WIRIKAPAI 09

Mo Mbedi na Mbori Rogo Kparakpee Yo

SI TONA MANGASUNGE

Ya mo mo abingo tiro nga mo naida boro duho kaa ngbembatayo foro rogo raka yo? Ya mo nyanyakipa asanahe ho bero mo aida akaragapai kutini? Mo naida na wasa watadu maabangirise? Ya mo mo na nyemu ka mbeda na Yekova? Kparakpee ima rengba ka undo ro na agu apai re dunduko. Ono gini wene gene rengbe boro ka manga kparakpee ngbaha? Ya mo Mbori nadegatuko kuti akparakpee dunduko? Ginipai rengbe mo ka mangaha tipa ka sa gupai nga Mbori gi gamo akparakpee? Ani bingoho.

1. Da si aida ani kpari funi, na gini apai si aida ani kpari tipaha?

Yesu ayugu gupai furani nga si naida ani kpari sa fu kina gu Barani du ngbangbaturũ yo. Yesu nitiko akpari fu Yekova. Ko aya: ‘Oni kpári wa gere tie: Barani du ngbangbaturũ yo.’ (Matayo 6:9) Ho ani akpara ni fu Yekova, ani nanyakasa gaani pabakure na ko.

Ani ima rengba ka kpara tipa ai pai. Nirengo, tipa Mbori karagapai kuti gaani akparakpee, si du wa ka si du na ngbanya dagbaha na gupai ko akpinyemuhe. ‘Ani ini ya ka ani ho gu he ku sangba ga [Mbori] nyemuhe yo, ko gi pa rani agia.’ (1 Yoane 5:14) Yesu aima fu akpiapai nga ga agu apai si aida ani kpari tipaha. (Mo gedi Matayo 6:9-13.) Kurii gu nga ka kpara tipa agu apai nabipa rani, si aidanga bangirani go tipa ka tambua Mbori tipa agu apai ko namangihe furani na tipa ka sanako ko undo kura aboro te.

2. Waigu si aida ani mangi kparakpee?

Baibiri nangarasa rani nga, ‘Ani úka kpotorani yo ku bara bangiri [Mbori].’ (Atambuahe 62:8) Si du, si naida gaani akparakpee du ni gupai naye kina boro kpotorani yo. Ani ima rengba ka kpara na fugorani kuari watadu kusende na rogo ai gu bangiriba nayugo gupai nga ani na irisa koyo du Yekova ni. Ani ima rengba ka kpara ti ai regbo na rogo ai ba.

3. Waigu Mbori akaragapai kuti gaani akparakpee?

Ko namangaha rogo dungu agene. Yekova ima fu Fugoko nga Baibiri, vuruhe yo du ani naagbia akaragapai ni dedede kuti gaani asanahe. Geda Fugo Mbori ima rengba ka sa ‘azangainahe i du na tatamana.’ (Atambuahe 19:7; mo gedi Yakoba 1:5.) Ko ima rengba ka fu zereda nga ga berãse yo furani ho ani agbiatirani ni na akpakarapai. Na ko ima rengba ka sa airisiko i ye ka undo rani ho ani aida undo ni.

MO WIRIKI KURA DUNGU APAI

Mo bingo wai rengbe mo ka manga agu akparakpee nga gu naye kpotoroyo nasa ngbarago ti Mbori, na ki bingo gu undo rengbe mo ka gbiaha ti kparakpee.

4. Apai kinaho si aida boro mangihe tipa Mbori gi gani kpee

Gini apai rengbe ka sa Mbori ko gi gaani akpee watadu ka ko gi ngaha ya? Mo bi gu VIDIO re.

VIDIO: Ya mo Mbori Nadegatuko Kuti Akparakpee Dũ?—Paparaha (2:42)

Yekova naida ani kpari fuko. Mo gedi Atambuahe 65:2, na tifuoho, mo ki sakipai tipa agi asanahe re:

Ya mo mo naberãha nga bagi ‘kpetambuahe’ naida mo kpari fuko? Tipagine mo abihe ti ni wo, watadu tipagine adunga ha ti ni wo ya?

Ka ani aida Mbori gi gaani akpee, ani du wa ka ani raki ringbisihe kuti gako arugute. Mo gedi Mika 3:4; na 1 Petero 3:12, na tifuoho, mo ki sakipai tipa gi sanahe re:

Waigu ani aino gupai nga Yekova nika degatuko adega kuti gaani akparakpee?

Ti regbo vura, agu aboro dunduko nasovura nakpara tipa diabese. Ya mo si ruaru ani berẽ gupai nga, Mbori ima rengba ka karagapai kuti agu akparakpee re dunduko?

5. Si naida gaani akparakpee ye kina boro kpotorani yo

I nayugo gupai fu kura aboro nga, i nidogodi bangisa akparakpee. Ono ya mo gure nga gu gene Mbori aida ani nikpari fuko ngbaha? Mo gedi Matayo 6:7, na tifuoho, mo ki sakipai tipa gi sanahe re:

Waigu rengbe mo ka ne “dogoda kina bangisapai sa” rogo gamo akparakpee yo?

Rogo aˈuru nibasasa si naida mo berẽpa gu maku Yekova nafuhe foro rogo ga raka yo na tifuoho mo ki tambuako tipa gu maku re. Mo nimangi gipai re na aˈuru dunduko rogo poso yo, na mo nika kpara tipa riiapai ni bakiakia saba zanga mo dogodi bangisapai.

Wene bagude naida wirini fura funi kpotoruyo. Yekova naida ani kpari fuko kpotoraniyo

6. Kparakpee nga gu gamahe Mbori nafuhe furani

Waigu Kparakpee narengbe ka fu ome furani, ho du ani ni rogo wene aregbo na ti gbegberẽ aregbo? Mo bi gu VIDIO re.

VIDIO: Kparakpee Naundo Rani Ani Hi Akpakarapai (1:32)

Baibiri nakidohe nga kparakpee ima rengba ka undo rani ani gbia ndikidi zereda berãseyo. Mo gedi AFiripoio 4:6, 7, na tifuoho, mo ki sakipai tipa agi asanahe re:

Wa vura duhe nga kparakpee naadianga gaani akpakarapai ti aregbo dũ kusayo te, waigu si aundo?
Gini bete apai mo narengbe ka kpara tipaha?

Ya mo mo iningo gipai re?

Gu fugo nga “amina” rogoyo nga “si du wo” watadu “rengo du.” Aboro aima digo nimangisunge na gu fugo nga “amina” ti digido akpee tona kina ti gu regbo i aake Baibiri ti ni.—1 Pekapai 16:36.

7. Ka bangiro gonga ti kparakpee ya

Ti kura aregbo ani ima rengba ka du na badungu apai tirani bangirani ki go ti kparakpee. Waigu kparakpee adu na nyanyakipaha fu Yesu? Mo gedi Matayo 14:23 na Marako 1:35, na tifuoho, mo ki sakipai tipa agi asanahe re:

Ginipai Yesu amangihe tipa ka maa regbo tipa kparakpee?
Gini aregbo rengbe mo ka gbia regbo ka manga kparakpee?

GU KURA ABORO NAPE GUPAI NGA: “Kparakpee nga kungbo gbarasa regbo bambiko boro ho nadegatuni kutini te.”

Ginipai rengbe mo ka pehe?

GINIPAI MO NAWIRIKIHE?

Gu kparakpee naye kina boro kpotorani yo nambedisa rani na Mbori, si nasarani ani du na zereda berãseyo, na si nafu gu ome furani ani aidaha tipa ka sa ngbarago ti Yekova.