? Ni zacané lii nga guni orarluʼ Dios. Peru ¿ximodo naquiiñeʼ guni orarluʼ yaʼ? ¿Ñee rucaadiaga Dios guiráʼ oración ni runi binni la? ¿Ximodo zanda gánnaluʼ pa rucaadiaga Dios guiráʼ oración ni rúniluʼ yaʼ? Nga peʼ nga ni chiguizíʼdinu.
1. ¿Tu naquiiñeʼ guni orarnu? ¿Xi zanda guininu lu ca oración stinu yaʼ?
Bisiidiʼ Jesús laanu guni orarnu Bixhózenu ni nuu guibáʼ. Ne nga peʼ nga ni bíʼnibe, siempre biʼniʼ orarbe Jehová. Ti biaje guniʼbe: «Naquiiñeʼ guni orartu sicaríʼ: “Bixhózedu ni nuu guibáʼ”» (Mateo 6:9). Ora runi orarnu Jehová jma raca xhamígunu laa.
Zanda guzéʼtenu intiica cosa ora maʼ cayuni orarnu. Peru pa racaláʼdxinu gucaadiaga Dios laanu la? qué zanábanu xiixa ni qué riuuláʼdxibe. Biblia ná ora guinínenu Dios la? «zanda guinábanu laa intiica cosa, peru gaca ni ni racalaʼdxiʼ, ne zucaadiaga laanu» (1 Juan 5:14). Bizeeteʼ Jesús caadxi cosa ni zanda guininu ora maʼ cayuni orarnu (biindaʼ Mateo 6:9-13). Cadi naquiiñeʼ guinábasinu gacané Dios laanu, laaca zanda gudiʼnu xquixe peʼ laabe pur guiráʼ ni rudiibe laanu ne zanda guinábanu gacanebe xcaadxi binni.
2. ¿Ximodo naquiiñeʼ guni orarnu?
Biblia cayabi laanu: «Laguxheleʼ ladxidoʼto nezalube», nezalú Dios (Salmo 62:8). Nga runi ora guni orarnu la? caquiiñeʼ guiree ca diidxaʼ ca dede ndaaniʼ ladxidoʼno. Zanda guni orarnu en voz alta o dede ndaaniʼ íquesinu, modo tiica guni orarnu, pa zuhuaʼnu, pa zúbanu o pa zuxíbinu naquiiñeʼ gúninu ni né respetu. Laaca zanda guni orarnu ora tiica ne ra tiica si nuunu.
3. ¿Ximodo ricabi Dios ca oración stinu yaʼ?
Gadxé gadxé modo ricábibe laanu. Riquiiñebe Stiidxabe, Biblia, para guicábibe ca pregunta stinu. Riguu Stiidxaʼ Dios «xpiaaniʼ binni ni qué ganna» (Salmo 19:7; biindaʼ Santiago 1:5). Ne ora gápanu guendanagana riguixhedxí Jehová ladxidoʼno ne xquendabiaaninu. Laaca riquiiñebe ca xpínnibe para gacanecaʼ laanu ora peʼ caquiiñenu ni.
GUIZÍʼDIRUNU JMA
Guidúʼyanu ximodo zanda guni orarnu de guidubi ladxidoʼno para chuulaʼdxiʼ Dios gucaadiaga laanu ne ximodo zacaneni laanu.
4. Ni caquiiñeʼ gúninu para gucaadiaga Dios ca oración stinu
¿Xi zanda gúninu para gucaadiaga Dios ca oración stinu? Laguuyaʼ VIDEU riʼ.
Racalaʼdxiʼ Jehová guni orarnu laa si. Laguundaʼ Salmo 65:2 ne laiquiiñeʼ ca pregunta riʼ para güitu diidxaʼ:
-
¿Ñee rábiluʼ racalaʼdxiʼ Dios, «ni rucaadiaga oración», guni orarluʼ laa la? ¿Xiñee riníʼ íqueluʼ zacá yaʼ?
Pa racaláʼdxinu gucaadiaga Dios ca oración stinu caquiiñeʼ gúninu stipa para guibáninu modo riuuláʼdxibe. Laguundaʼ Miqueas 3:4 ne 1 Pedro 3:12 ne laiquiiñeʼ pregunta riʼ para güitu diidxaʼ:
-
¿Ximodo zanda gánnanu pa zucaadiaga Dios ca oración ni rúninu laa?
Bixuiʼlú chupa ejércitu chitinde lu ti guerra ne canábacaʼ Dios guni ganarcaʼ. Peru ¿ñee biaʼsi nga guiníʼ íquenu zacabi Dios oración stícabe la?
5. Guni orarnu de guidubi ladxidoʼno
Stale tu maʼ biaa guiníʼ ngueca ca ngueca ora maʼ cayuni orar o guni repetir xiixa rezá. Peru ¿ñee riuuladxiʼ Dios gucaadiaga ca oración riʼ la? Laguundaʼ Mateo 6:7 ne laiquiiñeʼ ca pregunta riʼ para güitu diidxaʼ:
-
¿Xi zanda gúninu para cadi guininu «ngueca ca ngueca» ora guni orarnu?
Ximodo ruuyaluʼ pa guiráʼ dxi guietenaláʼdxiluʼ xiixa ni galán bizaacaluʼ ne gudiiluʼ xquixe peʼ Jehová pur laani. Pa gúniluʼ ndiʼ ti semana la? biaʼsi zuzeeteluʼ gadxe cosa lu ca oración stiluʼ sin guiniʼluʼ ngueca ca ngueca.
Cásica ribeza ti padre gabi xiiñiʼ laa xi cayaca, zaqueca ribeza Jehová gábinu laa xi cayácanu.
6. Ti regalu stiʼ Dios nga oración
¿Ximodo zanda gacané oración ca laanu gápanu stipa ora cadídinu lu guendanagana? Laguuyaʼ VIDEU riʼ.
Biblia cayabi laanu dxandíʼ peʼ zatadxí ladxidoʼno pa guni orarnu. Laguundaʼ Filipenses 4:6, 7 ne laiquiiñeʼ ca pregunta riʼ para güitu diidxaʼ:
-
Zándaca qué zaca chaahuiʼ guiráʼ guendanagana ni gápanu. Peru ¿ximodo racané oración ca laanu?
-
¿Xi ñuuláʼdxiluʼ nuzeeteluʼ lu ca oración stiluʼ?
¿Ñee nannuʼ ndiʼ la?
Diidxaʼ amén riniʼni «zacá gaca ni» o «seguru». Maca riquiiñecabe diidxaʼ «amén» ora guiluxe guni orárcabe tiempu gucuá Biblia (1 Crónicas 16:36).
7. Gulee tiempu para guni orarluʼ
Nuu tiru nabé riuu xhiiñanu dede rianda laanu pa naquiiñeʼ guni orarnu. ¿Pabiáʼ bisisaca Jesús guni orar yaʼ? Laguundaʼ Mateo 14:23 ne Marcos 1:35, ne laiquieiñeʼ ca pregunta riʼ para güitu diidxaʼ:
-
¿Xi biʼniʼ Jesús para gulee tiempu guni orar?
-
¿Lii yaʼ? ¿Xi zanda gúniluʼ para cueeluʼ tiempu guni orarluʼ?
NUU TU NÁ: «Para si guni sentir binni galán nga runi orar».
-
¿Lii xi rábiluʼ yaʼ?
XI BIZÍʼDINU
Pa guni orarnu Dios de guidubi ladxidoʼno zadxíñanu jma gaxha de laabe. Laaca riguixhedxí oración xquendabiaaninu ne rudiini laanu stipa para ganda gúninu ni canabaʼ Jehová laanu.
Xi biziidiluʼ
-
¿Tu laa naquiiñeʼ guni orarnu?
-
¿Ximodo naquiiñeʼ guni orarnu?
-
¿Ximodo racané oración laanu?
BIIYAʼ XIRUʼ ZANDA GUIZIIDILUʼ
Biiyaʼ ximodo ricabi Biblia ca ni nabé rinabadiidxaʼ binni de oración.
«Gadxe cosa ni rinabadiidxaʼ binni de oración» (Torre stiʼ ni rapa, 1 de enero de 2011)
Biiyaʼ xiñee nabé risaca guni orarluʼ ne ximodo zanda gúniluʼ ca oración stiluʼ jma galán.
Biiyaʼ tuu nga rusiidiʼ Biblia naquiiñeʼ guni orarnu.
«¿Ñee jneza nga guni orarnu bidóʼ la?» (Tema ni zeeda lu jw.org)
Lu videu riʼ zaziidiluʼ pora ne paraa zanda guni orarluʼ.
Laaca zándaca ziuuláʼdxiluʼ ca ndiʼ
CANI NABÉ RINABADIIDXAʼ BINNI
¿Ximodo runi estudiarné ca testigu stiʼ Jehová binni Biblia?
Zanda gacané ca testigu sti’ Jehová lii guiénelu’ Biblia jma nagueenda ne zanda iquiiñelu’ Biblia ni jma riuulá’dxilu’. Laaca zanda guni invitarlu’ familia stilu’ o tuuxa xhamígulu’.
